ខេត្តស្វាយរៀង៖លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា និងលោក ម៉ែន វិបុល អភិបាល នៃគណៈអភិបាលខេត្តស្វាយរៀង នៅព្រឹកថ្ងៃទី៥ ខែកញ្ញា ឆ្នាំ២០១៩នេះ បានអញ្ជើញចូលរួមក្នុងកិច្ចប្រជុំ ពិភាក្សាការងារជាមួយប្រតិភូអន្តរក្រសួង ស្ថាប័ន នៅសាលប្រជុំសាលាខេត្តស្វាយរៀង។
មន្ត្រីសាលាខេត្តស្វាយរៀងបានឱ្យដឹងថាៈគោលបំណង នៃកិច្ចប្រជុំពិភ្សានេះ បានជជែកអំពីស្ថានភាពជាក់ស្តែង នៃសកម្មភាពវិនិយោគ និងពាណិជ្ជកម្មនៅខេត្តស្វាយរៀង សម្រាប់ជាមូលដ្ឋាន ក្នុងការរៀបចំដាក់ចេញនូវយន្តការ ពិសេសសម្រាប់ទាក់ទាញការវិនិយោគឲ្យកាន់តែច្រើន តាមរយៈជាអាទិ៍ ការរៀបចំតំបន់សេដ្ឋកិច្ចពិសេសនៅតាមជាយដែន ដោយយោងតាមស្មារតី និងលទ្ធផលនៃវេទិការាជរដ្ឋាភិបាល និងផ្នែកឯកជន ក្រោមអធិបតីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជានាពេលកន្លងទៅ។
ប្រភពខាងលើបានបន្តទៀតថាៈ កិច្ចប្រជុំពិភាក្សានេះ បានផ្តោតទៅលើបញ្ហាមួយចំនួនដូចជា ការរៀបចំឲ្យមានតំបន់សេដ្ឋកិច្ចពិសេស តាមជាយដែនបន្ថែមទៀត។ ការតភ្ជាប់បណ្តាញ និងផ្គត់ផ្គង់អគ្គិសនីនៅក្នុងតំបន់សេដ្ឋកិច្ចពិសេសទាំងនោះ ។ ការកំណត់នូវវិស័យឧស្សាហកម្មដែលត្រូវទាក់ទាញ និងការរៀបចំឡើងវិញនូវការលើកទឹកចិត្តដល់ការវិនិយោគ។ ការរៀបចំបង្កើនការសម្រួលពាណិជ្ជកម្ម និងសម្រួលផ្នែកឡូជីស្ទីកនៅតាមជាយដែន ឬតំបន់សេដ្ឋកិច្ចពិសេស ព្រមទាំងបញ្ហាប្រឈមមួយចំនួន ដែលកំពុងកើតមានឡើងពាក់ព័ន្ធនឹងការងារនេះ។ ការយកចិត្តទុកដាក់ទៅលើបរិស្ថាន ការរៀបចំប្រព័ន្ធលូ អាងចម្រោះទឹកកង្វក់ ការកែច្នៃកាកសំណល់រឹងវាវ ដែលចេញពីរោងចក្រឲ្យមានស្តង់ដារ។
ជាមួយគ្នានេះ លោក សុខ ចិន្តាសោភា ក៏បានស្នើឲ្យភាគីពាក់ព័ន្ធទាំងអស់ មេត្តាបង្កើនការខិតខំប្រឹងប្រែងបន្ថែមទៀត ដើម្បីសម្រួលប្រតិបត្តិការនៃគម្រោងវិនិយោគបច្ចុប្បន្ន សំដៅទាក់ទាញអ្នកវិនិយោគបរទេសបន្ថែម មកបណ្តាក់ទុននៅតាមតំបន់ជាយដែនរបស់កម្ពុជាក៏ដូចជានៅខេត្តស្វាយរៀង។
ដល់ពេលរសៀលថ្ងៃដដែល គណៈប្រតិភូអន្តរក្រសួងស្ថាប័ន អមដំណើរដោយអាជ្ញាធរដែនដី និងមន្ទីរពាក់ព័ន្ធ បានចុះទៅពិនិត្យមើលតំបន់សេដ្ឋកិច្ចឧស្សាហកម្មនៅក្រុងបាវិតផងដែរ៕ដោយ៖វ៉ៃកូ
