ខេត្តស្វាយរៀងៈ រសៀលថ្ងៃទី០៥ ខែកញ្ញា ឆ្នាំ២០១៩នេះ លោក ម៉ែន វិបុល អភិបាលខេត្តស្វាយរៀង បានអញ្ជើញអមដំណើរ លោកទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា ក្នុងពិធីអញ្ជើញជួបសំណេះសំណាលសាកសួរសុខទុក្ខជាមួយ ពុក ម៉ែ បងប្អូន គ្រួសារអតីតយុទ្ធជន និងប្រគល់ខ្នងផ្ទះដែលជាអំណោយដ៏ថ្លៃថ្លារបស់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនមន្ទីរអង្គភាពនានា ជួយឧបត្ថម្ភគាំទ្រ ស្ថិតនៅដីសម្បទានសង្គមកិច្ចក្នុងភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង ។
មានប្រសាសន៍ទៅកាន់បងប្អូនប្រជាពលរដ្ឋ និងមន្ទីរអង្គភាពនានា លោកទេសរដ្ឋមន្ត្រី បានថ្លែងនូវការកោតសសើរចំពោះលោក លោកស្រីជាប្រធានមន្ទីរអង្គភាពនានា ក្នុងខេត្តស្វាយរៀង ដែលបានយកចិត្តទុកក្នុងការចុះសួសុខទុក តាមខ្នងផ្ទះរួមទាំងការនាំយកនូវកូនឈើហូបផ្លែ ដែលជាដំណាំផ្សេងៗ មកចែកជូននឹងដាំដុះជាមួយបងប្អូនប្រជាពលរដ្ឋនៅទីនេះ តាមអ្វីដែលរដ្ឋបាលខេត្តបានបែងចែក។
តាមរយៈ លោកទេសរដ្ឋមន្ដ្រី គន់ គីម បងប្អូនអតីតយុទ្ធជនដែលកំពុងរស់នៅទីនេះ បានគោរពថ្លែងនូវការដឹងគុណយ៉ាងជ្រាលជ្រៅ គ្មានថ្ងៃបំភ្លេចបានចំពោះសម្តេចតេជោ ហ៊ុន សែន ដែលបានផ្តល់ដីផ្តល់ផ្ទះជូនពួកគាត់ ធ្វើឲ្យជីវភាពរបស់ពួកគាត់ដែលពីមុន មានការខ្វះខាតឥឡូវបានធូរធារមួយកម្រិត និងសូមអរគុណ សម្តេច ដែលតែងតែឲ្យលោកទេសរដ្ឋមន្ដ្រី ចុះសួរសុខទុក្ខ និងដោះស្រាយការលំបាកជូនពួកគាត់គ្រប់ពេលវេលា៕ ដោយ៖វ៉ៃកូ