កំពង់ស្ពឺ ៖ នារសៀលថ្ងៃពុធ ទី៤ ខែកញ្ញា ឆ្នាំ២០១៩ លោកវ៉ី សំណាង អភិបាល នៃគណៈអភិបាលខេត្តកំពង់ស្ពឺ និងជាប្រធានគណៈបញ្ជាការឯកភាពខេត្ត បានអញ្ជើញចុះពិនិត្យទីតាំងដែលសមត្ថកិច្ចបានរុករកឃើញនូវប្រភេទឈើហុប១០កំណាត់ធំៗ បន្ថែមទៀតដែលក្រុមឈ្មួយប្រព្រឹត្តនូវបទល្មើសព្រៃឈើនៅបណ្ដាខេត្តផ្សេងយកមកលាក់ទុកក្នុងភូមិសាស្ដ្រភូមិដំបងវិញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ។
លោក វ៉ី សំណាង អភិបាលខេត្ត បានថ្លែននូវការកោតសរសើរដល់បណ្ដាកម្លាំងសមត្ថកិច្ចចម្រុះពាក់ព័ន្ធដែលបានខិតខំប្រឹងប្រែងក្នុងការរុករកស្រាវជ្រាវ និងទប់ស្កាត់បានទាន់ពេលវេលានូវរាល់បទល្មើសព្រៃឈើទាំងឡាយណាដែលក្រុមឈ្មួញបានប្រព្រឹត្តរយៈពេលកន្លងមក ។
សូមបញ្ជាក់ផងដែរថាត្រឹមតែរយៈពេលតែ២ថ្ងៃ កម្លាំងសមត្ថកិច្ចចម្រុះបានរុករកឃើញ និងរឹបអូសបាននូវរថយន្តកែច្នៃ(ប៉ាកុង)ចំនួន៣គ្រឿង និងប្រភេទឈើហុបចំនួន១២កំណាត់ធំៗ។
ចំពោះវត្ថុតាងខាងលើនឹងត្រូវប្រគល់ឱ្យរដ្ឋបាលព្រៃឈើស្រុកឱរ៉ាល់ដើម្បីអនុវត្តតាមនីតិវិធីច្បាប់ ៕ ដោយ ៖ បញ្ញាស័ក្តិ