ប្រធានាធិបតីអ៊ីរ៉ង Hassan Rouhani កាលពីថ្ងៃអង្គារម្សិលមិញបានច្រានចោលពីលទ្ធភាព នៃការចរចាដោយផ្ទាល់ ជាមួយនឹងអាមេរិច ជុំវិញបញ្ហាកម្មវិធីនុយក្លេអ៊ែររបស់ខ្លួន។
លោកបានថ្លែងនៅក្នុងការបើសម័យប្រជុំសភាថា “ពួកយើងមិនដែលបានធ្វើការសម្រេចចិត្តទេ ដើម្បីចរចាដោយផ្ទាល់ជាមួយនឹងអាមេរិច”។
អ៊ីរ៉ងតែងតែធ្វើការឆ្លើយតបអវិជ្ជមាន ចំពោះការស្នើឲ្យមានការចរចាជាមួយនឹងអាមេរិច។
ទោះយ៉ាងណា ប្រធានាធិបតីអ៊ីរ៉ងថ្លែងថា “ប្រសិនជាអាមេរិចដកទណ្ឌកម្មប្រឆាំងអ៊ីរ៉ង វានឹងអាចមានលទ្ធភាពសម្រាប់អាមេរិច ក្នុងការចូលរួមការចរចា”។
សូមបញ្ជាក់ថា កាលពីសប្តាហ៍មុន លោក Hassan Rouhani បាននិយាយថា អាមេរិចគួរដកទណ្ឌកម្មប្រឆាំងអ៊ីរ៉ង ដែលវាគឺជាលក្ខខណ្ឌមុនសម្រាប់ការចរចា។
ចំណែកមន្រ្តីអ៊ីរ៉ងវិញ បានថ្លែងបញ្ជាក់ថា សម្រាប់កិច្ចចរចាទាំងឡាយជាមួយនឹងអាមេរិច ទីក្រុងវ៉ាស៊ីនតោនគួរត្រឡប់ទៅចូលរួមកិច្ចព្រមព្រៀងនុយក្លេអ៊ែរអ៊ីរ៉ងវិញ ដែលអាមេរិចបានដកខ្លួនកាលពីឆ្នាំ ២០១៨៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua
