កំពង់ស្ពឺ ៖ យុទ្ធនាការប្រឆាំងគ្រឿងញៀនខេត្ដកំពង់ស្ពឺបន្ដបង្ក្រាបមុខសញ្ញាពាក់ព័ន្ធករណីរក្សាទុកសារធាតុញៀនខុសច្បាប់ជាបន្ដបន្ទាប់សរុប ៧នាក់បញ្ជូនទៅអយ្យការអមសាលាដំបូងខេត្ដចាត់ការតាមច្បាប់។ ត្រូវឆ្លើយថាទេចំពោះគ្រឿងញៀន សូម្បីតែកន្លះវិនាទី ក៏ឆ្លេីយថាទេ ។
ដោយមានការដឹកនាំចង្អុលការពីលោកឧត្ដមសេនីយ៍ទោ សម សាមួន ស្នងការនគរបាលខេត្ត ជំនាញប្រឆាំងគ្រឿងញៀនបានអនុវត្តន៍និងសហការស្រាវជ្រាវបង្ក្រាបជាបន្ដបន្ទាប់ ៖
ស្រុកគងពិសី ថ្ងៃទី០២ កញ្ញា ២០១៩ វេលាម៉ោង៩និង១០នាទីព្រឹក នៅចំណុចភូមិត្រពាំងពោធិ ឃុំវាល កម្លាំងអធិការដ្ឋាននគរបាលស្រុកគងពិសី បានបង្ក្រាបមុខសញ្ញាសង្ស័យពាក់ព័ន្ធករណីការរក្សាទុកសាធាតុញៀន ១នាក់ ឈ្មោះ វង់ សុធារ៉ា ភេទ ប្រុស អាយុ ២៨ឆ្នាំ នៅភូមិត្រពាំងពោធិ ឃុំវាល ស្រុកគងពិសី ដកហូតវត្ថុតាងម្សៅក្រាមពណ៌សថ្លាសង្ស័យជាគ្រឿងញៀន ១កញ្ចប់,ជញ្ជីងថ្លឹងអេឡិចត្រូនិច ១គ្រឿង, ម៉ូតូ ១គ្រឿង, ទូរស័ព្ទដៃ ៤គ្រឿង, អាវុធកែច្នៃ ១ គ្រឿង, ដាវ ១ គ្រឿងរួមនឹងឧបករណ៍ប្រើប្រាស់គ្រឿងញៀនមួយចំនួន។
ស្រុកសំរោងទង ថ្ងៃទី០៣កញ្ញា២០១៩ វេលាម៉ោង១១និង០០នាទី នៅចំណុចភូមិបុស្សតានៃ ឃុំកាហែង កម្លាំងអធិការដ្ឋាននគរបាលស្រុកសំរោងទង បានបង្ក្រាបមុខសញ្ញាសង្ស័យពាក់ព័ន្ធករណីរក្សាទុកសារធាតុញៀន ២នាក់ឈ្មោះ ហៀង វ៉ាន់នី ហៅ ធិញ ប្រុស អាយុ ៣៧ឆ្នាំ នៅភូមិរំលិច ឃុំកាហែង និងឈ្មោះ យឿង ស៊ីថៃ ប្រុស អាយុ ៣៤ឆ្នាំ នៅភូមិពង្រ សង្កាត់កណ្ដោលដុំ ក្រុងច្បារមន ។ ដកហូតម្សៅក្រាមពណ៌សថ្លាសង្ស័យជាគ្រឿងញៀន ៣កញ្ចប់, ម៉ូតូ ១ គ្រឿងនិងទូរស័ព្ទដៃ ២គ្រឿង។
ក្រុងច្បារមន ថ្ងៃទី០៤ កញ្ញា ២០១៩ វេលាម៉ោង១០និង៤០នាទី នៅចំណុចភូមិផ្សារចាស់ សង្កាត់ស្វាយក្រវ៉ាន់ កម្លាំងអធិការដ្ឋាននគរបាលក្រុងច្បារមន បង្ក្រាបមុខសញ្ញាសង្ស័យពាក់ព័ន្ធករណីរក្សាទុកសារធាតុញៀន ៤នាក់ ស្រី ១នាក់ឈ្មោះ ភោគ សារក្ស ប្រុស អាយុ ៣៨ឆ្នាំ នៅភូមិត្រស់ សង្កាត់ស្វាយក្រវ៉ាន់ ឈ្មោះ ឆែម ណាង ប្រុស អាយុ ២៧ឆ្នាំ នៅភូមិក្រាំងពលទេព សង្កាត់រកាធំ ឈ្មោះ ផាត់ សៀកឡេង ប្រុស អាយុ ២៥ឆ្នាំ នៅភូមិរំលិច ឃុំរលាំងគ្រើល ស្រុកសំរោងទង និង ឈ្មោះ ទូច ផាន់នី ស្រី អាយុ ៣១ឆ្នាំ នៅភូមិផ្សារចាស់ សង្កាត់ស្វាយក្រវ៉ាន់។ ដកហូតម្សៅក្រាមពណ៌សថ្លាសង្ស័យជាគ្រឿងញៀន ១៧កញ្ចប់, ម៉ូតូ ១ គ្រឿង និងទូរស័ព្ទដៃ ៥គ្រឿង។
បច្ចុប្បន្នមុខសញ្ញាសង្ស័យ រួមជាមួយវត្ថុតាងបានស្រុក-ក្រុង បានសាកសួរនិងបញ្ជូនទៅកាន់ការិយាល័យជំនាញខេត្ត កសាងសំណុំរឿងចាត់ការតាមនីតិវិធីច្បាប់៕ ដោយ ៖ កូឡាប
