ខេត្តព្រះសីហនុ៖ សប្បុរសជន ឬសហគ្រិនវ័យក្មេងមួយក្រុម ប្រចាំខេត្តព្រះសីហនុ នៅព្រឹកថ្ងៃចន្ទទី២ ខែកញ្ញា ឆ្នាំ២០១៩នេះ បាននាំយកអំពូលសូឡា និងភ្លើងហ្វាបំភ្លឺ យកទៅផ្តល់ជូនសាលាបឋមសិក្សា-វិទ្យាល័យ ហ៊ុន សែន ឃ្លាំងលើ ដើម្បីផ្តល់ជូនសិស្សានុសិស្សប្រើប្រាស់ជាប្រយោជន៍រួម។
នាឱកាសផ្តល់សម្ភារៈភ្លើងបំភ្លឺកាលពីព្រឹកមិញនេះ ប្រធានធនាគារ RHB ប្រចាំខេត្តព្រះសីហនុ លោក ឈឹម ចាន់ភិរម្យ មានប្រសាសន៍ថា ដោយពិនិត្យឃើញនៅក្នុងបរិវេណសាលាបឋមសិក្សា-វិទ្យាល័យឃ្លាំងលើ មិនទាន់មានភ្លើងបំភ្លឺឲ្យបានគ្រប់គ្រាន់នៅពេលរាត្រី សម្រាប់ផ្តល់ជូនសិស្សានុសិស្សមកស្រាវជ្រាវឯកសារលើមុខវិជ្ជាផ្សេងៗ នៅក្រៅម៉ោងសិក្សារដ្ឋនោះ ទើបរូបលោកបានកែនគរ ដល់ក្រុមការងារខាងវិស័យឯកជន ចូលរួមជាថវិកា ដើម្បីទិញសម្ភារៈ ឬអំពូលសូឡា និងភ្លើងហ្វាចំនួន ១០កំប្លេ យកទៅប្រគល់ជូនលោកនាយក និងក្រុមគ្រូបង្រៀននៅសាលាបឋមសិក្សា-វិទ្យាល័យ ហ៊ុន សែន ឃ្លាំងលើ បានប្រើប្រាស់ជាប្រយោជន៍រួម នៅក្នុងបរិវេណសាលានេះ។
លោក ឈឹម ចាន់ភិរម្យ ដែលជាតំណាងឲ្យសហគ្រិនវ័យក្មេងប្រចាំខេត្តព្រះសីហនុផងនោះ។ លោក មានប្រសាសន៍បន្តថា នឹងបន្តសហការគ្នាប្រមូលថវិកា ដើម្បីជួយសង់បង្គន់អនាម័យយ៉ាងហោចឲ្យបាន ៦បន្ទប់ ដើម្បីផ្តល់ជូនសិស្សានុសិស្សក្នុងសាលាបឋមសិក្សា-វិទ្យាល័យ ហ៊ុន សែន ឃ្លាំងលើ ជាបន្តទៀតក្នុងពេលដ៏ឆាប់ខាងមុខនេះ។
នាយកសាលាបឋមសិក្សា-វិទ្យាល័យ ហ៊ុន សែន ឃ្លាំងលើ និងលោកគ្រូអ្នកគ្រូបង្រៀននៅវិទ្យាល័យនេះ បានថ្លែងអំគុណដល់ដល់សប្បុរសជន ឬក្រុមសហគ្រិនវ័យក្មេង ប្រចាំខេត្តព្រះសីហនុ ដែលបានផ្តល់អំពូលសូឡា និងភ្លើងហ្វា ព្រមទាំងមានគម្រោងសាងសង់បង្គន់អនាម័យផ្តល់ជូនក្នុងបរិវេណសាលានេះ៕ ដោយ៖ ដែន សីមា
