ភ្នំពេញ ៖ គណៈកម្មាធិការសិទ្ធិមនុស្សកម្ពុជា នៅថ្ងៃទី៥ ខែកញ្ញានេះ បានចេញសេចក្តីប្រកាសព័ត៌មាន ស្តីពីលទ្ធផលកិច្ចអន្តរាគមន៍ផ្នែកមនុស្សធម៌ និងជំនួយផ្នែកច្បាប់របស់ គណៈកម្មាធិការសិទ្ធិមនុស្សកម្ពុជា ក្នុងករណីសំណុំរឿងជនជាប់ឃុំ ពេជ្រ សូណែត ពាក់ព័ន្ធនឹងសំណុំរឿងចំនួន 9ផ្សេងគ្នា ដែលត្រូវផ្តន្ទាទោសជាប់គុកជាង 160 ឆ្នាំ។
ក្រោមកិច្ចខិតខំប្រឹងប្រែងរបស់ ក្រុមមេធាវីសិទ្ធិមនុស្ស នៃគណៈកម្មាធិការសិទ្ធិមនុស្សកម្ពុជា ក្នុងការការពារក្តីជូនពិរុទ្ធជនឈ្មោះ ពេជ្រ សូណែត សាលាឧទ្ធរណ៍ បានធ្វើការប្រកាសនូវសាលដីការបស់ខ្លួន នៅព្រឹកថ្ងៃទី៥ ខែកញ្ញា ឆ្នាំ២០១៩ នេះ ដោយសម្រេចឱ្យ ឈ្មោះ ពេជ្រ សូណែត រួចផុតបទចោទចំនួន៨សំណុំរឿង។ ដូច្នេះសរុបទោសដែលពិរុទ្ធជន ពេជ្រ សូណែត ជាប់តាមការសម្រេចរបស់សាលាឧទ្ធរណ៍មាន ២សំណុំរឿងដែលមានទោសសរុបចំនួន១៩ឆ្នាំ។
សេចក្តីប្រកាសព័ត៌មាន បានឲ្យដឹងថានៅក្នុងពិធីចុះសួរសុខទុក្ខស្ត្រីជាប់ឃុំនៅមណ្ឌលអប់រំកែប្រែទី២ (ម២) រាជធានីភ្នំពេញ កាលពីថ្ងៃទី៧ ខែមីនា ឆ្នាំ២០១៩កន្លងទៅ ប្រតិភូគណៈកម្មាធិការសិទ្ធិមនុស្សកម្ពុជា ដឹកនាំដោយលោកកែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា រួមជាមួយតំណាងក្រសួងយុត្តិធម៌ ក្រសួងកិច្ចការនារី និងក្រុមមេធាវីស្ម័គ្រចិត្តសម្តេចតេជោសែន បានជួបជាមួយស្ត្រីជាប់ឃុំមួយរូបឈ្មោះ ពេជ្រ សូណែត ដែលមានកូនប្រុសនៅជាមួយអាយុ៣ឆ្នាំ និងមានសាលក្រមផ្តន្ទាទោស៩សំណុំរឿងផ្សេងគ្នា ដែលទោសសរុបបញ្ចូលគ្នាមានរហូតដល់១៦៦ឆ្នាំ ដោយមិនទាន់ធ្វើការស្របទោសបញ្ចូលគ្នា។ ដោយមានក្តីអាណិតអាសូរនិងផ្អែកលើគោលការណ៍មនុស្សធម៌ ក៏ដូចជាគោលការណ៍សិទ្ធិមនុស្ស លោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា បានសម្រេចជួយធ្វើអន្តរាគមន៍ផ្នែកមនុស្សធម៌ និងផ្តល់នូវជំនួយផ្នែកច្បាប់ដល់ស្ត្រីជាប់ឃុំឈ្មោះ
ពេជ្រ សូណែត និងទទួលបាននូវលទ្ធផលដូចខាងក្រោម ៖
ក្នុងកិច្ចអន្តរាគមន៍ផ្នែកមនុស្សធម៌ គណៈកម្មាធិការសិទ្ធិមនុស្សកម្ពុជា បានធ្វើការទំនាក់ទំនងជាមួយអង្គការដៃគូផ្សេងៗ ដែលមានលក្ខណៈសម្បត្តិគ្រប់គ្រាន់ ដើម្បីទទួលយកកូនប្រុសអាយុ៣ឆ្នាំរបស់ស្ត្រីជាប់ឃុំ ពេជ្រ សូណែត ទៅចិញ្ចឹមបីបាច់ថែរក្សា ផ្តល់ការអប់រំ និងរស់នៅក្នុងបរិយាកាសដែលប្រសើរ។ ជាលទ្ធផលក្រោមការសម្របសម្រួលពីគណៈកម្មាធិការសិទ្ធិមនុស្សកម្ពុជា