ភ្នំពេញ៖ ដើម្បីឆ្លើយតបទៅនឹងតម្រូវការចង់បានរបស់ប្រជាពលរដ្ឋ រដ្ឋបាលរាជធានីភ្នំពេញ ប្តេជ្ញាបង្ខិតការផ្តល់សេវាសាធារណៈនានា ជូនប្រជាពលរដ្ឋនៅតាមមូលដ្ឋានឲ្យកាន់តែល្អប្រសើរ។
អភិបាលរាជធានីភ្នំពេញបានអះអាងថា រដ្ឋបាលរាជធានីភ្នំពេញបានបង្កើតឲ្យមានក្រុមបដិ សណ្ឋារកិច្ច នៅទំាង១០៥សង្កាត់ ទូទំាងរាជធានីភ្នំពេញ ដើម្បីបង្កើនប្រសិទ្ធភាពនៃការផ្តល់សេវា សាធារណៈនៅតាមមូលដ្ឋាន ឲ្យកាន់តែល្អ តាមតម្រូវការចង់បានរបស់ប្រជាពលរដ្ឋ ខណៈនៅតាម បណ្តាខណ្ឌទំាងអស់ ក្នុងរាជធានីភ្នំពេញមានការិយាល័យច្រកចេញចូលតែមួយរួចរាល់អស់ហើយ។
លោកឃួង ស្រេង អភិបាលរាជធានីភ្នំពេញ បានថ្លែងដូច្នេះ ក្នុងឱកាសជួបពិភាក្សាការងារ ជាមួយគណ:ប្រតិភូគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា ដែលដឹកនាំដោយ លោក ហ៊ុន ម៉ានី ប្រធានគណៈកម្មការ និងសមាជិក សមាជិកាគណៈកម្មការ នៅព្រឹកថ្ងៃទី៤ ខែកញ្ញា ឆ្នាំ២០១៩ នៅសាលារាជធានីភ្នំពេញ។
កិច្ចពិភាក្សាការងារនាពេលនេះក្នុងគោលបំណង សិក្សាស្វែងយល់ពីស្ថានភាពទូទៅក្នុងរាជធានីភ្នំពេញ និងប្រមូលព័ត៌មានមួយចំនួន ពាក់ព័ន្ធនឹងវិស័យទទួលបន្ទុករបស់គណៈកម្មការ អំពីប្រសិទ្ធភាពនៃការអនុវត្តច្បាប់នានា លទ្ធផលការងារ បញ្ហាប្រឈម ក៏ដូចជាពិនិត្យមើលពីភាពរីកចម្រើន និងជីវភាពរស់នៅរបស់បងប្អូនប្រជាពលរដ្ឋ។
លោក ឃួង ស្រេង អភិបាល នៃគណៈអភិបាលរាជធានីភ្នំពេញបានជម្រាបជូន គណៈប្រតិភូរដ្ឋសភាឲ្យដឹងថា ការបង្កើនប្រសិទ្ធភាពនៃការផ្តល់សេវាសាធារណៈជូន ប្រជាពលរដ្ឋគឺជាយន្ត ការអាទិភាពស្របតាមតម្រូវការចង់បាន របស់ប្រជាពលរដ្ឋ ខណៈដែរក្រុមបដិសណ្ឋារកិច្ចនៅតាមសង្កាត់នេះ នឹងបំពេញតួនាទីជំនួសឲ្យចៅសង្កាត់ដែលអាចផ្តល់សេវាភ្លាមៗ ជាបន្ទាន់ជូនប្រជាពលរដ្ឋដែលមកទទួលសេវា។ លោកអភិបាលបានអះអាងថា យន្តការនេះ មិនត្រឹមតែផ្តល់វេលាគ្រប់គ្រាន់សម្រាប់ចៅសង្កាត់ បានចុះត្រួតពិនិត្យសា្ថនភាពនានា នៅតាមមូលដ្ឋានរបស់ខ្លួន និងចូលរួមកិច្ច ប្រជុំពាក់ព័ន្ធប៉ុណ្ណោះទេ តែថែមទំាងបានឈានទៅលុបបំបាត់ពាក្យដែលប្រជាពលរដ្ឋនិយាយថាចង់ ជួបចៅសង្កាត់ យ៉ាប់ជាងជួបរដ្ឋមន្រ្តីទៅទៀត។
