ខេត្តស្វាយរៀងៈ បុរសជាជនជាតិវៀតណាមម្នាក់ បានរងរបួសធ្ងន់ ដោយសារគ្រោះថ្នាក់ចរាចរមួយ រវាងម៉ូតូ និងរថយន្ត របស់មន្ត្រីនគរបាល មានតួនាទីជាអនុប្រធានការិយាល័យអន្តរាគមន៍ នៃស្នងការដ្ឋាននគរបាលខេត្តស្វាយរៀង ។
ហេតុការណ៍នៃគ្រោះថ្នាក់ចរាចរខាងលើនេះ បានកើតឡើងកាលពីវេលាម៉ោង១៩និង២៥នាទី យប់ថ្ងៃទី៩ ខែកញ្ញា ឆ្នាំ២០១៩ នៅតាមបណ្តោយកំណាត់ផ្លូវកំពង់ស្ពាន ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
សមត្ថកិច្ចបានឱ្យដឹងថាៈ មានករណីគ្រោះថ្នាក់ចរាចរមួយកើតឡើង រវាងរថយន្ត និងម៉ូតូ ក្នុងទិសដៅបញ្ច្រាសទិសគ្នា ពីត្បូងទៅជើង បង្កឡើងដោយរថយន្ត១គ្រឿងម៉ាក ហ្សីប ពណ៌ត្រីអី ពាក់ផ្លាកលេខ នគរបាល2-2229 បើកបរដោយឈ្មោះ ទិន ឡង់ឌី ភេទប្រុស អាយុ៥០ឆ្នាំជនជាតិខ្មែរមុខរបរ នគរបាលនៃស្នងការដ្ឋាននគរបាលខេត្តស្វាយរៀង បើកបរទិសដៅពីកើតទៅលិច រួចបត់ឆ្វេង ឆ្លងកាត់ថ្នល់ លុះមកដល់ចំណុចកើតហេតុខាងលើ ក៏មានម៉ូតូ១គ្រឿងម៉ាកអិចសង់ទ័រ ពណ៌ក្រហមលាយខ្មៅ ពាក់ផ្លាកលេខ70-C1 205.11 បើកបរដោយឈ្មោះ ស្រី ជុង ភេទប្រុស អាយុ៣៩ឆ្នាំជនជាតិវៀតណាម មុខរបរលក់ដូរ មានទីលំនៅភូមិឡុងអាង ឃុំឡុងធឹង ស្រុកបេនកូវ ខេត្តតៃនិញ ប្រទេស វៀតណាម បុកប៉ះបណ្តាលឲ្យអ្នកបើកបរម៉ូតូរងរបួសធ្ងន់ (បាក់ជើងខាងស្តាំ) ។ បច្ចុប្បន្នអ្នករងរបួស ត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យប្រទេសវៀតណាម ។
ប្រភពខាងលើបានបន្តថាៈ ចំពោះមធ្យោបាយទាំង២គ្រឿង សមត្ថកិច្ចបាន យកមករក្សាទុក នៅអធិការដ្ឋាននគរបាលក្រុងបាវិត ដើម្បីកសាងសុំណុំរឿង ចាត់ការបន្ត ។ ហើយ មូលហេតុ ដែលបណ្តាលឱ្យកើតមាននូវគ្រោះថ្នាក់ចរាចរនេះ គឺរថយន្តបើកបរមិនប្រកាន់ស្តាំ ៕ដោយ៖ វ៉ៃកូ