ខេត្តព្រះសីហនុ៖ មន្ត្រីព័ត៌មានសាធារណៈ របស់កងទ័ពជើងទឹកកម្ពុជា បានឲ្យដឹងថា កាលពីម៉ោង ៩ និង២០នាទី ព្រឹកថ្ងៃទី ៥ ខែកញ្ញា ឆ្នាំ២០១៩នេះ នាវាចម្បាំកងទ័ពជើងទឹកប្រទេសឥណ្ឌាចំនួន ២គ្រឿង បានចូលចតកំពង់ផែក្រុងព្រះសីហនុ សម្រាប់ដំណើរទស្សនកិច្ចជាមិត្តភាព នៅកម្ពុជាចំនួន៤ថ្ងៃ នៅកម្ពុជា។
នាវានេះ ចូលចតនៅកំពង់ផែក្រុងព្រះសីហនុ ចាប់ពីថ្ងៃទី៥ ដល់ថ្ងៃទី៨ ខែកញ្ញា ឆ្នាំ២០១៩។
កាលពីព្រឹកមិញនេះ នៅកំពង់ផែ ក្រុងព្រះសីហនុ ឃើញមានប្រតិភូនាវាចម្បាំកងទ័ពជើងទឹកកម្ពុជា បានមកទទួលស្វាគមន៍នាវាកងទ័ពជើងទឹកប្រទេសឥណ្ឌា ដោយរាក់ទាក់ ពីមន្ត្រីជាន់ខ្ពស់កងទព័ជើងទឹកកម្ពុជាមូលដ្ឋានសមុទ្រ។
សមត្ថកិច្ចចម្រុះ ព្រមទាំងអាជ្ញាធរស៊ីវិល នៃរដ្ឋបាលខេត្តព្រះសីហនុ ក៏បានបង្ហាញវត្តមានជាច្រើនកុះករផងដែរ។
តាមសេចក្តីប្រកាសព័ត៌មាន របស់កងទ័ពជើងទឹកកម្ពុជា បានឲ្យដឹងថា នាវាទាំងពីរគ្រឿងរួមមាន៖
នាវាឈ្មោះ INS KILTAN ជាប្រភេទនាវាប្រឆាំងនាវាមុជទឹក មានបណ្តោយប្រវែង 110 m,ទទឹងប្រវែង 12,8 m, ជម្រៅទឹក 07 m , ទម្ងន់ផ្ទុក3150 តោន និងនាវាឈ្មោះ INS SAHYADRI ជាប្រភេទនាវាចម្បាំងបំពាក់មីស៊ីល មានបណ្តោយប្រវែង 143 m, ទទឹងប្រវែង 17m, ជម្រៅទឹក 07 m, ទម្ងន់ផ្ទុក 6200 តោន និងមាននាវិកសរុបទាំងអស់ចំនួន 508នាក់។ ហើយថា នាវាខាងលើនេះ ដឹកនាំដោយលោក វរនាវីឯក Ashwin Arvind។
សេចក្តីប្រកាសព័ត៌មានដដែលបញ្ជាក់ថា ក្នុងរយៈពេលបំពេញទស្សនកិច្ចនៅកម្ពុជា មេបញ្ជាការនាវាឥណ្ឌា នឹងមានជំនួបលក្ខណៈមិត្តភាពជាមួយថ្នាក់ដឹកនាំខេត្តព្រះសីហនុ ,ជំនួបជាមួយមេបញ្ជាការកងទ័ពជើងទឹក និងមានកម្មវិធីកិច្ចសហប្រតិបត្តិការមួយចំនួនទៀត រវាងកងទ័ពជើងទឹកកម្ពុជា និងកងនាវិកលើនាវាខាងលើនេះផងដែរ៕ ដោយ៖ ដែន សីមា