លោកបានបញ្ជាក់ថា យើងបានអញ្ជើញក្រុមការងារបដិសណ្ឋារកិច្ចមកបណ្តុះបណ្តាលបន្ថែម ដើម្បីឲ្យគាត់យល់ពី កិច្ចការងាររបស់គាត់ក្នុងការទទួលនិងផ្តល់សេវាជូនប្រជាពលរដ្ឋ ក្រុមពួកគាត់ទទួលខុសត្រូវទំាងអស់ នូវលិខិតស្មាមរបស់ប្រជាពលរដ្ឋ នៅពេលដែលចៅសង្កាត់មិននៅកន្លែង ហើយគាត់រត់ទៅ រកចៅសង្កាត់ឲ្យចុះហត្ថលេខា។ កិច្ចការនេះយើងអនុវត្តន៍បានជោគជ័យ ដោយលុបបំបាត់នូវពាក្យ ដែលថារកចៅសង្កាត់ ពិបាកជាងរករដ្ឋមន្រ្តីបានជាស្ថាពរនៅរាជធានីភ្នំពេញ។ នេះជាបទពិសោធន៍ មួយដែលរដ្ឋបាលរាជធានីភ្នំពេញ បានខិតខំប្រឹងប្រែងធ្វើកិច្ចការងារនេះ ដើម្បីធ្វើយ៉ាងណាអនុវត្តន៍ គោលនយោបាយរបស់រាជរដ្ឋាភិបាល ឲ្យបានល្អក្នុងការបង្ខិតសេវាសាធារណៈឲ្យនៅគៀកកិតប្រជាពលរដ្ឋ និងបម្រើប្រជាពលរដ្ឋឲ្យបានល្អប្រសើរ។
លោកអភិបាលរាជធានីភ្នំពេញ បានបន្ថែមថា ក្រៅពីរដ្ឋបាលរាជធានីភ្នំពេញក៏បានខិតខំ ពង្រឹងការធានាសន្តិសុខសណ្តាប់ធ្នាប់សង្គម ការលើកកម្ពស់គុណភាពសេវាអប់រំយុវជន កីឡា ធម្មការ កិច្ចការសាសនា វប្បធម៌ និងទេសចរណ៍ ដើម្បីជាប្រយោជន៍សម្រាប់ប្រជាពលរដ្ឋនិងសង្គមជាតិ។
លោក ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភាបានមានប្រសាសន៍ថា រដ្ឋបាលរាជធានីភ្នំពេញបានបំពេញភារកិច្ចក្នុងការ លើកកម្ពស់កិច្ចការទំាង៤នេះ ដោយទទួលបានជោគជ័យ ដែលធានាសង្គមមានសន្តិសុខសណ្តាប់ ធ្នាប់ល្អ ដែលលើកកម្ពស់សេដ្ឋកិច្ចនិងជីវភាពប្រជាពលរដ្ឋ តាមរយៈការផ្តល់សេវាសាធារណៈប្រកបដោយប្រសិទ្ធភាព។
សូមជម្រាបថា ការចុះបំពេញបេសកកម្មរបស់គណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា នៅរាជធានីភ្នំពេញ នាពេលនេះ ជារាជធានី/ខេត្តលើកទី២៤ ហើយ ដែលគណៈកម្មការចុះសិក្សាស្វែងយល់ និងដកបទពិសោធន៍និងការប្រឈមនានា សម្រាប់យកទៅដោះស្រាយក្នុងកិច្ចប្រជុំរដ្ឋសភា៕ ដោយ៖កូឡាប
