តុលាការកំពូលរបស់ប្រទេសកូរ៉េខាងត្បូង បានបញ្ជាឲ្យមានការកាត់ក្តីឡើងវិញ ចំពោះការកាត់ទោសលើអតីតប្រធានាធិបតីកូរ៉េខាងត្បូង គឺអ្នកស្រី Park Geun-hye។
តុលាការប្រកាសថា សាលក្រមប្រឆាំងនឹងអ្នកស្រី គួរចេញដាច់ដោយឡែកពីគ្នា ចំពោះករណីចោទប្រកាន់ពីបទសូកប៉ាន់ ហើយតុលាការកំពូលបានបញ្ជូនសំំណុំរឿង ទៅកាន់តុលាការថ្នាក់ក្រោមវិញ ដើម្បីឲ្យធ្វើការកាត់ក្តីម្តងទៀត។
អ្នកស្រី Park Geun-hye ត្រូវបានកាត់ទោសកាលពីឆ្នាំ ២០១៨ ពីបទសូកប៉ាន់ និងរំលោភអំណាច ហើយត្រូវតុលាការប្រកាសឲ្យជាប់គុករយៈពេល ២៥ឆ្នាំ។
តុលាការកំពូលក៏បានបញ្ជាឲ្យមានការកាត់ក្តីឡើងវិញផងដែរ ចំពោះករណីលោក Lee Jae-yong ដែលជាទាយាទរបស់ក្រុមហ៊ុន Samsung ពីបទសូកប៉ាន់ ក្នុងរណីជាមួយនឹងអ្នកស្រី Park។
ការសូកប៉ាន់នោះទាក់ទងនឹងលោក Lee Jae-yong ដែលបានឲ្យសេះចំនួន ៣ក្បាលមានតម្លៃ ២,៨លានដុល្លារ ទៅឲ្យកូនស្រីមិត្តភក្តិរបស់អតីតប្រធានាធិបតី អ្នកស្រី Park Geun-hye។ ការផ្តល់នោះ ត្រូវបានចាត់ទុកថាជាករណីសូកប៉ាន់។
លោក Lee Jae-yong ត្រូវបានតុលាការកាត់ទោសឲ្យជាប់គុករយៈពេល ៥ឆ្នាំ ក្នុងឆ្នាំ ២០១៧ ប៉ុន្តែត្រូវបានដោះលែងវិញ នៅឆ្នាំបន្ទាប់ ក្រោយពេលតុលាការឧទ្ធរណ៍បានសម្រេចព្យួរទោសរបស់លោក។
សូមបញ្ជាក់ថា អ្នកស្រី Park Geun-hye អាចនឹងប្រឈមការជាប់ទោសរយៈពេលវែងជាងមុន ប្រសិនជាអ្នកស្រីត្រូវបានកាត់ទោសសាជាថ្មី ក្នុងករណីផ្សេងគ្នា៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC