ថៃ ៖ ស្ថានទូតកម្ពុជាប្រចាំប្រទេសថៃ បានផ្សាយព័ត៌មានថា នៅរសៀលថ្ងៃទី ៣០ សីហា ២០១៩ លោកអ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃ និងលោកស្រី បានអនុញ្ញាតអោយ លោក ហុង ភារិន និស្សិតអាហារូបករណ៍កម្ពុជាឆ្នាំទី ៤ ផ្នែកអភិវឌ្ឍន៍ជនបទ នៅសាកលវិទ្យាល័យរាជផាត់ជ័យភូមិ ខេត្តជ័យភូមិរបស់ថៃ ចូលជួបសម្តែងការគួរសម នៅស្ថានឯកអគ្គរាជទូតកម្ពុជាប្រចាំប្រទេសថៃ ។
ក្នុងឱកាសជួបសំណេះសំណាលនេះ លោកឯកអគ្គរាជទូតបានកោតសរសើរ និងអបអរសាទរប្អូនប្រុស ចំពោះការបង្ហាញសមត្ថភាពនៃការចងចាំរបស់ប្អូនក្នុងកម្មវិធីដ៏ល្បីមួយរបស់ថៃ ដែលធ្វើអោយទទួលបានការស្ញប់ស្ញែងយ៉ាងខ្លាំងពីសាធារណជនទាំងក្នុងប្រទេសកម្ពុជា និងក្រៅប្រទេស។ ទន្ទឹមនេះ លោកក៏បានថ្លែងអំណរគុណដែលប្អូនប្រុសធ្វើអោយប្រទេសផ្សេងស្គាល់ពីកម្ពុជាកាន់តែខ្លាំង ដែលទាំងនេះជាលទ្ធផលចេញពីការខិតខំប្រឹងប្រែងព្យាយាមហ្វឹកហាត់កន្លងមក។ ជាងនេះទៅទៀត លោកបានផ្តាំផ្ញើអោយបន្តខិតខំរៀនសូត្រ ដើម្បីវិលត្រឡប់ទៅប្រទេសកម្ពុជាវិញពេលបញ្ចប់ការសិក្សា ពីព្រោះជាធនធានកម្រមួយ និងជាទំពាំងដ៏ល្អ ក្នុងការរួមចំណែកកសាង និងអភិវឌ្ឍន៍ប្រទេសកម្ពុជាអោយមានការទទួលស្គាល់លើឆាកអន្តរជាតិបន្ថែមទៀត។
ចំណែកលោកស្រីបាន ស្រីមុំ សមាជិកសភា និងជាអ្នកតំណាងរាស្ត្រមណ្ឌលប៉ៃលិន បានជួបលើកទឹកចិត្តនិស្សិតកម្ពុជា ហុង ភារិន ដែលមានសមត្ថភាពអច្ឆរិយៈ ៕ ដោយ៖កូឡាប
