ស្រ្តីម្នាក់នៅភាគខាងត្បូងប្រទេសឥណ្ឌា បានផ្តល់កំណើតដល់កូនភ្លោះស្រី ២នាក់ ដោយគាត់មានអាយុ ៧៣ឆ្នាំទៅហើយ។
លោកវេជ្ជបណ្ឌិត Uma Sankar បានថ្លែងប្រាប់ BBC ថា ស្រ្តីចំណាស់ជាម្តាយ និងកូនភ្លោះទាំង ២នោះមានស្ថានភាពល្អ។
ស្រ្តីចំណាស់ជាម្តាយឈ្មោះ Mangayamma Yaramati បាននិយាយថា គាត់ និងប្តីរបស់គាត់ដែលមានអាយុ ៨២ឆ្នាំ តែងតែចង់បានកូន ប៉ុន្តែពួកគេមិនមានសមត្ថភាពធ្វើវាបានសោះរហូតដល់ពេលឥឡូវ។
ប្តីរបស់អ្នកស្រីបានថ្លែងថា “ពួកយើងពិតជាសប្បាយខ្លាំងណាស់”។
ក្រោយពេលរឿងល្អកើតឡើងបានមួយថ្ងៃ លោកតា Sitarama Rajarao ដែលជាប្តីរបស់ស្រ្តីខាងលើ បានមានជំងឺដាច់សរសៃឈាមក្នុងខួរក្បាល ហើយបច្ចុប្បន្នលោកតាកំពុងត្រូវគេព្យាបាលនៅមន្ទីរពេទ្យ។
នៅពេលសួរថា តើនរណានឹងនៅមើលថែរក្សាកូនភ្លោះនោះក្នុងករណីមានអ្វីកើតឡើងមិនល្អ លោកតាបានឆ្លើយថា “គ្មានអ្វីដែលយើងអាចកំណត់បានឡើយ។ អ្វីដែលបម្រុងនឹងកើត វានឹងកើតឡើង។ អ្វីទាំងអស់សុទ្ធតែព្រះជាអ្នកកំណត់”។
សូមបញ្ជាក់ថា វាជាករណីកម្រខ្លាំងបំផុត ដែលស្រ្តីស្ថិតក្នុងវ័យជាង ៧០ឆ្នាំទៅហើយ នៅតែអាចមានកូនបាន។
កាលពីឆ្នាំ ២០១៦ ក៏មានស្រ្តីឥណ្ឌាម្នាក់ដែលមានអាយុជាង ៧០ បង្កើតបានកូនប្រុសម្នាក់ផងដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC