ភ្នំពេញ៖ នៅថ្ងៃទី២ ខែកញ្ញា ឆ្នាំ២០១៩នេះ អង្គភាពប្រតិកម្មរហ័សរបស់ ទីស្តីការគណៈរដ្ឋមន្ត្រី បានផលិតវីដេអូមួយបង្ហាញអំពីមូលហេតុ នៃការចាប់ខ្លួន លោក កឹម សុខា អតីតប្រធាន នៃអតីតគណបក្សសង្គ្រោះជាតិ ដែលពាក់ព័ន្ធនឹងការឃុបឃិតជាមួយបរទេស ដើម្បីផ្តួលរំលំរាជរដ្ឋាភិបាលស្របច្បាប់។ ជាមួយគ្នានោះដែរ លោកកឹម សុខា បានថ្លែងថា ខ្ញុំសូមឲ្យខ្មែរគ្រប់និន្នាកាបញ្ឈប់នូវនយោបាយ យកឈ្នះចាញ់ខ្មែរគ្នាឯង ដោយយកប្រជាពលរដ្ឋនិងជោគវាសនាប្រទេសជាតិជាឈ្នាន់ឬជារបាំងតទៅទៀត ព្រោះថាខ្មែរគ្រប់ស្រទាប់វណ្ណៈបានឈឺចាប់គ្រប់គ្រាន់ហើយ។
ជាមួយនឹងករណីលោកកឹម សុខានេះដែរ លោកChanrath Ou – អ៊ូ ច័ន្ទរ័ត្ន បានសរសេរលើផេកហ្វេសប៊ុកថា នៅថ្ងៃ៣ កញ្ញា នេះ ជាថ្ងៃគម្រប់ ២ឆ្នាំនៃការចាប់ឃុំខ្លួនលោកប្រធាន កឹម សុខា។ លោកអ៊ូ ច័ន្ទរ័ត្ន បានបញ្ជាក់ថា “ខ្ញុំនៅតែយល់ថា វាជារឿងអយុត្តិធម៌បំផុតសម្រាប់លោក ចំពោះការដែលយកសារ វីឌីអូ ដ៏គ្មានខ្លឹមសារ ជាមូលហេតុនៃការចាប់ខ្លួន។ ខ្ញុំសូមអំពាវនាវដល់តុលាការ និងរាជរដ្ឋាភិបាលកម្ពុជា មេត្តាពិចារណាក្នុងការផ្តល់ភាពស្អាតស្អំ និងសេរីភាពជូន ឯ.ឧ. កឹម សុខា វិញ”។
លោកកឹម សុខា អតីតប្រធានគណបក្សសង្គ្រោះជាតិ បានសរសេរលើផេកហ្វេសប៊ុកនៅថ្ងៃទី២ ខែកញ្ញា ឆ្នាំ២០១៩ថា យប់នេះ កាលពី២ឆ្នាំមុន កងកម្លាំងប្រដាប់អាវុធបានសម្រុកចូលចាប់ខ្លួនខ្ញុំក្នុងគេហដ្ឋានរបស់ខ្ញុំទាំងកណ្តាលអធ្រាត្រ ដោយបំបែករូបខ្ញុំចេញពីភរិយា ទាំងដែលគាត់មិនដឹងថាគេចាប់ខ្ញុំយកទៅទីណា ហើយធ្វើអ្វីទៅលើរូបខ្ញុំ។ សម្រែកលាយឡំនឹងទឹកភ្នែករបស់ភរិយាខ្ញុំនាយប់នោះ គឺជាការឈឺចាប់បំផុត ដែលអ្នកទាំងឡាយណាធ្លាប់ជួបប្រទះនឹងដឹងច្បាស់។ រូបខ្ញុំផ្ទាល់ក៏បានចាំច្បាស់នូវសម្រែករបស់អ្នកម្តាយខ្ញុំនិងក្រុមគ្រួសារនៅពេលដែលឪពុករបស់ខ្ញុំត្រូវបានក្រុមប្រដាប់អាវុធខ្មែរក្រហមចាប់យកទៅទាំងកណ្តាលអធ្រាត្រកាលពីឆ្នាំ១៩៧៥។ ខ្ញុំស្គាល់ច្បាស់ពីការឈឺចាប់ដែលត្រូវគេចាប់ដោយអយុត្តិធម៌ ហើយរឹតតែដឹងច្បាស់ថាអ្នកដែលខ្លោចផ្សាបំផុតគឺក្រុមគ្រួសារដែលមិនថាគេចាប់យកឪពុកនិងស្វាមីទៅណា។
លោកកឹម សុខា បានបន្ថែមថា ខ្ញុំបានដឹងហើយថា ជីវិតជាអ្នកប្រកាន់ខ្ជាប់នូវគោលការណ៍ប្រជាធិបតេយ្យនិងក្នុងតួនាទីជាមេដឹកនាំបក្សប្រឆាំងនេះ នឹងអាចនាំមកនូវគ្រោះថ្នាក់និងការឈឺចាប់រាប់មិនអស់។ ខ្ញុំស្ម័គ្រចឹត្តធ្វើពលីកម្មជូនជាតិនេះ មិនមែនខ្ញុំមិនចេះខ្លាច មិនមែនខ្ញុំមិនដឹងពីគ្រោះថ្នាក់ មិនមែនព្រោះខ្ញុំល្ងង់ តែនេះព្រោះខ្ញុំដឹងថា«តួនាទីជាអ្នកដឹកនាំ គឺខុសពីចៅហ្វាយឬថៅកែ។ ចៅហ្វាយឬថៅកែគេជាអ្នកចាំយកលទ្ធផលពីការងាររបស់យើង តែអ្នកដឹកនាំគឺជាអ្នកដែលលះបង់មុនគេនិងច្រើនជាងគេ ដើម្បីជាគំរូដល់អ្នកគាំទ្រ។ អ្នកដឹកនាំដែលមានគុណធម៌ មិនដែលរុញច្រានឲ្យអ្នកគាំទ្រខ្លួនធ្វើអ្វីដែលខ្លួនមិនហ៊ានធ្វើឡើយ។ ក្នុងនាមជាឪពុកម្នាក់ ខ្ញុំតែងតែចង់ឲ្យកូនរបស់ខ្ញុំរស់នៅដោយសុវត្ថិភាព ដូច្នេះហើយ ខ្ញុំតែងតែជ្រើសរើសយកនិងណែនាំឲ្យកូនខ្មែរ ធ្វើការតស៊ូរដោយអហិង្សា ទោះបីការតស៊ូរនោះ ត្រូវធ្វើឲ្យខ្ញុំរងគ្រោះក៏ដោយ ខ្ញុំសុខចិត្តទទួល ក្នុងនាមជាអ្នកដឹកនាំម្នាក់ដោយមិនទុកឲ្យអ្នកគាំទ្រយកខ្លួនទៅពាំងជំនួសខ្ញុំជារៀងរហូតនោះទេ។ឆ្លៀតក្នុងឱកាសនេះ ខ្ញុំសូមឲ្យខ្មែរគ្រប់និន្នាកាបញ្ឈប់នូវនយោបាយ យកឈ្នះចាញ់ខ្មែរគ្នាឯង ដោយយកប្រជាពលរដ្ឋនិងជោគវាសនាប្រទេសជាតិជាឈ្នាន់ឬជារបាំងតទៅទៀត ព្រោះថាខ្មែរគ្រប់ស្រទាប់វណ្ណៈបានឈឺចាប់គ្រប់គ្រាន់ហើយ។
សូមរំលឹកផងដែរថា លោក កឹម សុខា ត្រូវបានសមត្ថកិច្ចចាប់ខ្លួន នៅពាក់កណ្តាលអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧។ លោក កឹម សុខា ត្រូវបានចោទប្រកាន់ពីបទសន្ធិដ្ឋិភាព ជាមួយបរទេសតាមមាត្រា ៤៤៣ នៃក្រមព្រហ្មទណ្ឌ ដែលនឹងអាចជាប់ពន្ធនាគារ ពី១៥ឆ្នាំដល់៣០ឆ្នាំ ។ លោក កឹម សុខា ត្រូវបានឃុំខ្លួន ក្នុងពន្ធនាគារត្រពាំងផ្លុង ខេត្តត្បូងឃ្មុំ រយៈពេលជាងមួយឆ្នាំ ហើយត្រូវបានប្ដូរកន្លែងឃុំខ្លួន ពីត្រពាំងផ្លុង “ម៣” យកមកឃុំខ្លួនក្នុងផ្ទះរបស់ គាត់នៅខណ្ឌទួលគោក រាជធានីភ្នំពេញ នាម៉ោងជាង៣ ទៀបភ្លឺ ពីថ្ងៃទី១០ ខែកញ្ញា ឆ្នាំ២០១៨ ៕ដោយ៖កូឡាប
