ភ្នំពេញ៖ចាប់ពីថ្ងៃទី៣កញ្ញា២០១៩នេះតទៅ ការអប់រំច្បាប់ចរាចរផ្លូវគោក ដោយមិនផាកពិន័យ គឺឲ្យទិញមួកសវត្ថិភាពមកពាក់នៅហ្នឹងកន្លែងនោះ ត្រូវបានបញ្ចប់ ហើយមន្ត្រីរដ្ឋបាលរាជធានី និងប្រជាពលរដ្ឋ ដែលមកបំពេញការងារ និងទទួលសេវាផ្សេងៗ គឺមិនឲ្យចូលសាលាក្រុងទេ បើមិនបានពាក់ពួកសុវត្ថិភាពឲ្យបានត្រឹមត្រូវនោះ។
នេះជាវិធានការថ្មីមួយទៀត ដែលបានលើកឡើងក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ កាលពីថ្ងៃទី៣០ ខែសីហា ឆ្នាំ២០១៩ នៅសាលារាជធានីភ្នំពេញ ក្រោមវត្តមានលោកឃួង ស្រេង អភិបាលនៃគណៈអភិបាលរាជធានីភ្នំពេញ លោកស្នងការនរគរបាលរាជធានីភ្នំពេញ លោកមេបញ្ជាការកងរាជអាវុធហត្ថរាជធានី និងមានការចូលរួម ពីអភិបាលខណ្ឌទាំង១៤ មន្ត្រីជំនាញ និងមន្ទីរក្រោយមឱវាទមួយចំនួនទៀត។
លោកឃួង ស្រេង អភិបាលនៃគណៈអភិបាលរាជធានីភ្នំពេញ បានថ្លែងថា ពេលនេះដល់ពេលត្រូវចាប់អនុវត្តន៍ច្បាប់ចរាចរផ្លូវគោកហើយ នៅពេលវិធានការអប់រំនិងផ្សព្វផ្សាយ ត្រូវបានបញ្ចប់ ជាពិសេសក្រោយទុករយៈពេលមួយខែចុងក្រោយនេះ។ ពេលនេះការឹតបន្តឹងការអនុវត្តច្បាប់ និងការផាកពិន័យ ស្ថិតនៅជួរមុខឯការអប់រំ នៅជួរក្រោយវិញ។ ចំណែកមន្ត្រីរដ្ឋបាលរាជធានី និងប្រជាពលរដ្ឋ ដែលត្រូវមកបំពេញការងារ និងទទួលសេវាផ្សេងៗ គឺមិនឲ្យចូលសាលាក្រុងទេ បើមិនបានពាក់ពួកសុវត្ថិភាពឲ្យបានត្រឹមត្រូវ។
លោកអភិបាល បានណែនាំដល់មន្ត្រីក្រោមឱវាទរាជធានីភ្នំពេញ ទៅចូលរួមក្នុងកម្មវិធីណាមួយ ត្រូវលើកយកកម្មវិធីផ្សព្វផ្សាយអប់រំ ពីច្បាប់ចរាចរណ៍ផ្លូវគោក បញ្ហាគ្រឿងញៀន និងបញ្ហាជួញដូរមនុស្ស ប្រាប់ទៅប្រជាពលរដ្ឋ ឲ្យបានគ្រប់វេទិកាទាំងអស់។
លោកបន្តថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំដល់អាជ្ញាធររាជធានី ខេត្ត ទាំង២៥ ឲ្យអនុវត្តន៍ឲ្យបានម៉ឺនម៉ាត់ លើការបង្ក្រាបគ្រឿងញៀន និងការរឹតបន្តឹងការអនុវត្តច្បាប់ចរាចរណ៍ផ្លូវគោក នៅពេលដែលឱសានវាទ នៃការអប់រំ នឹងត្រូវបញ្ចប់ត្រឹមថ្ងៃទី៣ ខែកញ្ញាខាងមុខនេះ ហើយចូលដល់វិធានការអនុវត្តន៍ច្បាប់ម្តង ឬអាចឈានទៅដល់តុលាការទៀត។
លោក ស ថេត ស្នងការនគរបាលរាជធានីភ្នំពេញ បានលើកឡើងថា រយៈពេល១ខែចុងក្រោយនេះ គ្រោះថ្នាក់ចរាចរ នៅរាជធានីភ្នំពេញ មានការថយចុះ១១ករណី បើប្រៀបធៀបនឹងខែមុន។ តែមនុស្សស្លាប់កើនឡើង ភាគច្រើនគ្រោះថ្នាក់នៅពេលយប់ និងអត់ពាក់មួកសុវត្ថិភាព។ ជនរងគ្រោះភាគច្រើន អាយុក្រោម៣០ឆ្នាំ ជាសសរទ្រូងរបស់ប្រទេសជាតិ។
លោកស្នងការបន្តថា ពាក់ព័ន្ធគ្រឿងញៀន ឃើញថា តាមក្លឹបកម្សាន្តនានា ហាក់ដូចជា បានប្រសើរក្រោយពីយើងបំបែកសម្បុកធំៗ ប៉ុន្មានករណីកន្លងមក តែគ្រឿងញៀននេះ វាបានបែកខ្ញែកទៅតាមតំបន់តូចៗ ដូចជា តាមផ្ទះជួល ផ្ទះសំណាក់ កន្លែងកម្សាន្តផ្សេងៗ តែយ៉ាងណាពេលនេះយើងកំពុងបន្តស្រាវជ្រាវរកភស្តុតាង ដើម្បីបង្ក្រាប។ កងកម្លាំងសមត្ថកិច្ចបានបំបែកទីតាំងគ្រឿងញៀនបាន គឺបានជួយដល់រឿងសន្តិសុខច្រើនណាស់។ តែទោះបីយ៉ាងណា សុំឲ្យមានកិច្ចសហការជិតស្និទ្ធពីអាជ្ញាធរខណ្ឌទាំង១៤ ដើម្បីឈានទៅទប់ស្កាត់ ឲ្យបានខ្លាំងក្លា គឺត្រូវទៅតាមរំខានដល់កន្លែងលាក់ខ្លួនរបស់ជនសង្ស័យ៕ដោយ៖កូឡាប