ជាមួយគ្រប់ភាគីពាក់ព័ន្ធ កុមារាដែលជាកូនរបស់ស្ត្រីជាប់ឃុំ ត្រូវបានប្រគល់ជូនទៅអង្គការ “ការអភិវឌ្ឍន៍កុមារកម្ពុជា” ស្ថិតនៅភូមិព្រែកត្រែង ឃុំសិត្បូ ស្រុកស្អាង ខេត្តកណ្តាល ដើម្បីចិញ្ចឹមបីបាច់ថែរក្សា និងផ្តល់ការអប់រំ កាលពីថ្ងៃទី២ ខែកក្កដា ឆ្នាំ២០១៩។ ចំពោះការផ្តល់ជំនួយផ្នែកច្បាប់ក្នុងសំណុំរឿងនេះ ដោយមានការស្នើសុំពីស្ត្រីជាប់ឃុំ ពេជ្រ សូណែត កាលពីថ្ងៃទី២២ ខែកក្កដា ឆ្នាំ២០១៩ គណៈកម្មាធិការសិទ្ធិមនុស្សកម្ពុជា បានផ្តល់នូវមេធាវី២រូប នៃក្រមមេធាវីសិទ្ធិមនុស្សនៃគណៈកម្មាធិការសិទ្ធិមនុស្សកម្ពុជា គឺលោកមេធាវី ខៀវ តុលា និងលោកស្រីមេធាវី លឹមច័ន្ទលីដា ដើម្បីធ្វើការការពារក្តីជូនពិរុទ្ធជនរូបនេះ ក្នុងដំណើរការនីតិវិធីបន្តនៅសាលាឧទ្ធរណ៍។
ពិរុទ្ធជន ពេជ្រ សូណែត ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសដាក់ពន្ធនាគារ សរុបចំនួន ១៦៦ឆ្នាំ ទៅលើ៩សំណុំរឿង កាលពីអំឡុងឆ្នាំ២០១៧ ពីបទលួចមានស្ថានទម្ងន់ទោស ដោយសារការប្រព្រឹត្តហិង្សា (ប្លន់ម៉ូតូ) និងដោយសារមានមរណភាពនៃជនរងគ្រោះ ការកាន់កាប់អាវុធដោយគ្មានការអនុញ្ញាត ហើយត្រូវបានពិរុទ្ធជនរូបនេះ ប្តឹងឧទ្ធរណ៍ទៅនឹងសាលក្រមទាំង៩ខាងលើ នៅក្នុងអំឡុងឆ្នាំ២០១៧ នេះដែរ។ គិតមកដល់ថ្ងៃបើកសវនាការនៅសាលាឧទ្ធរណ៍ កាលថ្ងៃទី៧ ខែសីហា ឆ្នាំ២០១៩ ឈ្មោះ ពេជ្រ សូណែត ត្រូវបានឃុំខ្លួនចំនួន៣ឆ្នាំ ៧ខែ និង២២ថ្ងៃ (ថ្ងៃឃុំខ្លួន១៦ ខែធ្នូ ឆ្នាំ២០១៥)។
ជាលទ្ធផល ក្រោមកិច្ចខិតខំប្រឹងប្រែងរបស់ ក្រុមមេធាវីសិទ្ធិមនុស្ស នៃគណៈកម្មាធិការសិទ្ធិមនុស្សកម្ពុជា ក្នុងការការពារក្តីជូនពិរុទ្ធជនឈ្មោះ ពេជ្រ សូណែត សាលាឧទ្ធរណ៍ បានធ្វើការប្រកាសនូវសាលដីការបស់ខ្លួន នៅព្រឹកថ្ងៃទី៥ ខែកញ្ញា ឆ្នាំ២០១៩ នេះ ដោយសម្រេចឱ្យ ឈ្មោះ ពេជ្រ សូណែត រួចផុតបទចោទចំនួន៨សំណុំរឿង ពីករណីលួចមានស្ថានទម្ងន់ទោសដោយសារការប្រព្រឹត្តអំពើហិង្សា និងដោយសារមរណភាពនៃជនរងគ្រោះ (ប្លន់យកម៉ូតូ និងសម្លាប់ជនរងគ្រោះ) កាន់កាប់អាវុធដោយគ្មានការអនុញ្ញាតលើ៩សំណុំរឿងដែលសាលាដំបូងបានផ្តន្ទាទោសជាប់ពន្ធនាគារចំនួន១៦៦ឆ្នាំ។ ក្នុងចំណោម ៨សំណុំរឿងនោះ មាន១សំណុំរឿង បានប្តូរបទចោទមកបទល្មើស មិនបរិហារពីបទល្មើសផ្ដន្ទាទោសចំនួន១ឆ្នាំ ហើយចំណែកឯសំណុំរឿង១ទៀត ត្រូវបានសាលាឧទ្ធរណ៍ សម្រេចផ្តន្ទាទោសចំនួន១៨ឆ្នាំ។ ដូច្នេះសរុបទោសដែលពិរុទ្ធជន ពេជ្រ សូណែត ជាប់តាមការសម្រេចរបស់សាលាឧទ្ធរណ៍មាន ២សំណុំរឿងដែលមានទោសសរុបចំនួន១៩ឆ្នាំ។
