អ្នកកាសែតជនជាតិអូស្ត្រាលីម្នាក់ ត្រូវគេច្រឡំគិតលុយចំនួន ៧០.០០០ដុល្លារដោយគ្រាន់តែកំម្មង់ស្រាបៀរមួយដប នៅសណ្ឋាគារមួយស្ថិតក្នុង ប្រទេសអង់គ្លេស។
លោក Peter Lalor ដែលជាអ្នកសរសេរព័ត៌មានខាងកីឡាក្រីខីត (cricket) បានកំម្មង់ស្រាបៀរមួយដបតម្លៃ ៥,៥ផោននៅសណ្ឋាគារ Malmaison មុនពេលគាត់បានដឹងខ្លួនថា គាត់ត្រូវគេគិតលុយអស់ចំនួន ៦៧.៧៨៣ដុល្លារ។
លោក Peter Lalor ដែលមកទីក្រុង Manchester ដើម្បីយកព័ត៌មានលើព្រឹត្តិការណ៍ Ashes series បានសម្តែងការជឿជាក់ថា គាត់ប្រហែលជាផឹកស្រាដែលមានតម្លៃថ្លៃបំផុតក្នុងលោក។
ក្រោយពេលមានការភាន់ច្រឡំ អ្នកនាំពាក្យសណ្ឋាគារបានធ្វើការសុំទោស និងថ្លែងថា កំពុងមានការស៊ើបអង្កេត។
ទោះយ៉ាងណា លុយចំនួនជិត ៧០.០០០ដុល្លារ ត្រូវបានកាត់ចេញពីគណនេយ្យធនាគាររបស់លោក ហើយគាត់បាននិយាយថា គាត់ត្រូវគេប្រាប់ថាវាត្រូវការរយៈពេល ១០ថ្ងៃដើម្បីដំណើរការសងប្រាក់ត្រឡប់ទៅគាត់វិញ។
អ្នកនាំពាក្យរបស់ក្រុមហ៊ុន Visa បាននិយាយថា ករណីមិនធម្មតានេះ បានបង្ហាញថា វាពិតជាមានសារសំខាន់ខ្លាំងណាស់ក្នុងការពិនិត្យមើលឲ្យបានច្បាស់នូវរាល់ការបង់លុយ និងទទួលលុយ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC