ព្រះវិហារ៖ នាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះ អគ្គស្នងការនគរបាលជាតិ បានឲ្យដឹងថា ថ្ងៃសុក្រ ទី៣០ ខែសីហា ឆ្នាំ២០១៩ វេលាម៉ោង១២នឹង៤៥នាទី មានករណីឆេះរថយន្តសង្គ្រោះបន្ទាន់របស់មន្ទីរពេទ្យសម្តេចតេជោស្រអែមពេលកំពុងដឹកអ្នកជំងឺម្នាក់ទៅមន្ទីពេទ្យភូមិភាគ៤ នៅចំណុច ស្រែឈ្មោះស៊ីនិន ខាងកើតអូរដូនស្ងួន ចម្ងាយប្រហែលជាង១គីឡូម៉ែត្រ ស្ថិតក្នុងភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ។
អ្នកបើកបររថយន្ត មានឈ្មោះអោន សុផុន ភេទប្រុស អាយុ៤៦ឆ្នាំ ចំណែកអ្នកជំងឺ មានឈ្មោះផាត់ ថុល ភេទប្រុស អាយុ៣២ឆ្នាំ មុខរបរ ជាទាហាន នៅកងពលតូចអន្តរាគមលេខ៩១១។ ករណីនេះ បណ្តាលឲ្យមានការខូចខាតរថយន្តទាំងស្រុង
និងឆេះសម្ភារពេទ្យនិងឯកសារ អត្តសញ្ញាប័ណ្ណ អ្នកជំងឺអស់ទាំងស្រុង។ បន្ទាប់ពីមានការឆេះ កងកម្លាំងនគរបាលបានបញ្ចេញរថយន្តពន្លត់អគ្គិភ័យមកជួយសង្គ្រោះ បានប្រើប្រាស់រថយន្តពន្លត់អគ្គិភ័យ១គ្រឿង របស់អធិការដ្ឋាននគបាលស្រុកគូលែន ដែលមានកម្លាំងនគរបាលចំនួន៧នាក់ បាញ់ទឹកពន្លត់អស់ចំនួន២ឡាន។
នគរបាលដែលចូលរួមក្នុងប្រតិបត្តិការនេះ បានបញ្ជាក់ពីមូលហេតុនៃការឆេះនេះថា មកពីរថយន្តឆ្លងចរន្តអគ្គិសនីខ្សែភ្លើងរថយន្ត៕ដោយ៖កូឡាប
