ភ្នំពេញ៖ ក្រសួងមហាផ្ទៃ បានបើកវគ្គបណ្តុះបណ្តាលបំប៉នជំនាញសវនកម្មផ្ទៃក្នុង និងការយល់ដឹងអំពីច្បាប់ប្រឆាំងអំពើពុករលួយ ដល់មន្រ្តីនគរបាល និងមន្រ្តីស៊ីវិលនៅអគ្គនាយកដ្ឋានសវនកម្មផ្ទៃក្នុង ក្រោមអធិបតីភាពលោក ឡាំ ជា រដ្ឋលេខាធិការ ក្រសួងមហាផ្ទៃ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅព្រឹកថ្ងៃចន្ទ ទី៩ ខែកញ្ញា ឆ្នាំ២០១៩នេះ ដើម្បីអភិវឌ្ឍន៍សមត្ថភាពជំនាញ និងលើកកម្ពស់ក្រមសីលធម៌ដល់មន្រ្តីនគរបាលជាតិ និងមន្រ្តីស៊ីវិលឲ្យក្លាយជាសវនករប្រកដោយវិជ្ជាជីវៈ។
លោក ឡាំ ជា បានមានប្រសាសន៍ថា រាជរដ្ឋាភិបាលនីតិកាលទី៦នៃរដ្ឋសភា បានដាក់ចេញនូវ គោលនយោបាយកំណែទម្រង់លើគ្រប់វិស័យ រួមទាំងកងកម្លាំងប្រដាប់អាវុធគ្រប់ប្រភេទ ដោយផ្តោតសំខាន់ទៅលើការធ្វើទំនើបកម្ម និងការពង្រឹងសមត្ថភាពវិជ្ជាជីវៈ នៃកងកម្លាំងគ្រប់ប្រភេទ ក្នុងបរិបទសកលភាវូបនីយកម្ម និងការធ្វើសមាហរណកម្មកម្ពុជា ទៅក្នុងសហគមន៍សេដ្ឋកិច្ចអាស៊ាន។ លោកបន្តថា ដើម្បីឈានទៅសម្រេចបាននូវគោលនយោបាយនេះ ក្រសួងមហាផ្ទៃបានដាក់ចេញនូវផែនការអភិវឌ្ឍន៍ធនធានមនុស្ស និងផ្តល់ការគាំទ្រគ្រប់បែបយ៉ាងទាំងស្មារតី សម្ភារៈ និងហិរញ្ញវត្ថុ តាមរយៈអគ្គនាយកដ្ឋានសវនកម្មផ្ទៃក្នុងធ្វើការបណ្តុះបណ្តាលផ្ទៃក្នុង ក្នុងការបង្កើនសមត្ថភាពបន្ថែម ដល់មន្រ្តីដែលទើបផ្ទេរចូល និងមន្រ្តីដែលពុំទាន់ទទួលបានការបណ្តុះបណ្តាល ឲ្យទទួលបាននូវការបំពេញសម្បទាវិជ្ជាជីវៈជាសវនករ ដើម្បីបង្កើនការយល់ដឹង និងបង្ការទប់ស្កាត់សំដៅកាត់បន្ថយបទល្មើស និងឱកាសប្រព្រឹត្តអំពើពុករលួយក្នុងពេលបំពេញភារកិច្ច ឬចុះបំពេញបេសកកម្ម តាមបណ្តាសវនដ្ឋានក្រោមដែនសមត្ថកិច្ចក្រសួងមហាផ្ទៃ ប្រកបដោយប្រសិទ្ធភាព តម្លាភាព និងគណនេយ្យភាព ធានាពង្រឹងបានទាំងបរិមាណ និងគុណភាព៕ ដោយ៖កូឡាប
