ភ្នំពេញ ៖ បើតាមលោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់បានឲ្យដឹងនៅថ្ងៃទី៥ ខែកញ្ញា ឆ្នាំ ២០១៩នេះ ថា រាជរដ្ឋាភិបាលចេញ សជណ ហើយបន្ទាប់ពីសមាជិកឧត្តមក្រុមប្រក្សាពិគ្រោះ និងផ្ដល់យោបល់ ពីគណបក្សខ្មែរក្រោក បានរកឃើញ និងធ្វើរបាយការណ៍ជូនរដ្ឋាភិបាលរួចមក ពីករណីអាជ្ញាធរខេត្តកណ្ដាលអនុវត្តន៍ច្បាប់មិនត្រឹត្រូវ ដោយយកអេស្កាវាទ័រ ឈូសឆាយដំណាំពលរដ្ឋ ដើម្បីយកដី និងករណីរដ្ឋបាលខេត្តកំពង់ឆ្នាំង អនុវត្តន៍ច្បាប់មិនប្រក្រតីយកដីរបស់រដ្ឋដែលត្រូវធ្វើ ផ្សារ ធ្វើសួនសាធារណៈ យកទៅឲ្យក្រុមហ៊ុនឯកជន។
បើតាម សជណ លេខ ១២៩៥ ពីទីស្ដីការគណៈរដ្ឋមន្ត្រី បណ្ឌិតសភាចារ្យ ហ៊ីង ថូរ៉ាក់ស៊ី រដ្ឋលេខាធិការប្រចាំការ ជ.រដ្ឋមន្រ្តីទទួលបន្ទុកទីស្ដីការគណៈរដ្ឋមន្ត្រី ជម្រាបជូន សម្ដេច ក្រឡាហោម ឧបនាយករដ្ឋមន្ត្រី រដ្ឋមន្រី្តក្រសួងមហាផ្ទៃ មេត្តាជ្រាបថា រាជរដ្ឋាភិបាលឯកភាពប្រគល់ជូនក្រសួងមហាផ្ទៃ ពិនិត្យនូវភាពមិនប្រក្រតី នៃការអនុវត្តច្បាប់ស្ដីពីអស្យាមិនករណ៍ និងអនុក្រឹត្យលេខ ៩៣ អនក្រ.បក ចុះថ្ងៃទី១១ ខែកក្កដា ឆ្នាំ២០១៩ លើដីភូមិកោះរះក្រោម ឃុំកោះរះ ស្រុកល្វាឯម ខេត្តកណ្ដាល ដែលបានលើកឡើងដោយគណបក្សខ្មែរក្រោក។
បើតាម សជណ លេខ ១២៩៦ ពីទីស្ដីការគណៈរដ្ឋមន្ត្រី បណ្ឌិតសភាចារ្យ ហ៊ីង ថូរ៉ាក់ស៊ី រដ្ឋលេខាធិការប្រចាំការ ជ.រដ្ឋមន្រ្តីទទួលបន្ទុកទីស្ដីការគណៈរដ្ឋមន្ត្រី ជម្រាបជូន លោកឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ,លោករដ្ឋមន្រ្តីក្រសួងធនធានទឹក និងឧតុនិយម ពាក់ព័ន្ធនឹងភាពមិនប្រក្រតី នៃការអនុវត្តអនុក្រឹត្យលេខ ១៨៣ អនក្រ.បក ចុះថ្ងៃទី០២ ខែកញ្ញា ឆ្នាំ២០១៦ដែលបានលើកឡើងដោយប្រធានប្រតិភូគណបក្សខ្មែរក្រោក រាជរដ្ឋាភិបាលឯកភាពប្រគល់ជូន លោកឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោក រដ្ឋមន្រ្តីក្រសួងធនធានទឹក និងឧតុនិយម ពិនិត្យដោះស្រាយ៕ដោយ:កូឡាប
