សហរដ្ឋអាមេរិចបានប្រកាសដាក់ទណ្ឌកម្មលើមនុស្សចំនួន ២នាក់ និងក្រុមហ៊ុនចំនួន ៣ ដែលបានជួយកូរ៉េខាងជើងឲ្យគេចពីទណ្ឌកម្ម។ នេះបើតាមការបញ្ជាក់របស់ក្រសួងរតនាគារអាមេរិច នៅថ្ងៃសុក្រម្សិលមិញនេះ។
ទណ្ឌកម្មនោះមានគោលដៅទៅលើបណ្តាញដឹកជញ្ជូន ដែលក្រសួងរតនាគារបាននិយាយថា មានការជាប់ពាក់ព័ន្ធទៅនឹងការផ្ទេរប្រេងពីកប៉ាល់ទៅកប៉ាល់ ដើម្បីជួយរបបព្យុងយ៉ាងគេចផុតពីទណ្ឌកម្មដែលដាក់ដោយអង្គការសហប្រជាជាតិ។
ក្រសួងអាមេរិចថ្លែងថា មនុស្ស ២នាក់បានប្រើប្រាស់កប៉ាល់ ដែលពីមុនកប៉ាល់នោះបានធ្វើការផ្ទេរប្រេងជាមួយនឹងកប៉ាល់មានទង់ជាតិកូរ៉េខាងជើង ដើម្បីធ្វើការដឹកជញ្ជូនផលិតផលប្រេងចំនួន ១,៧លានលីត្រទៅកាន់កប៉ាល់ដែលមានដោតទង់របស់កូរ៉េខាងជើង។
បុគ្គលទាំងពីរនាក់នោះ ទទួលបានអត្ថប្រយោជន៍ពីក្រុមហ៊ុនចំនួន ៣ ហើយបុគ្គល និងក្រុមហ៊ុនទាំងនោះនឹងត្រូវរងទណ្ឌកម្ម។
សូមបញ្ជាក់ថា បច្ចុប្បន្នប្រទេសកូរ៉េខាងជើងកំពុងរងសម្ពាធយ៉ាងខ្លាំងពីអង្គការសហប្រជាជាតិ ដែលទណ្ឌកម្មប្រឆាំងរបបផ្តាច់ការនោះ មានគោលដៅដើម្បីឲ្យកូរ៉េខាងជើងបោះបង់ចោលកម្មវិធីផលិតអាវុធរបស់ខ្លួន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia