សិស្ស និងនិស្សិតរាប់ពាន់នាក់បានធ្វើពហិការ ដោយពួកគេមិន បានចូលរៀនឡើង នៅថ្ងៃទីមួយ នៃការចូលរៀន សម្រាប់ឆ្នាំថ្មីនេះ។
អ្នករៀបចំបានប្រមាណថា មានសិស្សអនុវិទ្យាល័យចំនួន ១០.០០០នាក់មកពីសាលា ២០០ បានធ្វើរួមការធ្វើពហិការនោះ។
ការធ្វើពហិការរបស់សិស្សដ៏ច្រើនបែបនេះ កើតឡើងនៅថ្ងៃជាមួយ ដែលអ្នករៀបចំ បានស្នើឲ្យមានការធ្វើបាតុកម្ម និងការប្រមូលផ្តុំទ្រង់ទ្រាយធំ។
ការតវ៉ាកាលពីចុងសប្តាហ៍ ត្រូវបានគេមើលថាមានអំពើហឹង្សាដ៏អាក្រក់បំផុត ក្នុងរយៈពេលប៉ុន្មានសប្តាហ៍នេះ រវាងប៉ូលីស និងក្រុមអ្នកតវ៉ា។
កាលពីថ្ងៃសៅរិ៍ ក្រុមអ្នកតវ៉ា បានធ្វើការចោលគ្រាប់បែកសាំង ដុតភ្លើង បានវាយប្រហារ អគាររដ្ឋសភានៅទីក្រុង ខណៈពេលប៉ូលីសបានប្រើប្រាសឧស្ម័នបង្ហូរទឹកភ្នែក គ្រាប់កាំភ្លើងជ័រ ការបាញ់ទឹក និងការបាញ់គ្រាប់ពិតគំរាម ដើម្បីបំបែកហ្វូងបាតុករ។
សូមបញ្ជាក់ថា ទីក្រុងហុងកុងបានត្រូវញាំញីដោយការតវ៉ាដ៏ធំមិនធ្លាប់មានពីមុនមក អស់រយៈពេល ១៤សប្តាហ៍មកហើយ។ ការផ្ទុះការតវ៉ា កើតឡើងដោយសារតែច្បាប់ធ្វើបត្យាប័ន ដែលអនុញ្ញាតិឲ្យមានការបញ្ជូនអ្នកទោសពីហុងកុង ទៅកាត់ទោសនៅប្រទេសចិនបាន។ ក្រុមបាតុករ ក៏បានទាមទារឲ្យរដ្ឋាភិបាលបោះបង់ចោលច្បាប់នោះ និងឲ្យមេដឹកនាំហុងកុងដែលគាំទ្រដោយរបប ប៉េកាំងចុះចេញពីតំណែង។
ទីក្រុងហុងកុង ត្រូវបានអង់គ្លេសប្រគល់ត្រឡប់ទៅអោយចិនវិញនៅឆ្នាំ ១៩៩៧ ក្រោមកិច្ចព្រមព្រៀង “ប្រទេសមួយ ប្រព័ន្ធដឹកនាំពីរ” ដែលធ្វើឲ្យហុងកុងមានសេរីភាពក្នុងការបញ្ចេញមតិ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
