មេដឹកនាំហុងកុង អ្នកស្រី Carrie Lam បានធ្វើការប្រកាសដកច្បាប់ធ្វើបត្យាប័នចេញទាំងស្រុង ដែលច្បាប់នេះបង្កើតឲ្យមានការផ្ទុះការតវ៉ាពីសំណាក់ប្រជាជនហុងកុង អស់រយៈពេលជាង ៣ខែ។ ច្បាប់នេះអនុញ្ញាតឲ្យមានការបញ្ជូនខ្លួនជនសង្ស័យ ពីទីក្រុងហុងកុងទៅធ្វើការកាត់ទោសនៅប្រទេសចិនបាន។
ទោះយ៉ាងណា ការសម្រេចចិត្តដកច្បាប់ដ៏ចម្រូងចម្រាស់នេះចេញ គ្រាន់តែជាការទាមទារមួយប៉ុណ្ណោះ ក្នុងចំណោមការទាមទារ ៥ចំណុចរបស់ក្រុមបាតុករ។
“ពួកយើងត្រូវតែស្វែងរកវិធីដើម្បីដោះស្រាយបញ្ហា នៃការមិនពេញចិត្ត នៅក្នុងសង្គម និងស្វែងរកដំណោះស្រាយ”។ នេះជាការបញ្ជាក់របស់អ្នកស្រី នៅក្នុងវីដេអូកាលពីថ្ងៃពុធល្ងាចម្សិលមិញនេះ។
ប៉ុន្តែអ្នកស្រីបដិសេធមិនផ្តល់តាមការទាមទារ ៤ចំណុចទៀតរបស់ក្រុមបាតុករ រួមមានការបង្កើតឲ្យមានប្រជាធិបតេយ្យទូលំទូលាយជាងមុន ការបង្កើតគណៈកម្មការឯករាជ្យ ដើម្បីស៊ើបអង្កេតលើការប្រព្រឹត្តរបស់ប៉ូលីសជាដើម។ អ្នកស្រីបញ្ជាក់ថា រាល់ការស៊ើបអង្កេតនឹងត្រូវធ្វើឡើង ដោយក្រុមប្រឹក្សាបណ្តឹងប៉ូលីសឯករាជ្យដែលមានស្រាប់។
សូមបញ្ជាក់ថា កាលពីខែមិថុនា មេដឹកនាំហុងកុងបានប្រកាសព្យួរច្បាប់ធ្វើបត្យាប័ន ក្រោយពេលមនុស្សជាង ១លាននាក់បានធ្វើការហែក្បួន ក្នុងទីក្រុងប្រឆាំងនឹងច្បាប់នោះ។ ការប្រកាសព្យួរច្បាប់នោះ មិនទាន់បំពេញចិត្តបាតុករនៅឡើយទេ ដោយពួកគេទាមទារឲ្យមានការបោះបង់ចោលច្បាប់នោះទាំងស្រុង។
សកម្មជនវ័យក្មេងដ៏លេចធ្លោម្នាក់ឈ្មោះ Joshua Wong បានសរសេរនៅក្នុងបណ្តាញសង្គមរបស់លោកថា “ការបរាជ័យម្តងហើយម្តងទៀតរបស់អ្នកស្រី Carrie Lam ក្នុងការស្វែងយល់ពីស្ថានភាព បានធ្វើឲ្យសេចក្តីប្រកាសរបស់អ្នកស្រី មិនមានភាពពេញលេញទេ”។ អ្នកស្រីត្រូវតែដោះស្រាយការទាមទារទាំង ៥ រួមមាន បញ្ឈប់ការកាត់ទោស ឈប់ហៅពួកយើងថាជាកុប្បករ ការស៊ើបអង្កេតឯករាជ្យរបស់ប៉ូលីស និងការបោះឆ្នោតដោយសេរី៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
