ភ្នំពេញ ៖ មិនថាយប់ ឬថ្ងៃឡើយ ទីស្នាក់ការកណ្ដាលរបស់គណបក្សខ្មែរក្រោក នៅតែមានវត្តមាន ពុកម៉ែបងប្អូនមានជាហូរហែរ ដើម្បីដាក់ពាក្យបណ្ដឹង ក្រោយពលរដ្ឋអស់ជំនឿលើអាជ្ញាធរ និងភាពអសកម្មរបស់មន្ត្រីមូលដ្ឋានដែលមិនបានបម្រើពលរដ្ឋអស់ពីលទ្ធភាព និងសមត្ថភាព។
លោកសុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក បានឲ្យដឹងនៅយប់ថ្ងៃទី ០៦ ខែកញ្ញានេះថា ជារៀងរាល់ថ្ងៃយើងខ្ញុំបានខិតខំអស់ពីលទ្ធភាព និងសមត្ថភាពក្នុងការប្រយុទ្ធប្រឆាំងមន្ត្រីខូច តាមដានស៊ើបអង្កេតលើការអនុវត្តន៍ច្បាប់ ដើម្បីយកទ្រូងការពារប្រយោជន៍ស្របច្បាប់របស់ពលរដ្ឋ។
លោកបានបន្តឲ្យដឹងថា មូលហេតុដែលយើងខិតខំយ៉ាងនេះ ព្រោះយើងដឹងថា អារម្មណ៍របស់អ្នកទន់ខ្សោយ ដោយកើតទុក្ខព្រោះអ្នកមានអំណាចធ្វើបាបវាលំបាកប៉ុនណា ។
ក្នុងនាមលោកជាប្រធាន លោកនឹងមិនទុកមុខឲ្យទេអស់លោកណាក៏ដោយ ឲ្យតែធ្វើបាប នឹងបង្កការឈឺចាប់ដល់ពលរដ្ឋ ជាពិសេសធ្វើឲ្យប្រទេសជាតិខាតបង់ បើទោះជា ស្អប់ខ្ញុំស្អប់ទៅ គុំខ្ញុំគុំទៅ លោកថាអត់ឈឺក្បាលជាមួយទេ។
លោកបានបន្ថែមទៀតថា ទោះអស់លោកធំៗមួយចំនួនខឹងខ្ញុំស្អប់ខ្ញុំ ព្រោះខ្ញុំ បកអាក្រាតអស់លោក ខ្ញុំចង់ឲ្យអស់លោកដឹងថាទង្វើអស់លោកធ្វើឲ្យពលរដ្ឋទទួលបានភាពឈឺចាប់តើគាត់មានអារម្មណ៍លំបាកប៉ុនណា ៕ដោយ៖បញ្ញាស័ក្តិ