តាកែវ៖មន្ដ្រីជាន់ខ្ពស់ក្រសួងមហាផ្ទៃបានធ្វើការជំរុញទៅដល់អាជ្ញាធរខេត្តតាកែវត្រូវតែរួមគ្នាដោះស្រាយបញ្ហាប្រឈមនានាដែលបានកើតឡើងនិងក្ដាប់សភាពការណ៍ឲ្យបានច្បាស់លាស់នៅតាមខ្សែបន្ទាត់ព្រំដែន ពិសេសត្រួតពិនិត្យស្ថានភាពជាក់ស្ដែងនៃការរស់នៅ ការត្រៀមប្រយុទ្ធ ការហ្វឹកហាត់ និងការខ្វះខាតមួយចំនួន ដើម្បីជួយសម្របសម្រួលដោះស្រាយ អំពីជីវភាពរស់នៅរបស់កងកម្លាំងប្រដាប់អាវុធនគរបាលដែលឈរជើងនៅតាមបន្ទាត់ព្រំដែន កម្ពុជា វៀតណាម ដែលខេត្តតាកែវជាប់ព្រំប្រទល់ជាមួយ ខេត្តអានយ៉ាង និងខេត្តកៀនយ៉ាង ។
ថ្លែងនៅក្នុងឱកាសអញ្ជើញជួបប្រជុំជាមួយគណៈបញ្ជាការឯកភាពរដ្ឋបាលខេត្តស្ដីពីការចុះសួរសុខទុក្ខនិងពិនិត្យសកម្មភាពការងាររបស់កងកម្លាំងនគរបាលការពារព្រំដែនទិសភូមិភាគទី ៣ នូវព្រឹកថ្ងៃទី ៩ ខែ កញ្ញា ឆ្នាំ ២០១៩នេះនៅសាលប្រជុំសាលាខេត្តតាកែវ លោក នាយឧត្តមសេនីយ៍ សំរិទ្ធ ឌី រដ្ឋលេខាធិការក្រសួងមហាផ្ទៃ បានមានប្រសាសន៍ថាបច្ចុប្បន្ននេះក្រសួងមហាផ្ទៃបានដាក់ចេញវិធានការណ៍ជាច្រើនក្នុងការលើកកំពស់ស្មារតីទទួលខុសត្រូវ ប្រសិទ្ធភាពការងារ ត្រូវអនុវត្តន៍ដោយភាពម៉ឺងមាត់ហ្មត់ចត់តាមគោលការណ៍ច្បាប់ ដោយតម្រូវឲ្យគ្រប់ប៉ុស្ដិ៍នគរបាលការពារព្រំដែនត្រូវត្រួតពិនិត្យនិងល្បាតឲ្យបានគ្រប់ច្រកល្ហក ដើម្បីពង្រឹងនិងពង្រីកនូវសមត្ថភាព សំដៅកសាងខ្សែបន្ទាត់ព្រំដែន មួយប្រកបដោយសុខសណ្ដាប់ធ្នាប់ និងរបៀបរៀបរយបានល្អប្រសើរ។
ឆ្លងតាមការអានរបាយការណ៍ពិស្តាររបស់លោកឧត្តមសេនីយ៍ទោ សុខ សំណាង ស្នងការនគរបាសលខេត្តស្តីពីបញ្ហាប្រឈមរបស់កងកម្លាំងនគរបាលការពារព្រំដែនរបស់ខេត្តតាកែវ ដែលជាភូមិសាស្ត្រខេត្តមួយ ៦ខែគោក ៦ខែទឹក នៅតាមខ្សែបន្ទាត់ព្រំដែនឃើញថា មានបញ្ហាប្រឈមច្រើនលើការរស់នៅ របស់កងកម្លាំង ថែមទាំងកង្វះខាតទៅលើមធ្យោបាយប្រើប្រាស់ក្នុងការចុះល្បាតថែមទៀត នៅពេលដែលមានទឹកត្រូវប្រើមធ្យោបាយដោយទូក ពេលទឹកស្រកត្រូវប្រើមធ្យោបាយដោយម៉ូតូ និងមានចំណុចខ្វះខាតជាច្រើនទៀតដែលកងកម្លាំងរបស់យើងជួបប្រទះនិងត្រូវការជាចាំបាច់។
