បាតុករគាំទ្រលទ្ធិប្រជាធិបតេយ្យក្នុងទីក្រុងហុងកុងបានអំពាវនាវឲ្យប្រធានាធិបតីអាមេរិច ដូណាល់ ត្រាំ ជួយពួកគេ ខណៈដែលពួកគេបានធ្វើការហែរក្បួននៅក្បែរអគ្គកុងស៊ុលអាមេរិច ក្នុងទីក្រុង។
បាតុករមួយចំនួន មានកាន់បដា ដោយសរសេរថា “លោកប្រធានាធិបតី ត្រាំ សូមមេត្តាជួយសង្គ្រោះទីក្រុងហុងកុងផង និងធ្វើឲ្យទីក្រុងនេះអស្ចារ្យម្តងទៀត”។
ក្រុមបាតុករបានបន្តធ្វើការតវ៉ា ហើយនេះគឺជាសប្តាហ៍ទី ១៤ហើយនៃការតវ៉ាទ្រង់ទ្រាយធំរបស់ពួកគេ ទោះបីមេដឹកនាំរដ្ឋាភិបាលហុងកុង បានប្រកាសកាលពីពេលថ្មីៗនេះពីការបោះបង់ចោលច្បាប់ធ្វើបត្យាប័ន។ ទោះយ៉ាងណា វាគ្រាន់តែជាការទាមទារ ១ចំនុច ក្នុងចំណោមការទាមទារ ៥ចំនុចរបស់ពួកគេប៉ុណ្ណោះ។
ប្រទេសចិនធ្លាប់ព្រមានកុំឲ្យប្រទេសដទៃលូកលាន់កិច្ចការផ្ទៃក្នុងរបស់ខ្លួន។ ចិននិយាយថា ស្ថានភាពនៅហុងកុងគឺជាកិច្ចការផ្ទៃក្នុងរបស់ខ្លួនសុទ្ធសាធ។
ក្នុងការប្រមូលផ្តុំគ្នា កាលពីថ្ងៃអាទិត្យម្សិលមិញនេះ ក្រុមអ្នកតវ៉ាបានគ្រវីទង់ជាតិអាមេរិច និងបានស្រែកឲ្យអាមេរិចជួយរំដោះហុងកុងចេញពីចិន។
ក្រុមបាតុករ បានស្នើឲ្យអាមេរិចអនុម័តច្បាប់សិទ្ធិមនុស្សហុងកុង និងលទ្ធិប្រជាធិបតេយ្យ ដែលសមាជិកព្រឹទ្ធសភាជាច្រើនរូបមកពីគណបក្សប្រជាធិបតេយ្យកំពុងជំរុញឲ្យមានការពិចារណា នៅសប្តាហ៍ក្រោយ។
ចិនអាចនឹងដាក់ទណ្ឌកម្មអាមេរិច ប្រសិនជាពួកគេមើលឃើញថា អាមេរិចជាអ្នកនៅពីក្រោយការបំផុសបំផុលទាមទារសេរីភាពនៅហុងកុង។
សូមបញ្ជាក់ថា រហូតមកដល់ពេលនេះ រដ្ឋាភិបាលហុងកុង ទើបតែធ្វើតាមបានមួយចំនុចប៉ុណ្ណោះ ចំពោះការទាមទាររបស់បាតុករហុងកុង។ ចំពោះការទាមទារ ៤ចំនុចទៀតរួមមាន៖ ការលើកលែងទោសទៅឲ្យអ្នកតវ៉ាទាំងអស់ដែលប៉ូលសចាប់ខ្លួន បើកការស៊ើបអង្កេតលើករណីហឹង្សារបស់ប៉ូលីសលើក្រុមបាតុករ ដកចោលពាក្យចោទប្រកាន់ដែលថា ក្រុមបាតុករបង្កើតកុប្បកម្ម បង្កើតការបោះឆ្នោតជាសកល ដើម្បីជ្រើសរើសប្រធានក្រុមប្រឹក្សាប្រតិបត្តិ និងសភាហុងកុង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC