ខេត្តព្រះសីហនុ៖ រដ្ឋបាលខេត្តព្រះសីហនុ កាលពីថ្ងៃទី៩ ខែកញ្ញា ឆ្នាំ២០១៩ នាសាលប្រជុំ របស់សាលាខេត្រព្រះសីហនុ បានបើកកិច្ចប្រជុំពិភាក្សាលើគម្រោងសាងសង់ផ្លូវចំនួន ២២ខ្សែ នៅក្នុងក្រុងព្រះសីហនុ។
កិច្ចប្រជុំនេះក្រោមអធិបតីភាព លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងលោក នូ វឌ្ឍនៈ អនុរដ្ឋលេខាធិការក្រសួងសាធារណៈ និងដឹកជញ្ជូន លោក ហែម វណ្ណឌី អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោក គួច ចំរើន អភិបាល នៃគណៈអភិបាលខេត្តព្រះសីហនុ ព្រមទាំងមន្ត្រីជំនាញមន្ទីរអង្គភាពពាក់ព័ន្ធ នៃរដ្ឋបាលខេត្តព្រះសីហនុ។
នាឱកាសនោះ លោក បុរី វង្សសានិត ប្រធានមន្ទីរសាធារណការ និងដឹកជញ្ជូនខេត្តព្រះសីហនុ បានឲ្យដឹងថា គម្រោងផ្លូវទាំង ២២ខ្សែ ក្នុងក្រុងព្រះសីហនុ មានប្រវែងសរុប ៤០៧៦០ ម៉ែត្រ ដែលត្រូវស្ថាបនាស្របតាមទៅតាមទំហំចរាចរណ៍ និងការអភិវឌ្ឍនៅក្នុងខេត្តនាពេលបច្ចុប្បន្ន និងអនាគត។
លោកបន្តថា ទន្ទឹមគ្នានេះ ក៏មានសំណង់ល្មើសច្បាប់មួយចំនួនបានសាងសង់នៅលើដីចំណីផ្លូវ និងត្រូវរុះរើចេញ ហើយថា គម្របលូបេតុងដែលធ្វើនៅលើប្រឡាយ ក៏ត្រូវរុះរើចេញ និងត្រូវស្តារប្រឡាយ រួចបោះបង្គោលកំណត់ព្រំប្រឡាយទាំងអស់ ក្នុងក្រុងព្រះសីហនុឲ្យមានព្រំត្រឹមត្រូវជៀសវាងមានការរំលោភបំពានខុសច្បាប់ទៀត។
ថ្លែងកិច្ចប្រជុំនោះដែរ លោក គួច ចំរើន អភិបាលខេត្តព្រះសីហនុ ក៏អំពាវនាវដល់ប្រជាពលរដ្ឋរស់នៅក្នុងក្រុងព្រះសីហនុទាំងអស់ ឲ្យចូលរួមសហការជាមួយរដ្ឋបាលខេត្តព្រះសីហនុ និងត្រូវបញ្ឈប់ការសាងសង់សំណង់ផ្សេងៗ រំលោភយកដីចំណីផ្លូវ, ត្រូវបញ្ឈប់ទង្វើអាក្រក់បោះចោលសំរាមចូលទៅក្នុងប្រព័ន្ធបង្ហូរទឹកនានា និងងាកមកចូលរួមចំណែកអភិវឌ្ឍន៍មូលដ្ឋានខេត្តព្រះសីហនុ ឲ្យបានស្រុះគ្នា៕ ដោយ៖ ដែន សីមា