បន្ទាប់ពីបានស្តាប់របាយការណ៍របស់ស្នងការខេត្តរួចលោក សំរិទ្ធ ឌី បានមានប្រសាសន៍បន្ដថា ការប្រជុំថ្ងៃនេះដែលចូលរួមដោយប្រតិភូជាន់ខ្ពស់របស់ក្រសួងមហាផ្ទៃ ដែលបានចុះមកពិនិត្យមើល រាល់ទុកលំបាករបស់កងកម្លាំងនគរបាលទាំងអស់ដែលឈរជើងនៅតាមតំបន់ព្រំដែនទាំង បីប្រទេស មានព្រំដែនកម្ពុជា វៀតណាម ព្រំដែនកម្ពុជាឡាវ ព្រំដែនកម្ពុជា ថៃ ដែលក្នុងចំណោមខេត្តដែលជាប់ព្រំដែននៃប្រទេសទាំង ៣នោះ គឺមានខេត្តចំនួន ១៧ខេត្ត ដែលត្រូវចុះត្រួតពិនិត្យ និងសាកសួរសុខទុក ចង់ដឹងពីស្ថានភាព ការរស់នៅ ការហ្វឹកហាត់ និងចង់ដឹងអំពីបញ្ហាប្រឈមអ្វីខ្លះដែលកងកម្លាំងរបស់យើងកំពុងតែជួបប្រទះ ដើម្បីប្រមូលយកនូវបញ្ហាទាំងនោះ រាយការជូនសម្តេចក្រឡាហោម ស ខេង ក្នុងការសម្រេចជួយដោះស្រាយដល់កងកម្លាំងដែលកំពុងឈរជើងការពារបូរណភាពទឹកដី នៅតាមតំបន់បន្ទាត់ព្រំដែន វៀតណាម ឡាវ និងថៃ ។
ជាចុងក្រោយលោក នាយឧត្តមសេនីយ៍ សំរិទ្ធ ឌី រដ្ឋលេខាធិការក្រសួងមហាផ្ទៃបានសំណូមពរដល់ គ្រប់ស្ថាប័នជំនាញទាំងអស់ដែលពាក់ព័ន្ធនៅតាមបន្ទាត់ព្រំដែន ជាពិសេសអាជ្ញាធរខេត្ត មេត្តាជួយជ្រោមជ្រែងក្នុងកិច្ចសហការគ្នា ដើម្បីទប់ស្កាត់រាល់បទល្មើសខុសច្បាប់ទាំងឡាយនៅតាមបន្ទាត់ព្រំដែនឲ្យមានប្រសិទ្ធភាព និងទាន់ពេលវេលា ។
ជាកិច្ចឆ្លើយតប អំពីការលើកឡើងពីសំណាក់លោក នាយឧត្តមសេនីយ៍ សំរិទ្ធ ឌី រដ្ឋលេខាធិការក្រសួងមហាផ្ទៃ លោក ខាន់ សុខា អភិបាលរងខេត្តតាកែវ បានយល់ព្រម និងបន្តជួយសម្រួលលើការងារមួយចំនួនដែលពាក់ព័ន្ធឲ្យកាន់តែងមានភាពងាយស្រួលថែមទៀត ដើម្បីជំរុញនិងបំផុសស្មារតីរបស់កងកម្លាំងប្រដាប់អាវុធទាំងអស់ដែលឈរជើងនៅតាមតំបន់ព្រំដែន ៕ដោយ៖ តាកែវ
