ភ្នំពេញ ៖ ប្រតិភូវិនិយោគិនជប៉ុនដែលកំពុងមានប្រតិបត្តិការនៅក្នុងតំបន់ និងនៅក្នុងប្រទេសកម្ពុជា បានស្វែងយល់បន្ថែមពីកាលានុវត្តភាពវិនិយោគនៅកម្ពុជា ដែលវិស័យអាទិភាពទាំង៥ដែលបានកំណត់នៅក្នុង គោលនយោបាយអភិវឌ្ឍន៍ឧស្សាហកម្មកម្ពុជាឆ្នាំ ២០១៥-២០២៥ ជាពិសេសវិស័យកសិ-ឧស្សាហកម្ម និងកែច្នៃចំណីអាហារ ដែលក្រុមហ៊ុនជប៉ុនមានបច្ចេកវិទ្យានិងជំនាញ។
ក្រុមប្រឹក្សាអភិវឌ្ឍន៍កម្ពុជា The Council for the Development of Cambodia បានប្រកាសថា នារសៀលថ្ងៃសុក្រទី៦ ខែកញ្ញា ឆ្នាំ២០១៩ នៅទីស្ដីការក្រុមប្រឹក្សាអភិវឌ្ឍន៍កម្ពុជា (ក.អ.ក) លោកសុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការ ក.អ.ក បានទទួលជួបគណៈប្រតិភូវិនិយោគិនជប៉ុនចំនួន ១៤រូប ដែលកំពុងមានប្រតិបត្តិការនៅក្នុងតំបន់ និងនៅក្នុងប្រទេសកម្ពុជា ដើម្បីស្វែងយល់បន្ថែមពីកាលានុវត្តភាពវិនិយោគនៅកម្ពុជា ដឹកនាំដោយលោកប្រធានផ្នែកតំបន់អាស៊ីនិងអូសេអានីនៃធនាគារ មីហ្ស៊ូហូ ដែលជាធនាគារមួយក្នុងចំណោមធនាគារធំជាងគេទាំងបី នៅប្រទេសជប៉ុន។
ជំនួបពិភាក្សានេះត្រូវបានរៀបចំឡើងក្នុងក្របខ័ណ្ឌនៃការអនុវត្តអនុស្សរណៈយោគយល់គ្នាស្តីពីកិច្ចសហប្រតិបត្តិការជំរុញវិនិយោគ ដែលក្រុមប្រឹក្សាអភិវឌ្ឍន៍កម្ពុជាបានចុះហត្ថលេខាជាមួយធនាគារ មីហ្ស៊ូហូ កាលពីថ្ងៃទី២៧ ខែកុម្ភៈ ឆ្នាំ២០១៧ សំដៅជំរុញការវិនិយោគរបស់ជប៉ុនមកកម្ពុជា និងលើកកម្ពស់ភាពជាដៃគូសហគ្រិនកម្ពុជា-ជប៉ុន។
លោក សុខ ចិន្តាសោភា បានស្វាគមន៍យ៉ាងកក់ក្តៅចំពោះវត្តមានរបស់គណៈប្រតិភូ និងបានជម្រាបជូនគណៈប្រតិភូអំពីការវិវត្តសំខាន់ៗនៅកម្ពុជាពាក់ព័ន្ធនឹងកាលានុវត្តភាព និងសក្ដានុពលធុរកិច្ចនិងវិនិយោគ ក៏ដូចជាការដាក់ចេញនូវវិធានការថ្មីៗរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សំដៅធ្វើឱ្យកាន់តែប្រសើរឡើងនូវបរិយាកាសធុរកិច្ច និងវិនិយោគនៅកម្ពុជា។
ឆ្លើយតបនឹងសំណួរពីវិស័យដែលកម្ពុជាចង់ឃើញអ្នកវិនិយោគជប៉ុនធ្វើការវិនិយោគ លោករដ្ឋមន្ត្រីប្រតិភូបានជម្រាបជូនគណៈប្រតិភូ អំពីវិស័យអាទិភាពទាំង៥ដែលបានកំណត់នៅក្នុង គោលនយោបាយអភិវឌ្ឍន៍ឧស្សាហកម្មកម្ពុជាឆ្នាំ ២០១៥-២០២៥ ជាពិសេសវិស័យកសិ-ឧស្សាហកម្ម និងកែច្នៃចំណីអាហារ ដែលក្រុមហ៊ុនជប៉ុនមានបច្ចេកវិទ្យានិងជំនាញ ខណៈដែលកម្ពុជាមានកសិផលដែលមានគុណភាពខ្ពស់៕ ដោយ ៖ កូឡាប
