ប្រធានាធិបតីអាមេរិច ដូណាល់ ត្រាំ បាននិយាយថា កិច្ចចរចាជាមួយនឹងក្រុមសកម្មប្រយុទ្ធតាលីបង់ ក្នុងគោលបំណងដើម្បីបញ្ចប់សង្គ្រាមដែលមានរយៈពេល ១៨ឆ្នាំនៅអាហ្គានីស្ថាន បានស្លាប់បាត់ទៅហើយ។
កាលពីចុងសប្តាហ៍កន្លងទៅនេះ លោកត្រាំ បានលុបចោលគម្រោងសម្ងាត់ក្នុងការទទួលគណៈប្រតិភូក្រុមតាលីបង់មកកាន់អាមេរិច ក្រោយពេលក្រុមសកម្មប្រយុទ្ធខាងលើ បានទទួលស្គាល់ថា ពួកគេបានសម្លាប់ទាហ៊ានអាមេរិចម្នាក់ទៀត។
ដំបូងឡើង ភាគីអាមេរិច និងក្រុមតាលីបង់ទំនងហាក់ខិតជិតដល់កិច្ចព្រមព្រៀង ប៉ុន្តែបែរជាត្រូវរលាយទៅវិញ។ ក្រុមតាលីបង់បាននិយាយថា អាមេរិចនឹងបាត់បង់ច្រើនបំផុត ក្នុងការលុបចោលកិច្ចចរចានោះ។
ប្រធានាធិបតី បានធ្វើការដកទ័ពអាមេរិចមួយចំនួនចេញពីប្រទេសអាហ្គានីស្ថាន ហើយបច្ចុប្បន្ន នៅមានទ័ពអាមេរិចចំនួន ១៤.០០០ឈរជើងនៅទីនោះ។
នៅពេលសួរថា តើទ័ពទាំងនោះនឹងត្រូវដកចេញឬយ៉ាងណា? លោក ត្រាំឆ្លើយវិញថា ពួកយើងត្រូវតែចេញ ប៉ុន្តែត្រូវចេញក្នុងពេលវេលាសមស្រប។
លោកត្រាំ បានថ្លែងប្រាប់អ្នកសារព័ត៌មាននៅសេតវិមានដូច្នេះថា “ពួកគេគិតថា ពួកគេត្រូវតែសម្លាប់មនុស្ស ដើម្បីឲ្យពួកគេមានឱកាសចរចាបានប្រសើរ ប៉ុន្តែការវាយប្រហារនោះគឺជាកំហុសដ៏ធំ”។
សូមបញ្ជាក់ថា កាលពីឆ្នាំ ២០០១ កងកម្លាំងដែលដឹកនាំដោយអាមេរិច បានផ្តួលរំលំរដ្ឋាភិបាលតាលីបង់ ក្នុងប្រទេសអាហ្គានីស្ថាន ដោយសារតែក្រុមតាលីបង់ បានផ្តល់ជម្រកដ៏សុខសាន្តដល់បណ្តាញក្រុមអាល់កៃដា ក្នុងការរៀបគម្រោងវាយប្រហារលើអគារពាណិជ្ជកម្មពិភពលោកអាមេរិច កាលពីថ្ងៃទី ១១ ខែកញ្ញា ឆ្នាំ ២០០១៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
