ភ្នំពេញ៖លោកស្រី អ៊ុក ឆាយណាវី ប្រធានសមាគមគ្រូបង្រៀនឯករាជ្យកម្ពុជា ជួបជុំគ្នានៅសួនច្បារមាត់ទន្លេមុខCDC នៅព្រឹកនៅព្រឹកថ្ងែទី៥តុលានេះ ហើយនឹងហែរយកញត្តិទៅដាក់នៅក្រសួងអប់រំយុវជននឹងកីឡា និងខុទ្ធកាល័យសម្តេចតេជោ។
ក្នុងញត្តិ លោកស្រី អ៊ុក ឆាយណាវី បានថ្លែងថា ពេលនេះសិទ្ធិ និងអំណាវគ្រូបង្រៀនពុំមានពេញលេញ សិទ្ធិចូលរួមជាមួយសមាគម និងសិទ្ធិរបស់គ្រូក្នុងការចរចាតាមរយៈសមាគមគ្រូជាមួយស្ថាប័នអប់រំគ្រប់លំដាប់ថ្នាក់មិនត្រូវបានធានា ហើយគ្រូបង្រៀនគួរតែមានសេរីក្នុងការអនុវត្តសិទ្ធិចូលរួមនៅក្នុងជីវភាពសង្គម និងជីវភាពសាធារណៈ គួរតែទទួលបានការលើកទឹកចិត្ត ដើម្បីជាផលប្រយោជន៍ដល់ការអភិវឌ្ឍគ្រូបង្រៀន និងដើម្បីផលប្រយោជន៍សេវាកម្មអប់រំ និងសង្គមទាំងមូល។
លោកស្រី បានថ្លែងបន្តថា នៅក្នុងឱកាសទិវាគ្រូបង្រៀននេះ ដើម្បីផ្តល់តម្លៃឲ្យគ្រូបង្រៀន និងពង្រឹងគុណភាពអប់រំសមាគមសូមដាក់ញត្តិជូនរដ្ឋសភា រាជរដ្ឋាភិបាល និងក្រសួងអប់រំ ធ្វើការពិនិត្យនិងដោះស្រាយនូវចំណុចស្នើមួយចំនួនដូចជា ដំឡើងប្រាក់បៀវត្សរ៍ អប្បបរិមាចំនួន២លានរៀលក្នុងមួយខែៗ ជូនគ្រូបង្រៀន ត្រូវមានវិធានការទប់ស្កាត់ និងស៊ើបអង្កេតអំពើពុករលួយនៅក្នុងស្ថាប័នអប់រំគ្រប់កម្រិត ដំឡើងប្រាក់អត្ថប្រយោជន៍ផ្សេងៗជូនគ្រូបង្រៀន៕ ដោយ៖ជាលី
