បាត់ដំបង៖ បុរសចំណាស់ម្នាក់ជិះម៉ូតូបម្រុងបត់ឆ្វេងឆ្លងផ្លូវ តែមិនបានប្រយ័ត្ន ត្រូវរថយន្តបុកពេញទំហឹង បណ្តាលឲ្យស្លាប់ពេលបញ្ជូនដល់មន្ទីរពេទ្យ។
គ្រោះថ្នាក់ចរាចររវាងម៉ូតូ និងរថយន្តនេះបានកើតឡើងនៅវេលាម៉ោង៨និង៥០នាទីព្រឹក ថ្ងៃ៣០ ខែសីហា ឆ្នាំ២០១៩ នៅលើកំណាត់ផ្លូវលេខ៥៧B ចន្លោះគីឡូលេខ១៥ -១៦ ស្ថិតនៅក្នុងក្រុមទី៤ ភូមិអូរដា ឃុំអូរដា ស្រុកកំរៀង ខេត្តបាត់ដំបង ។
ជនរងគ្រោះឈ្មោះខែក ញ៉យ ភេទប្រុស អាយុ៦៨ឆ្នាំ ជាសមាជិកសមាគមអតីតយុទ្ធជនស្រុកកំរៀង រស់នៅភូមិ ឃុំក្បែរកន្លែងកើតហេតុខាងលើ។ ជនរងគ្រោះ ភ្លាមៗរបួសធ្ងន់ធ្ងរ ត្រូវសាច់ញាតិបញ្ជូនទៅកាន់មណ្ឌលសុខភាពត្រាង ហើយបានស្លាប់តែម្តង ។
មុនកើតហេតុជនរងគ្រោះបានម៉ូតូម៉ាកហុងដាវ៉េវ ស៊េរីសេ១០០ ពណ៌ក្រហម គ្មានផ្លាកលេខ បើកបរពីលិចទៅកើត លុះដល់ចំណុចកើតហេតុបានងាកបត់ឆ្វេងរំពេចនោះ រថយន្តដែលកំពុងស្ថិតក្នុងល្បឿនមួយយ៉ាងលឿន ក៏បានមកដល់ជាហេតុនាំ ឲ្យជាន់ហ្វាំងមិនជាប់ក៏បុកពេញទំហឹងតែម្តង ។ ម្ចាស់រថយន្តមិនស្គាល់អត្តសញ្ញាណ ក្រោយពេលជួបហេតុការណ៍បានគេចខ្លួនបាត់ស្រមោល បន្សល់ទុកនៅរថយន្ត១គ្រឿង នៅនឹងកន្លែងម៉ាកកាម៉ារីឆ្លាម ពណ៌បៃតងចាស់ ពាក់ផ្លាកលេខ ភ្នំពេញ ២A-២៩៧៧។
សាកសពជនរងគ្រោះត្រូវបានសមត្ថកិច្ចប្រគលទៅឲ្យក្រុមគ្រួសារ រីឯវត្ថុតាងរថយន្ត និងម៉ូតូ សមត្ថកិច្ចនាំយកទៅរក្សា ទុករង់ចាំម្ចាស់ចូលខ្លួន ដើម្បីដោះស្រាយ៕ដោយ៖កូឡាប