រាជធានីភ្នំពេញ៖ លោកទេសរដ្ឋមន្ត្រី រដ្ឋមន្ត្រីក្រសួងធម្មការនិងសាសនា បានថ្លែងថា “គ្មានគ្រឿងញៀន គ្មានហិង្សា ជីវិតស្រស់ថ្លាដូចផ្កាត្រូវទឹកសន្សើមពេលព្រឹកព្រលឹម” ត្រូវនិយាយថា ទេចំពោះគ្រឿងញៀន ប្រើប្រាស់គ្រឿងញៀនគឺបំផ្លាញអនាគតផ្ទាល់ ក្រុមគ្រួសារ និង សហគមន៍និងថ្ងៃនេះថ្ងៃស្អែកកុំឲ្យមានគ្រឿងញៀនឲ្យសោះក្នុងមូលដ្ឋានរបស់យើង។
លោកហ៊ឹម ឆែម ទេសរដ្ឋមន្ត្រី រដ្ឋមន្ត្រីក្រសួងធម្មការនិងសាសនាបានថ្លែងបែបនេះ នៅថ្ងៃទី៥ ខែកញ្ញា ឆ្នាំ២០១៩ ក្នុងឱកាសអញ្ជើញជាអធិបតីក្នុងពិធីសំណេះសំណាលជាមួយបងប្អូនកំពុងបន្សាបគ្រឿងញៀន នៅមជ្ឈមណ្ឌលឱកាសខ្ញុំ ។ គួរបញ្ជាក់ផងដែរថា ក្នុងចំណោមជនរងគ្រោះទាំងអស់មានអ្នកកាន់សាសនាផ្សេងៗរួមមាន៖ ព្រះពុទ្ធសាសនាចំនួន ១.៨១៦នាក់ ក្នុងនោះស្ត្រី១១៥នាក់ សាសនាអ៊ីស្លាមចំនួន៦៤នាក់ និងសាសនាគ្រឹះចំនួន ២៤នាក់ ក្នុងនោះស្ត្រី២នាក់។
ជាមួយគ្នានេះដែរលោកទេសរដ្ឋមន្ត្រី បានមានប្រសាសន៍ថា ថ្នាក់ដឹកនាំរដ្ឋាភិបាល នៃព្រះរាជាណាចក្រកម្ពុជាតែងតែគិតគូរ និងយកចិត្តទុកដាក់ជានិច្ច ចំពោះប្រជាពលរដ្ឋនៅទូទាំងព្រះរាជាណាចក្រកម្ពុជា ជាពិសេសបងប្អូន ដែលកំពុងបន្សាបគ្រឿងញៀននៅទីនេះផងដែរ។
លោកទេសរដ្ឋមន្ត្រី បានមានប្រសាសន៍ថា ក្នុងគោលបំណងបង្ការ ទប់ស្កាត់ បង្ក្រាប និងដោះស្រាយឱ្យកាន់តែមានប្រសិទ្ធភាពនូវរាល់បញ្ហា ដែលមានការពាក់ព័ន្ធនឹងគ្រឿងញៀន ក៏ដូចជាដើម្បីរក្សាសន្តិសុខ សណ្តាប់ធ្នាប់សាធារណៈ និងការអភិវឌ្ឍជូនប្រជាជន និងសង្គមជាតិ រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងអាជ្ញាធរជាតិប្រយុទ្ធប្រឆាំងគ្រឿងញៀន បានយកចិត្តទុកដាក់ដឹកនាំសម្របសម្រួល និងអនុវត្តប្រកបដោយការទទួលខុសត្រូវនូវផែនការយុទ្ធសាស្ត្រជាតិ ស្តីពីការត្រួតពិនិត្យគ្រឿងញៀន និងផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៤ ។
ក្នុងនាមក្រសួងធម្មការនិងសាសនា លោកទេសរដ្ឋមន្ត្រី បានផ្តល់អនុសាសន៍មួយចំនួនដូចខាងក្រោម៖ សូមឱ្យមន្ត្រីអនុវត្តច្បាប់គ្រប់លំដាប់ថ្នាក់ ត្រូវអនុវត្តឱ្យបានម៉ឺងម៉ាត់ចំពោះបទល្មើសគ្រឿងញៀនទាំងឡាយ ដើម្បីធ្វើយ៉ាងណាលុបបំបាត់ការប្រើប្រាស់ និងការជួញដូរគ្រឿងញៀនតាមគ្រប់រូបភាពនៅព្រះរាជាណាចក្រកម្ពុជា។ សូមឱ្យប្រជាពលរដ្ឋកម្ពុជាទាំងអស់ ចូលរួមគោរពច្បាប់ស្តីពីការប្រឆាំងនឹងការជួញដូរ និងគ្រឿងញៀនទាំងអស់គ្នា ព្រមទាំងចូលរួមទប់ស្កាត់ និងបង្ក្រាបនូវរាល់ទម្រង់នៃការជួញដូរ និងប្រើប្រាស់គ្រឿងញៀនគ្រប់ប្រភេទ។ សូមឱ្យបងប្អូន ដែលកំពុងបន្សាបគ្រឿងញៀនទាំងអស់ កែប្រែខ្លួនទៅជាមនុស្សល្អសម្រាប់គ្រួសារ និងសង្គមជាតិ ព្រមទាំងចូលរួមផ្សព្វផ្សាយដល់អ្នកផ្សេងទៀត អំពីគុណវិបត្តិនៃការប្រើប្រាស់គ្រឿងញៀនឱពួកគេបានយល់ដឹង។ សូមឱ្យបងប្អូន ដែលកំពុងបន្សាបគ្រឿងញៀនទាំងអស់ ខិតខំសិក្សាវិជ្ជាជីវៈដែលមជ្ឈមណ្ឌលបានបង្រៀន ដើម្បីទទួលបាននូវមុខរបរសុច្ចរិតមួយ សម្រាប់ចិញ្ចឹមជីវិតនៅថ្ងៃអនាគត៕ ដោយ៖បញ្ញាស័ក្តិ
