អតីតប្រធានាធិបតីប្រទេសហ្ស៊ីមបាវ៉េ លោក Robert Mugabe បានទទួលមរណភាព នៅវ័យ ៩៥ឆ្នាំ។ នេះបើតាមការបញ្ជាក់របស់ក្រុមគ្រួសារគាត់ប្រាប់ BBC នៅរសៀលថ្ងៃនេះ។
លោក Robert Mugabe ត្រូវបានបញ្ជូនទៅព្យាបាលនៅក្នុងប្រទេសសិង្ហបុរីតាំងពីខែមេសា។
គាត់ត្រូវបានទម្លាក់ចេញពីដំណែងក្នុងរដ្ឋប្រហារយោធា កាលពីឆ្នាំ ២០១៧ ក្រោយពេលកាន់អំណាចអស់រយៈពេល ៣៧ឆ្នាំមក។
ក្នុងការឡើងកាន់អំណាចដំបូង លោកត្រូវបានគេកោតសរសេរ ប៉ុន្តែនៅឆ្នាំបន្ទាប់ៗទៀត ការកាន់អំណាចរបស់លោកត្រូវបានគេមើលឃើញថា ពោរពេញទៅដោយការរំលោភសិទ្ធិ និងអំពើពុករលួយ។
លោកបានឈ្នះការបោះឆ្នោតប្រធានាធិបតីដំបូង ក្រោយពេលប្រទេសហ្ស៊ីមទទួលបានឯករាជ្យពេញលេញពីប្រទេសអង់គ្លេស និងបានក្លាយជានាយករដ្ឋមន្រ្តីក្នុងឆ្នាំ ១៩៨០។
លោកបានលុបចោលដំណែងនាយករដ្ឋមន្រ្តីក្នុងឆ្នាំ ១៩៨៧ និងបានក្លាយជាប្រធានាធិបតីជំនួសវិញ។
អ្នកស្នងដំណែងរបស់លោក Robert Mugabe ឈ្មោះ Emmerson Mnangagwa បានសម្តែងក្តីសោកសៅយ៉ាងខ្លាំង ចំពោះការបាត់បង់លោក Robert Mugabe ដោយចាត់ទុកលោកថា ជាវីរបុរសសេរីភាព។
លោក Emmerson Mnangagwa ជាអនុប្រធានាធិបតី នៅពេលលោក Robert Mugabe នៅកាន់អំណាច៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC