ខេត្តស្វាយរៀងៈ អំណោយមនុស្សធម៌ជាស្បៀង សម្ភារ និងថវិកាមួយចំនួន ត្រូវបានក្រុមការងារសាខាកាកបាទក្រហមកម្ពុជាខេត្តស្វាយរៀង ដឹកនាំដោយលោកស្រី ដួង វណ្ណា ប្រធានកិត្តិយសសាខាកាកបាទក្រហមកម្ពុជាខេត្តស្វាយរៀង រួមដំណើរដោយ លោកស្រី ពៅ សុភាព ហេរញ្ញឹកគណៈកម្មាធិការសាខា នាំយកទៅសំណេះសំណាល សួរសុខទុក្ខ និងចែកអំណោយ ដល់ប្រជាពលរដ្ឋងាយរងគ្រោះ ចំនួន ១០៤ គ្រួសារ មកពី ១០ ឃុំក្នុងស្រុករំដួល ដែលពិធីនេះបា្ររព្ធធ្វើនៅព្រឹកថ្ងៃទី ៧ ខែ កញ្ញា ឆ្នាំ២០១៩ នៅទីស្នាក់ការអនុសាខាកាកបាទក្រហមកម្ពុជាស្រុករំដួល ។
លោកស្រី ដួង វណ្ណា បាននាំមកនូវការផ្ដាំផ្ញើសាកសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ និងបានសម្តែងនូវការនឹករលឹក ក្តីស្រឡាញ់យ៉ាងជ្រាលជ្រៅជាមួយប្រជាពលរដ្ឋទាំងអស់ ។
ជាមួយគ្នានោះ លោកស្រីក៏ បានអំពាវនាវដល់ ប្រជាពលរដ្ឋ ទាំងអស់ បន្តប្រឹងប្រែងប្រកបរបរ ដើម្បីជីវភាពគ្រួសាររៀងៗខ្លួន ឲ្យបានល្អប្រសើរ ហើយត្រូវគិតគូរពីសុខុមាលភាពគ្រួសារ និងសង្គម ត្រូវយកចិត្តទុកដាក់ថែទាំសុខភាព ពិសាទឹកដាំពុះ មានអនាម័យល្អក្នុងការរស់នៅ សម្អាតបរិស្ថានជុំវិញផ្ទះ លុបបំបាត់ជម្រកសត្វមូស ដែលជាប្រភពនៃជំងឺគ្រុនឈាម-គ្រុនចាញ់ គេងក្នុងមុងជានិច្ច និងត្រូវទៅមន្ទីរពេទ្យជាបន្ទាន់ នៅពេលមាន រោគសញ្ញានៃជំងឺឆ្លងណាមួយ ដើម្បីសង្គ្រោះជីវិតឱ្យបានទាន់ពេលវេលាជាពិសេស ស្ត្រីមានផ្ទៃពោះត្រូវទៅពិនិត្យផ្ទៃពោះឱ្យបានទៀងទាត់ ណែនាំកូនចៅឲ្យគោរពច្បាប់ចរាចរណ៍ និងជៀសឲ្យឆ្ងាយពីគ្រឿងញៀន ។
អំណោយដែលបានចែកជូនទាំង ១០៤ គ្រួសារ ក្នុង ១ គ្រួសារ ទទួលបាន អង្ករ ៣០គីឡូក្រាម មី ១ កេស ទឹកស៊ីអ៊ីវ ៦ ដប ត្រីខ ១០ កំប៉ុង កន្ទេលបត់ ១ ឃីត ១ កញ្ចប់ (មុង ភួយ សារុង ក្រមា) អាវយឺត ២ និងថវិកា ៥០០០០ រៀល ៕ ដោយ៖វ៉ៃកូ