បាត់ដំបង៖ លោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានថ្លែងថា នៅថ្ងៃទី២ ខែកញ្ញា ឆ្នាំ២០១៩ កម្លាំងកងរាជអាវុធហត្ថខេត្តបាត់ដំបង បានរុករកឃើញរថយន្តបាកុង១គ្រឿងទៀត នៅស្រុកសំឡូត។ សរុបរថយន្តបាកុង ដែលរុករកឃើញចំនួន៣គ្រឿង ប៉ុន្តែកម្លាំងយើងនៅតែបន្តស្រាវជ្រាវរកទៀត។
លោកនាយឧត្តមសេនីយ៍ សៅ សុខា បានបញ្ជាឱ្យក្រុមជំនាញចេញទៅកម្ទេចចោល ដោយកាត់ ហើយបំផ្ទុះឱ្យខ្ទេចតែម្តង ដើម្បីកុំឱ្យមានរថយន្តកែច្នៃនេះ បំផ្លាញព្រៃឈើយើងតទៅទៀត។
លោកឧត្តមសេនីយ៍ត្រី មាស សុវណ្ណ មេបញ្ជាការកងរាជអាវុធហត្ថខេត្តបាត់ដំបង បានប្រាប់ឱ្យដឹងថា កម្លាំងបានរកឃើញរថយន្តបាកុងចំនួន៤គ្រឿងទៀតហើយ នៅថ្ងៃនេះ។ រថយន្តបាកុងទាំងអស់សរុប៧គ្រឿង។
តាមសេចក្តីរាយការណ៍ពីខេត្តបាត់ដំបង ឡានបាកុង២គ្រឿង ត្រូវបានកម្លាំងអាវុធហត្ថខេត្តបាត់ដំបង រុករកឃើញលាក់ទុកក្នុងព្រៃ ស្ថិតនៅស្រុកសំឡូត ខេត្តបាត់ដំបង ថ្ងៃទី១ ខែកញ្ញា ឆ្នាំ២០១៩៕ដោយ៖កូឡាប
