ស្រុកកោះញែក ៖ ខ្មាន់កាំភ្លើង បានតាមបាញ់ប្រហារមកលើជនរងគ្រោះពីរនាក់ប្តីប្រពន្ធ កាលពីវេលាម៉ោង៧និង៣០នាទី យប់ថ្ងៃទី៧ ខែកញ្ញា ឆ្នាំ២០១៩ នៅណុចអូរគគីរ ស្ថិតនៅភូមិវាលវិល ឃុំត្រយ៉ ស្រុកកោះញែក ខេត្តមណ្ឌលគិរី ។ បន្ទាប់ពីបាញ់ប្រហាររួច ខ្មាន់កាំភ្លើងម្នាក់ បានរត់គេចខ្លួនបាត់ និងម្នាក់ទៀតសមត្ថកិច្ចស្រុកកោះញែកចាប់ខ្លួន ។
ជាមួយនឹងករណីនេះ នៅព្រឹកថ្ងៃទី៨ ខែកញ្ញា ឆ្នាំ២០១៩ សាកសពប្ដីប្រពន្ធ ២នាក់ ត្រូវបានកម្លាំងកងរាជអាវុធហត្ថ និងកម្លាំងនគរបាលអធិការស្រុកកូនមុំ បានចុះស្រាវជ្រាវយ៉ាងយកចិត្តទុកដាក់បំផុត ដើម្បីឈានទៅចាប់ខ្លួនជនដៃដល់ យកមកផ្តន្ទាទោសតាមច្បាប់ ហើយបានដឹកយកសពមកតម្កល់ នៅវត្តអូរភ្លង ស្រុកកូនមុំ ខេត្តរតនគិរី។ ប៉ុន្តែអ្វីដែលគួរឲ្យសង្វេកជាទីបំផុតនោះ គឺបន្សល់ទុក កូនតូចៗប្រុស-ស្រី៣នាក់ ត្រូវកំព្រាឪពុកម្ដាយ បន្ទាប់ពីឃាតករតាមបាញ់ប្រហារយ៉ាងឃោរឃៅ ដែលផ្តើមឡើងសង្ស័យជារឿងគំនុំ ។
អាជ្ញាធមូលដ្ឋាន បានឱ្យដឹងថា សពជនរងគ្រោះ ឈ្មោះ រ៉ា ហៅ ម៉ៅ អាយុ៣៧ឆ្នាំ ជាប្ដី មានស្រុកកំណើតនៅខេត្តកំពង់ធំ និងប្រពន្ធឈ្មោះ អុល អាយុ៣៣ឆ្នាំ។
លោក រស់ វណ្ណា មេបញ្ជាការមូលដ្ឋានកងរាជអាវុធហត្ថ ស្រុកកូនមុំ បានឲ្យដឹងថា តាមការឲ្យដឹងពីអ្នកជិតខាង ក្រុមគ្រួសារទាំងពីរ មានទំនាស់ទាស់ទែងគ្នា ដោយសារឿងដីធ្លីបានលបបាញ់ប្រហារ ទៅលើជនរងគ្រោះទាំងពីរបណ្ដាលឲ្យស្លាប់ភ្លាមៗនៅនឹងកន្លែង។ ជនសង្ស័យជាប្រពន្ធ ត្រូវសមត្ថកិច្ចស្រុកកោះញែក ខេត្តមណ្ឌលគីរី ចាប់ឃាត់ខ្លួនបានហើយ នៅឡើយតែឃាតកជាប្ដី សមត្ថកិច្ចកំពុងស្រាវជ្រាវបន្ត ដើម្បីចាប់ខ្លួនយកមកផ្តន្ទាទោសតាមផ្លូវច្បាប់៕ ដោយ ៖ បញ្ញាស័ក្តិ
