ភ្នំពេញ ៖ អ្នកជំនាញខាងអាយធី បានណែនាំដល់ប្រជាពលរដ្ឋឲ្យមានការប្រុងប្រយ័ត្នលើបទល្មើសនានាតាមប្រព័ន្ធអ៊ីនធឺណែត ជាក់ស្តែង ជនល្មើសបានប្រើប្រាស់នារីស្អាតៗ ដើម្បីទាក់ទាញជនរងគ្រោះ ធ្វើការសន្ទនាអនឡាញ ប្រើប្រាស់សកម្មភាពស្រើបស្រាល អូសទាញជនរងគ្រោះប្រព្រឹត្តសកម្មភាពរួមភេទ មុខកុំព្យូទ័រ ឬទូរស័ព្ទដៃ និងធ្វើការថតសកម្មភាពទាំងនោះ គំរាមទារប្រាក់។
នៅថ្ងៃទី៦ខែកញ្ញា តាមរយៈទំព័របណ្តាញទំនាក់ទនងសង្គមផ្លូវការរបស់នាយកដ្ឋានព័ត៌មានវិទ្យា នៃអគ្គលេខាធិការដ្ឋានក្រសួងមហាផ្ទៃ នូវតែបន្តផ្តល់ការណែនាំដល់ប្រជាពលរដ្ឋឲ្យមានការប្រុងប្រយ័ត្នលើបទល្មើសនានាតាមប្រព័ន្ធអ៊ីនធឺណែត ជាក់ស្តែង បច្ចុប្បន្នករណីថតរូបភាព ឬវីដេអូអាសអាភាសគំរាមទារប្រាក់ (Sex Extortion) ជាច្រើនកំពុងកើតមានឡើងក្នុងព្រះរាជាណាចក្រកម្ពុជា ដែលជនល្មើសបានប្រើប្រាស់មធ្យោបាយមួយចំនួនរួមមាន៖
ទី១ ៖ ប្រើប្រាស់នារីស្អាតៗ ដើម្បីទាក់ទាញជនរងគ្រោះ ធ្វើការសន្ទនាអនឡាញ ប្រើប្រាស់សកម្មភាពស្រើបស្រាល អូសទាញជនរងគ្រោះប្រព្រឹត្តសកម្មភាពរួមភេទ មុខកុំព្យូទ័រ ឬទូរស័ព្ទដៃ និងធ្វើការថតសកម្មភាពទាំងនោះ គំរាមទារប្រាក់។
ទី២៖ ប្រើប្រាស់គេហទំព័រអាសអាភាស បញ្ចូលកម្មវិធីសន្ទនាអនឡាញ ឬផ្ទាំងបើកវីដេអូ ដែលបញ្ជា Webcam ដើម្បីលួចថតសកម្មភាពជនរងគ្រោះ និងធ្វើការគំរាមទារប្រាក់។
ទី៣៖ ប្រើប្រាស់មធ្យោបាយផ្សេងៗ ក្នុងការចម្លងមេរោគទៅកាន់ម៉ាស៊ីនកុំព្យូទ័រ ឬទូរស័ព្ទដៃ ប្រើប្រាស់ Webcam ថតសកម្មភាពផ្សេងៗ និងធ្វើការគំរាមទារប្រាក់។
ស្តែងតាមសកម្មភាពដែលជនល្មើសបានប្រើប្រាស់មធ្យោបាយខាងលើនេះ ថ្នាក់ដឹកនាំនាយកដ្ឋានព័ត៌មានវិទ្យា ដែលមាន ឯកឧត្តម ឧត្តមសេនីយ៍ឯក ហោ សំអាត ប្រធាននាយកដ្ឋានបានដឹកនាំមន្ត្រីជំនាញ ដើម្បីផ្តល់នូវវិធានការការពារ និងដោះស្រាយដូចខាងក្រោម៖ ១. ជួបជាមួយមន្ត្រីជំនាញ ដើម្បីធ្វើការប្រឹក្សា ដាក់ពាក្យបណ្តឹង និងស្វែងរកជនល្មើស ២. ការបង់ប្រាក់តាមជនល្មើសវាកំណត់មិនមែនជាមធ្យោបាយនោះទេ ព្រោះអ្នកនឹងត្រូវបង់ជាបន្តបន្ទាប់ ៣. ធ្វើការបិទគណនីបណ្តាញសង្គមបណ្តោះអាសន្ន ៤. ប្រើប្រាស់កម្មវិធីកម្ចាត់មេរោគ ស្កេន និងសម្អាតមេរោគក្នុងម៉ាស៊ីនកុំព្យូទ័រ ឬទូរស័ព្ទដៃ ៥. ប្រើប្រាស់ Sticker បិទ Webcam នៅពេលមិនប្រើប្រាស់៕ ដោយ៖កូឡាប