ប្រទេសកូរ៉េខាងជើងមានឆន្ទៈក្នុងការចាប់ផ្តើមចរចាបញ្ហានុយក្លេអ៊ែរឡើងវិញជាមួយនឹងអាមេរិច នៅក្នុងខែនេះ។ នេះបើតាមការបញ្ជាក់របស់អនុរដ្ឋមន្ត្រីការបរទេសកូរ៉េខាងជើង។
លោក Choe Son-hui បានថ្លែងថា កូរ៉េខាងជើងមានឆន្ទៈក្នុងការបន្តការពិភាក្សាគ្នាលើបញ្ហាដែលបានព្រមព្រៀងគ្នារួចរាល់រវាងប្រទេសទាំងពីរ។
ការប្រកាសពីឆន្ទៈក្នុងការចរចាឡើងវិញ កើតឡើងក្រោយពេលរដ្ឋមន្ត្រីការបរទេសអាមេរិច លោក Mike Pompeo បានសម្តែងក្តីសង្ឃឹមថា នឹងមានការចរចាឡើងវិញ។
តែប៉ុន្មានម៉ោងប៉ុណ្ណោះ ក្រោយពេលអនុរដ្ឋមន្ត្រីការបរទេសខាងលើប្រកាសពីឆន្ទៈក្នុងការចាប់ផ្តើមការចរចាឡើងវិញ មីស៊ីលចំនួន ២គ្រាប់ត្រូវបានគេរាយការណ៍ថា បានបាញ់ចេញពីប្រទេសកូរ៉េខាងជើង។
សូមបញ្ជាក់ថា កៅក្នុងកិច្ចប្រជុំកំពូលលើកដំបូងកាលពីឆ្នាំមុន ប្រធានាធិបតីដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន បានព្រមព្រៀងគ្នាក្នុងការរំសាយនុយក្លេអ៊ែរទាំងស្រុង ប៉ុន្តែការប្តេជ្ញាចិត្តនោះមិនផ្តល់ផ្លែផ្កាឡើយ។
លទ្ធផលនៃកិច្ចប្រជុំកំពូលរបស់មេដឹកនាំទាំងពីរ នៅក្នុងខែកុម្ភៈ ក៏បានជាប់គាំងផងដែររហូតមកដល់ពេលនេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC