ភ្នំពេញ ៖ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានចេញលិខិតមួយច្បាប់ស្តីពីការដកកងកម្លាំងនគរបាលដែលយាមនៅតាមគោលដៅធនាគារ និងគ្រឹះស្ថានឯកជនទាំងអស់ឲ្យវិលចូលអង្គភាពដើមវិញ ។
ក្នុងលិខិតរបស់ស្នងការដ្ឋាននគរបាលខេត្តតាកែវ លេខ១៣៤១ ស.ជ.ណ ចុះថ្ងៃទី២១ ខែសីហា ឆ្នាំ២០១៩ គឺយោងទៅតាមសេចក្តីណែនាំលេខ០១៩ ចុះថ្ងៃទី០៥ ខែកក្កដា ឆ្នាំ២០១៩ របស់ក្រសួងមហាផ្ទៃ ស្តីពីការគ្រប់គ្រងប្រើប្រាស់ក្របខ័ណ្ឌមន្ត្រីនគរបាលជាតិ ការគ្រប់គ្រងប្រើប្រាស់អាវុធជាតិផ្ទុះ និងមធ្យោបាយ និងប្រសាសន៍ណែនាំរបស់ឯកឧត្តម ប្រធានសេនាធិការ នៃអគ្គស្នងការដ្ឋាននគរបាលជាតិ ។
លិខិតដដែលបានជម្រាបជូនលោក-លោកស្រីនាកធនាគារឯកជន និងគ្រឹះស្ថានឯកជននានាឲ្យបានជ្រាបថា ៖
១-កងកម្លាំងនករបាលដែលកំពុងហាមនៅតាមគោលដៅធនាគារឯកជន និងគ្រឹះស្ថានឯកជននានាអនុញ្ញាតទុកឲ្យយាមបន្តជាបណ្តោះអាសន្ន ។
២-ម្ចាស់ធនាគារឯកជន និងគ្រឹះស្ថានឯកជននានាត្រូវត្រៀមលក្ខណៈសម្បត្តិជាមុនក្នងការជួលសន្តិសុខឯកជន ដើម្បីការពារសន្តិសុខនៅតាមគោលដៅរបស់ខ្លួន ពីព្រោះនៅពេលដ៏ខ្លីខាងមុខនេះ កម្លាំងនគរបាលដែលនៅតាមគោលដៅទាំងនោះនឹងត្រូវដកចូលអង្គភាពដើមវិញទាំងអស់ ។
៣-កងកម្លាំងនគរបាលមានភារកិច្ចជួយអន្តរាគមន៍ដោយប្រយោលក្នុងករណីចាំបាច់នានាតែប៉ុណ្ណោះ ៕ដោយ៖បញ្ញាស័ក្តិ