ខេត្តស្វាយរៀង៖ យ៉ាងហោចណាស់ស្ត្រីត្រូវជាប្រពន្ធ រងរបួសធ្ងន់ និងបុរសជាប្តីរងរបួសស្រាល ខណៈដែលជួបគ្រោះថ្នាក់ចរាចរបង្កដោយរថយន្តកូរ៉េ បុកពីក្រោយ បណ្តាលខ្ទាតទាំំងម៉ូតូទាំងមនុស្ស ចូលក្រោមរថយន្ត។
ករណីគ្រោះថ្នាក់ចរាចរនេះ បានកើតឡើងកាលពីវេលាម៉ោង៦និង២៥នាទី ថ្ងៃទី៦ ខែកញ្ញា ឆ្នាំ២០១៩ នៅលើផ្លូវជាតិលេខ១ ទល់មុខតំបន់សេដ្ឋកិច្ចពិសេសមេតហាតធេន ស្ថិតនៅភូមិ តាពៅ សង្កាត់ បាវិត ក្រុងបាវិត ខេត្តស្វាយរៀង ។
យោងតាមសមត្ថកិច្ចបានឲ្យដឹងថា៖ នៅមុនពេលកើតហេតុ មានរថយន្ត១គ្រឿង ម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ 3A-9771 បើកបរដោយឈ្មោះ ប៊ុន មិនា ភេទប្រុស អាយុ២៦ឆ្នាំ ជនជាតិខ្មែរ មុខរបរបើកបររថយន្តដឹកកម្មកររោងចក្រ រស់នៅភូមិត្រពាំងរុន ឃុំច្រេស ស្រុកចន្រ្ទា ខេត្តស្វាយរៀង (គ្មានរងរបួសត្រូវឃាត់ខ្លួន) បើកបរពីទិសជើងទៅត្បូង។ លុះបើកបរមកដល់ចំណុចកើតហេតុខាងលើ ក៏បានទៅបុក ម៉ូតូ១គ្រឿងម៉ាកហុងដាC125 ពណ៌ខ្មៅ ពាក់ផ្លាកលេខភ្នំពេញ 1BW-0725 ពីក្រោយ ដែលបើកបរដោយឈ្មោះរុន គន្ធា ភេទប្រុស អាយុ២៧ឆ្នាំ ជនជាតិខ្មែរ មុខរបរកម្មកររោងចក្រ រស់នៅភូមិព្រៃធ្លក ឃុំច្រេស ស្រុកកំពង់រោទ៍ ខេត្តស្វាយរៀង បណ្តាលឲ្យរងរបួស បញ្ជូនទៅព្យាបាលនៅមន្ទីរពេទ្យបង្អែកខេត្តស្វាយរៀង) និងជនរងគ្រោះដែលត្រូវជាប្រពន្ធមានឈ្មោះ អឿង ចាន់ណា អាយុ២៨ឆ្នាំ ជនជាតិខ្មែរ មុខរបរកម្មកររោងចក្រ រស់នៅភូមិឃុំ ស្រុកជាមួយគ្នា បណ្តាលឲ្យរបួសធ្ងន់ មិនពាក់មួកសុវត្ថិភាព ដែលកំពុងសម្រាកព្យាបាលនៅពេទ្យបង្អែកស្វាយរៀង។
ករណីនេះ នគរបាលបានបញ្ជាក់ពីមូលហេតុថា មកពីអ្នកបើកបររថយន្ត ខ្វះការប្រុងប្រយ័ត្ន បណ្តាលឲ្យបុកម៉ូតូពីក្រោយ។ បច្ចុប្បន្ន ជនរងគ្រោះទាំង២នាក់ ត្រូវក្រុមគ្រួសារបានបញ្ជូនទៅសម្រាកព្យាបាលនៅពេទ្យបង្អែកខេត្តស្វាយរៀង។
ចំពោះមធ្យោបាយទាំង២គ្រឿង ខូចខាតធ្ងន់ម៉ូតូ១គ្រឿង និងរថយន្តខូចខាតស្រាល១គ្រឿង។ សមត្ថកិច្ចបាន យកមក រក្សាទុកនៅ អធិការដ្ឋាននគរបាលក្រុងបាវិត ដើម្បីកសាងសំណុំរឿង តាមនីតិវិធីច្បាប់៕ ដោយ៖វ៉ៃកូ