ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងថា ការកែទម្រង់ ដ៏ធំមួយពាក់ព័ន្ធនឹងកម្លាំងប្រដាប់អាវុធទាំងកងយោធពលខេមរភូមិន្ទ ក៏ដូចជាខាងនគរបាលជាតិផងដែរ គឺ គោរម្យងារ ជាឧកញ៉ា និងមុខតំណែង គ្រប់បណ្តាអង្គភាពទាំងអស់ត្រូវរៀបចំឲ្យបានឆាប់រហ័ស និងប្រុងប្រយ័ត្នដើម្បីឲ្យគេសម្រេចចិត្តជ្រើសរើស យកមួយណាតាមតម្រូវការ គឺឲ្យទុកតែមួយប៉ុណ្ណោះ។
ការថ្លែងនេះបានធ្វើឡើង នៅក្នុង ពិធីសម្ពោធបន្ទាយ និងអគារស្នាក់នៅរបស់កងឯកភាពកងកិត្តិយសត្រែទ័ពនៅសង្កាត់ឃ្មួញ ខណ្ឌសែនសុខ រាជធានីភ្នំពេញ កាលពីព្រឹក ថ្ងៃទី៣ ខែកញ្ញា ឆ្នាំ២០១៩។ សម្តេចពិជ័យសេនា ទៀ បាញ់ បានបញ្ជាក់ថា យើងនិយាយគ្នាឲ្យច្បាស់តាមតម្រូវការ គឺឲ្យទុកតែមួយទេ ងារជាឧកញ៉ា យើងនេះឃើញថា វាក៏កិត្តិយសខ្ពង់ខ្ពស់ដែរ គឺបើយើងទុកទទួលយកងារឧកញ៉ា គឺត្រូវតែ លះបង់មុខតំណែងនៅក្នុងកងទ័ពឬឋានន្តរស័ក្តិ នៅក្នុងកងទ័ពតាមខ្ញុំដឹង គឺទុកតែមួយទេត្រូវគិតគូរ យកមែនទែនរហូតដល់ សម្តេចនាយករដ្ឋមន្ត្រី បានណែនាំឱ្យរៀបចំបែបបទបញ្ឈប់នូវមុខតំណែងនោះ រួចជាស្រេចទៅហើយ។ ខ្ញុំបានប្រាប់ទៅខាងបុគ្គិលហើយឱ្យទាក់ទងគ្នាទាំងអស់ធ្វើទិន្នន័យឱ្យ ច្បាស់លាស់ពីបណ្តាបុគ្គលិកទាំងអស់។ ឥឡូវគឺធំជាងគេ នៅក្រសួង នៅអគ្គបញ្ជាការ នៅបញ្ជាការដ្ឋានអង្គរក្ស និងប៉េអឹមខ្លះដែរ ហើយអង្គភាពតូចៗ បើមានក៏មានតិចដែរ។ ពីមុនធ្លាប់មានតែមួយទេគឺងារ ឧកញ៉ាផងងារជាទីប្រឹក្សាផងចុះទៅរាតត្បាតនៅភូមិភាគ៥ ដូចជាសារ៉េអស់ហើយ។ តាមនៅធំៗ ដែរនៅគ្រាក់ៗដែរហ្នឹង មិនធម្មតាទេ។ ជាមួយគ្នានេះ សម្តេចពិជ័យសេនា បានស្នើឲ្យគ្រប់បញ្ជាការ ទាំងអស់ត្រូវធ្វើស្ថិតិចំនួនអ្នកដែលមានងារជាឧកញ៉ា ឡើងវិញឱ្យបានច្បាស់លាស់និងជួបជាមួយ អ្នកដែលមានងារពីរគឺឱ្យសម្រេចចិត្តជ្រើសរើសយកតែមួយ ដើម្បីក្រសួងការពារជាតិធ្វើបែបបទទៅប្រមុខរដ្ឋាភិបាល។ ខ្ញុំមានអារម្មណ៍ថា ច្បាស់ណាស់មិនអាចជៀសផុតពីការប៉ះពារខ្លះហើយ ខ្ញុំនិយាយនេះគឺចង់និយាយអ្នកដែលគេសុខចិត្ត។ ហើយត្រូវតែជួបផ្ទាល់ជាមួយអ្នកទាំងនោះ ឱ្យគេសម្រេចចិត្តជ្រើសរើសថា តើយកមួយណាទុកមួយណា? ព្រោះអ្នកខ្លះមានតំណែងគួរ សមដែរ ដូច្នេះបើទៅយកឧកញ៉ាគឺមុខតំណែងឋានន្តរស័ក្តិត្រូវតែលាដែរ។
ថ្លែងក្នុងពិធីសម្ពោធបន្ទាយកងឯកភាពកងកិត្តិយស ត្រែទ័ព នាពេលនោះ សម្ដេចពិជ័យសេនា ទៀ បាញ់ បានបញ្ជាក់ទៀតថា៖ កងឯកភាព កងកិត្តិយស ត្រែទ័ព បានចូលរួមចំណែកយ៉ាងសកម្ម ក្នុងការថែរក្សាការពារសុខសន្តិភាព ស្ថេរភាពជាតិ និងសណ្តាប់ធ្នាប់សង្គម និងវាយឲ្យបរាជ័យរាល់ឧបាយកលពិសពុលរបស់ពួកអមិត្ត ដែលបានឃុបឃិតជាមួយបរទេស ប៉ុនប៉ងផ្តួលរំលំរាជរដ្ឋាភិបាលស្របច្បាប់ តាមបែបផែនបដិវត្តន៍ពណ៌ ដណ្តើមយកអំណាចផ្ទុយពីគោលការណ៍ នៃលទ្ធិប្រជាធិបតេយ្យ។ សម្តេចបន្តថា៖ កងកិត្តិយសត្រែទ័ពនឹងបន្តបំពេញ តួនាទីភារកិច្ចរបស់ខ្លួនកាន់តែល្អប្រសើរឡើងថែមទៀត ក្នុងការពង្រឹង ពង្រីកសមត្ថភាពលើគ្រប់ផ្នែកក្នុងបេសកកម្មរបស់ខ្លួន ប្រកបដោយការទទួលខុសត្រូវ ដើម្បីបុព្វហេតុ ឯករាជ្យ អធិបតេយ្យភាព បូរណភាពដែនដី សុខសន្តិភាព និងការអភិវឌ្ឍជូនសង្គមជាតិ មាតុភូមិនៃយើង។ សម្តេចពិជ័យសេនា ទៀ បាញ់ បានចាត់ទុកការសម្ពោធបន្ទាយ កងឯកភាព កងកិត្តិយសត្រែទ័ពនាពេលនេះ បានឆ្លុះបញ្ចាំងពីការយកចិត្តទុកដាក់ ការគិតគូរការលំបាករបស់រាជរដ្ឋាភិបាល ក្រសួងការពារជាតិ អគ្គបញ្ជាការដ្ឋាន មេបញ្ជាការ មេបញ្ជាការរង និងពលទាហានទាំងអស់ ដែលធ្លាប់ឆ្លងកាត់ការលំបាករាប់មិនអស់ ចូលរួមធ្វើឲ្យប្រទេសជាតិ និងប្រជាជន ទទួលបានសន្តិភាព និងមានការអភិវឌ្ឍន៍ ប្រកបដោយមោទនភាពនាពេលបច្ចុប្បន្ន៕ ដោយ៖កូឡាប