ក្រុមមេធាវីសិទ្ធិមនុស្សនៃគណៈកម្មាធិការសិទ្ធិមនុស្សកម្ពុជា នឹងខិតខំធ្វើការងារបន្ថែមទៀតជាមួយ
ពិរុទ្ធជន ពេជ្រ សូណែត ក្នុងការបន្តនីតិវិធីដាក់ពាក្យបណ្តឹងសារទុក្ខទៅតុលាការកំពូល ដើម្បីស្វែងរកយុត្តិធម៌ជូនជនជាប់ឃុំ ដោយក្រុមមេធាវីយល់ឃើញថា ឈ្មោះពេជ្រ សូណែត មិនមានជាប់ពាក់ព័ន្ធ ជាមួយនឹងអំពើប្លន់ម៉ូតូ និងសម្លាប់ជនរងគ្រោះនោះទេ ហើយពិរុទ្ធជន ពេជ្រ សូណែត ក៏បានបដិសេធនូវ ការសម្រេចរបស់សាលាឧទ្ធរណ៍ផងដែរ។
គណៈកម្មាធិការសិទ្ធិមនុស្សកម្ពុជា ក៏សូមថ្លែងអំណរគុណផងដែរ ចំពោះកិច្ចសហការ និងគាំទ្រពីគ្រប់ភាគីពាក់ព័ន្ធ ក្នុងកិច្ចអន្តរាគមន៍ផ្នែកមនុស្សធម៌ និងជំនួយផ្នែកច្បាប់ រួមមាន ក្រសួងយុត្តិធម៌ និងសាលាឧទ្ធរណ៍ ក្នុងកិច្ចដំណើរការពនឿននីតិវិធីនៃសំណុំរឿង ព្រមទាំងអង្គការ “ការអភិវឌ្ឍន៍កុមារកម្ពុជា” ដែលបានទទួលចិញ្ចឹមបីបាច់ថែរក្សា និងផ្តល់ការអប់រំ ដល់កុមារាដែលជាកូនរបស់ស្ត្រីជាប់ឃុំ។
លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា រកឃើញថា នៅមណ្ឌលអប់រំកែប្រែទី២ ហៅកាត់ថា “ម២” មានស្ត្រីម្នាក់ជាប់ឃុំដោយសារមានទោសច្រើនបូកផ្សំបញ្ចូលគ្នាសរុបរហូតដល់ជាប់ទោស១៦៦ឆ្នាំ ។ អ្វីដែលសំខាន់គឺបញ្ហាកូននៅជាមួយ។
លោក កែវ រ៉េមី សរសេរតាមបណ្តាញសង្គម Facebook ថា “ក្រោយពីចុះសួរសុខទុក្ខនៅមណ្ឌលអប់រំកែប្រែ ម២ មក ។ យើងបានឃើញស្ត្រីម្នាក់ជាប់ឃុំដោយសារមានទោសច្រើនបូកផ្សំបញ្ចូលគ្នាសរុបរហូតដល់ជាប់ទោស១៦៦ឆ្នាំ។ អ្វីដែលសំខាន់គឺ បញ្ហាកូននៅជាមួយ”។
លោក បន្តថា “ខ្ញុំពិតជាអាណិត និង រន្ធត់ក្នុងចិត្តខ្លាំងណាស់ដែលចាំបាច់ត្រូវខិតខំរកអង្គការណាដែលមានលក្ខណ:សម្បត្តិគ្រប់គ្រាន់ដែលទទួលយកក្មេងនោះ ហើយដែលអាចផ្តល់ទាំងអាហារនិងចំណេះដល់ក្មេងបាន។ ខ្ញុំសូមអរគុណជាអនេកប្បការដល់ លោកស្រី ឈូក សីហា នាយិការនៃអង្គការ “ការអភិវឌ្ឍន៍កុមារកម្ពុជា” ដែលស្ម័គ្រចិត្តទទួលយកក្មេងនោះ ។ សូមអរគុណផងដែរដល់មន្ត្រី ថ្នាក់ដឹកនាំទាំងអស់នៅក្នុង ម២ និងសហការីរបស់ខ្ញុំដែលបានខិតខំប្រឹងប្រែងដោះស្រាយបញ្ហានេះដោយមានប្រសិទ្ធិភាព ។ សូមអំពាវនាវដល់មាតាបិតាកុំប្រព្រឹត្តិល្មើសនឹងច្បាប់ ដែលធ្វើអោយប៉ះពាល់ដល់អនាគតកូន៕ ដោយ៖កូឡាប
