សកម្មជនប្រជាធិបតេយ្យដ៏លេចធ្លោម្នាក់ឈ្មោះ Joshua Wong ត្រូវបានអាជ្ញាធរចាប់ខ្លួននៅក្នុងទីក្រុងហុងកុង។ នេះបើតាមការបញ្ជាក់របស់គណបក្សនយោបាយមួយដែលសកម្មជនវ័យក្មេងខាងលើចូលរួមបង្កើត។
គណបក្ស Demosisto បានប្រកាសក្នុងសេចក្តីប្រកាសរបស់ខ្លួនថា លោក Joshua Wong ត្រូវបានអាជ្ញាធរចាប់បង្ខំអោយចូលក្នុងឡាន ស្ថិតនៅតាមដងផ្លូវ ខណៈពេលរូបលោកកំពុងដើរទៅកាន់ស្ថាននីយ៍រថភ្លើងកាលពីព្រឹកថ្ងៃព្រហស្បតិ៍ម្សិលមិញនេះ។
បន្ទាប់មកគាត់ត្រូវបានអាជ្ញាធរនាំខ្លួនទៅកាន់ទីស្នាក់ការប៉ូលីស ស្ថិតនៅតំបន់ Wan Chai។ រហូតមកដល់ពេលនេះ ប៉ូលីសមិនទាន់បានបញ្ជាក់នៅឡើយទេពីការចាប់ខ្លួនសកម្មជនប្រជាធិបតេយ្យនោះ។
លោក Joshua Wong ប្រឈមនឹងការចោទប្រកាន់ ៣ករណី ប៉ុន្តែការចោទប្រកាន់នោះគេមិនទាន់បានដឹងច្បាស់នៅឡើយទេ។ នេះបើតាមការបញ្ជាក់របស់គណបក្សខាងលើ។
សូមបញ្ជាក់ថា ការចាប់ខ្លួនសកម្មជនដ៏ល្បីម្នាក់ខាងលើ កើតឡើងតែមួយថ្ងៃប៉ុណ្ណោះ មុនពេលមានគម្រោងធ្វើការតវ៉ា ដែលគម្រោងនោះមិនទាន់ត្រូវបានអនុញ្ញាតិដោយប៉ូលីសនៅឡើយទេ។
កាលពីថ្ងៃពុធ ប៉ូលីសបានធ្វើការបញ្ជាក់ថា មនុស្សជាង ៩០០នាក់ត្រូវបានចាប់ខ្លួន ចាប់តាំងពីមានការតវ៉ានៅដើមខែមិថុនាមក៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
