សកម្មជនវ័យក្មេងហុងកុងជាច្រើនាក់ កាលពីថ្ងៃអង្គារម្សិលមិញនេះ បានជំរុញឲ្យកោះតៃវ៉ាន់ជួយលើកកម្ពស់លទ្ធិប្រជាធិបតេយ្យនៅហុងកុង ក្រោយពេលទីក្រុងនេះ ជួបវិបត្តិនយោបាយដ៏អាក្រក់បំផុតអស់រយៈពេលជាង ៣ខែ និងបានស្នើឲ្យមានការប្រមូលផ្តុំទ្រង់ទ្រាយធំ មុនពេលមកដល់នៃខួបគម្រប់ ៧០ឆ្នាំនៃការបង្កើតបក្សកុម្មុយនិស្តចិន នៅថ្ងៃទី ១ ខែតុលា។
ប្រជាជនហុងកុងរាប់សែន រាប់លាននាក់បានធ្វើការតវ៉ានៅតាមដងផ្លូវទីក្រុងចាប់តាំងពីពាក់កណ្តាលខែមិថុនាមក ដែលការតវ៉ាពេលខ្លះ ផ្ទុះជាអំពើហឹង្សា។
ទីក្រុងហុងកុងត្រូវបានអង់គ្លេសប្រគល់ទៅឲ្យចិនវិញក្នុងឆ្នាំ ១៩៩៧ ក្រោមកិច្ចព្រមព្រៀងប្រទេសមួយ ប្រព័ន្ធគ្រប់គ្រងពីរ។ ប្រទេសចិនក៏ចង់យកប្រព័ន្ធនោះអនុវត្តន៍ទៅលើកលើកោះតៃវ៉ាន់ដែរ ដែលចិនតែចាត់ទុកតៃវ៉ាន់ថា ជាផ្នែកមួយនៃទឹកដីរបស់ខ្លួន ហើយនឹងអាចធ្វើការរួបរួមជាមួយគ្នាវិញនៅពេលអនាគត។
ប្រជាជនជាច្រើននៅតៃវ៉ាន់កំពុងតាមដានយ៉ាងដិតដល់ជុំវិញស្ថានការណ៍នៅហុងកុង។
មេដឹកនាំនិស្សិតហុងកុងម្នាក់ឈ្មោះ Lester Shum បានថ្លែងប្រាប់អ្នកសារព័ត៌មានក្នុងទីក្រុងតៃប៊ិថា “ខ្ញុំសង្ឃឹមថា ប្រជាជនអាចបំផុសគំនិតរួមគ្នា ដើម្បីរកវិធីឈ្នះលើសង្រ្គាមមួយនេះ”។
លោកថ្លែងថា “មិត្តទាំងអស់នៅតៃវ៉ាន់ មិនមែនជាអ្នកឈរមើលចលនានៅហុងកុងនោះទេ តែពួកគេជាអ្នកចូលរួម។ ចិននឹងចង់គ្រប់គ្រងតៃវ៉ាន់ ក្រោយពេលចិនគ្រប់គ្រងហុងកុងបាន”។
ចំណែកមេដឹកនាំនិស្សិតហុងកុងម្នាក់ទៀតដ៏លេចធ្លោឈ្មោះ Joshua Wong បានស្នើឲ្យមានការប្រមូលផ្តុំទ្រង់ទ្រាយធំ។
“ពួកយើងសង្ឃឹមថា ហុងកុងអាចក្លាយជាតៃវ៉ាន់នៅថ្ងៃណាមួយ ដែលជាកន្លែងប្រជាធិបតេយ្យ និងសេរីភាព”។
លោក Joshua Wong បច្ចុប្បន្នត្រូវបានដោះលែងឲ្យនៅក្រៅឃុំ បន្ទាប់ពីរូបលោកត្រូវបានចាប់ខ្លួនកាលពីសប្តាហ៍មុន និងរងការចោទប្រកាន់ពីបទញុះញង់ និងចូលរួមក្នុងការប្រមូលផ្តុំខុសច្បាប់នៅក្រៅទីស្នាក់ការប៉ូលីសហុងកុង។
ប្រធានាធិបតីតៃវ៉ាន់ អ្នកស្រី Tsai Ing-wen បាននិយាយនៅថ្ងៃអង្គារថា រដ្ឋាភិបាលរបស់អ្នកស្រីកំពុងតាមដានវិបត្តិនៅហុងកុងយ៉ាងជិតស្និទ្ធ។
ប៉េកាំងធ្លាប់ចោទប្រកាន់តៃវ៉ាន់ថា បានគាំទ្រការតវ៉ានៅហុងកុង ប៉ុន្តែការចោទប្រកាន់នោះត្រូវបានតៃវ៉ាន់ច្រានចោល៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia