តាកែវ ៖ អភិបាលរងស្រុកត្រាំកក់ លោក សាយ វណ្ណៈ បាននិយាយកាលពីថ្ងៃទី ០៥ ខែកញ្ញាឆ្នាំ២០១៩ថា ការធ្វើរបងចូលក្នុងប្រឡាយទឹកនៅភូមិព្រៃដំរី ឃុំអង្គតាសោម ស្រុកត្រាំកក់ ខេត្តតាកែវ ជាកំហុសរបស់ជាង ដោយសារគាត់ធ្វើតាមខ្សែចងវាស់បង្គោល ដោយមិនដឹងថា បង្គោលខាងមុខនោះដួលទ្រេតទេ ទើបធ្វើរបងនេះចូលក្នុងប្រឡាយទឹកបែបនឹង ហើយវាមិនមែនជាកំហុសរបស់ម្ចាស់ដីទេ។
ការឆ្លើយពីសំណាក់លោកអភិបាលរងស្រុកត្រាំកក់បែបនេះ បានធ្វើឲ្យមជ្ឈដ្ឋានពលរដ្ឋសង្ស័យថា អាជ្ញាធរមានជាប់ពាក់ព័ន្ធជាមួយម្ចាស់ដីឃុបឃឹតគ្នាធ្វើរបងរំលោភយកដីប្រឡាយរបស់រដ្ឋ ដែលគេហៅថាជាប្រឡាយរង មានទទឹង ៨ម៉ែត្រ ជាប្រឡាយរំដោះទឹកហូរកាត់ថ្នល់ជាតិលេខ ០៣។
ក្រោយមានការបង្ហោះជាសារនៅលើបណ្តាញសង្គមហ្វេសបុក ស្តីអំពីការធ្វើរបងរំលោភចូលក្នុងប្រឡាយទឹកនោះ ត្រូវបានអាជ្ញាធរស្រុកដែលដឹកនាំដោយលោក សាយ វណ្ណៈ រួមជាមួយនិងមន្ត្រីជំនាញពាក់ព័ន្ធបានធ្វើការ ចុះមកត្រួតពីនិត្យលើកទី១ នៅថ្ងៃទី ១០ ខែឧសភា ឆ្នាំ២០១៩ ពិនិត្យនិងកំណត់អោយបោះបង្គោលព្រំធ្វើរបង ។ មកដល់ថ្ងៃទី ០៩ ខែ សីហា ឆ្នាំ២០១៩ ក្រុមការងារខាងលើដដែលបានចុះមកធ្វើការវាស់វែងម្តងទៀតរកឃើញថា ត្រង់ចំណុចក្បាលដីលេខ ០២០២ បានធ្វើរបងថ្ម ចូលដីប្រឡាយប្រវែង ០.៣០ម៉ែត្រ និងមានប្រវែង ៤៣ម៉ែត្រ នេះបើតាមរបាយការណ៏លេខ០៦៨/១៩ ដនសក/ត្រក របស់លោក លន់ ហួត ប្រធានការិយាល័យរៀបចំដែនដី នគរូបន៏យកម្មសំណង់ និងភូមិបាលស្រុកត្រាំកក់ ។
រហូតមកដល់ពេលនេះ ដោយមានការចម្រូងចម្រាស់ខ្លាំងពីបណ្តាញសារពត័មាន លើការធ្វើរបងក្នុងទឹកប្រឡាយនោះ នៅព្រឹកថ្ងៃទី០៨ ខែកញ្ញាឆ្នាំ ២០១៩នេះ រដ្ឋាបាលស្រុកត្រាំកក់ រួមជាមួយនិងមន្ទីរជំនាញពាក់ព័ន្ធបានចុះមកពិនិត្យ និងធ្វើការវាស់វែងសារជាថ្មីម្តងទៀត ក្នុងនោះលោក នួន សុធា ប្រធានមន្ទីររៀបចំដែនដីនិងនគរូបន៏យកម្មសំណង់ និងសុរិយោដីខេត្តតាកែវ បានអោយដឹងថា ការចុះមកពិនិត្យក្នុងថ្ងៃនេះ ឃើញថា ការសាងសង់របងថ្មរបស់ម្ចាស់ឈ្មោះ សែម សារ៉ែនឌី ពិតជាធ្វើរបងចូលដីប្រឡាយពិតមែន ដោយនៅផ្នែកខាងមុខរបងគឺចូលដីប្រឡាយទំហំ ១.៤០ម៉ែត្រ និងចូលដីចំណីផ្លូវជាតិលេខ ០៣ ចំនួន ០៦ម៉ែត្រទៀត ដោយឡែកនៅក្បាលដីជ្រុងខាងក្រោយនៃរបងគឺម្ចាស់បានធ្វើស្របតាមប្លង់រឹង ។
លោកប្រធានមន្ទីរបានបន្តថា ក្រោយធ្វើការវាស់វែងរួចគណកម្មាការចំរុះបានធ្វើការណែនាំដល់ម្ចាស់ដីដែលធ្វើរបង ហើយម្ចាស់ដីខាងលើបានយល់ព្រមធ្វើកិច្ចសន្យា យល់ព្រមវៃរបងថ្ម ដែលធ្វើចូលក្នុងដីប្រឡាយនោះចោល រួចធ្វើអោយស្របទៅនិងគោលការអនុញ្ញាតរបស់អាជ្ញាធរនិងសមត្ថកិច្ចជំនាញ ៕ ដោយ ៖ តាកែវ