ខេត្តស្វាយរៀង ៖ នៅព្រឹកថ្ងៃទី១០ ខែកញ្ញា ឆ្នាំ២០១៩នេះ បេក្ខជនប្រឡងសញ្ញាបត្រមធ្យមសិក្សាទុតិយភូមិ បាននាំគ្នា ទៅពិនិត្យមើលបញ្ជីឈ្មោះ លទ្ធផលប្រឡងរៀងៗខ្លួន ហើយបេក្ខជនជាសិស្សខ្លះ បានបង្ហាញទឹកមុខសប្បាយរីករាយ ដោយសារបានប្រឡងជាប់ រីឯអ្នកខ្លះទៀត មិនសប្បាយចិត្ត ព្រោះតែត្រូវប្រឡងធ្លាក់ ហើយជាពិសេសថែមទៀតនោះ គឺក្រសួងអប់រំមិនដាក់បង្ហាញឈ្មោះបេក្ខជនដែលប្រឡងធ្លាក់ នៅលើក្រដាសដែលបិទសម្រាប់ឲ្យសិស្សមើលនោះទេ គឺបានន័យថា ក្រសួងអប់រំ ហាក់បីដូចជាបំភ្លេចចោលបេក្ខជនដែលប្រឡងធ្លាក់ ដែលធ្វើឲ្យពួកគេកាន់តែបាក់ទឹកចិត្តថែមមួយកម្រិតទៀត ។
បេក្ខជនមួយចំនួនបាននិយាយថា ប្រឡងធ្លាក់មិនសូវសំខាន់ទេ ព្រោះខ្លួនឯងក៏ដឹងមុនហើយថា ប្រឡងមិនជាប់ដែរ ប៉ុន្តែខកចិត្តត្រង់ថា ក្រសួងអប់រំ មិនដាក់ឈ្មោះឲ្យមើលទៀត ឬក៏ក្រសួងអប់រំគិតថា បេក្ខជនដែលប្រឡងធ្លាក់សុទ្ធតែជាមនុស្សមិនបានការ មិនមានប្រយោជន៍ ទើបមិនដាក់ឈ្មោះក្នុងបញ្ជីលទ្ធផលប្រឡងបែបនេះ ហើយពួកគេក៏បានបន្ថែមថា ពួកខ្ញុំក៏ចង់ដឹងលទ្ធផល និងសមត្ថភាពរបស់ខ្លួនដែរ ថាខ្លួនធ្វើកិច្ចការវិញ្ញាសាទាំងអស់នោះ បានលទ្ធផលពិន្ទុប៉ុន្មានដែរ ។
បើតាមការបញ្ជាក់ពីមន្ត្រីនៃមន្ទីរអប់រំ យុវជននិងកីឡាខេត្តស្វាយរៀង បានឱ្យដឹងថាៈ បេក្ខជនដែលបាន ប្រឡងជាប់សញ្ញាបត្រ មធ្យមសិក្សាទុតិយភូមិ សម័យប្រឡង១៩-២០ខែសីហា ឆ្នាំ២០១៩កន្លងទៅ សិស្សជាប់និទ្ទេស A ចំនួន ៤៤៣ នាក់ ។ សម្រាប់ខេត្តស្វាយរៀង ឈ្មោះបេក្ខជនប្រឡងសញ្ញាបត្រមធ្យមសិក្សាទុតិយភូមិ ដែលទទួលបាននិទ្ទេសA ចំនួន ៨ នាក់ស្រី ៣ នាក់ មានឈ្មោះដូចខាងក្រោម៖ ១-សិស្សឈ្មោះ ផៃ វុទ្ធី ភេទប្រុស នោវិទ្យាល័យស្វាយរៀង ២-សិស្សឈ្មោះ ជាតិ ផានីតា ភេទស្រី នោវិទ្យាល័យស្វាយរៀង ៣-សិស្សឈ្មោះ មុំ វាស្នា ភេទប្រុស នៅវិទ្យាល័យ ហ៊ុន សែន ជ្រៃធំ ៤-សិស្សឈ្មោះ ដាញ់ សីហា ភេទប្រុស នោវិទ្យាល័យ ហ៊ុន សែន ជ្រៃធំ ៥-សិស្សឈ្មោះ វន់ ពិសីភេទស្រី នោវិទ្យាល័យ ហ៊ុន សែន ពងទឹក ៦-សិស្សឈ្មោះ សាយ រចនា ភេទស្រី នោវិទ្យាល័យ ហ៊ុន សែន កំពង់រោទិ៍ ៧-សិស្សឈ្មោះ សារ៉ន រ៉ាវុទ្ធ ភេទប្រុស នៅវិទ្យាល័យ ហ៊ុន សែន កំពង់ចក ៨-សិស្សឈ្មោះ អ៊ីញ កុសល ភេទប្រុស នៅវិទ្យាល័យ ប៊ុនរ៉ានី ហ៊ុនសែន ចន្ទ្រា។ ចំណែកបេក្ខជននិទ្ទេសB មាន៥១នាក់ និទ្ទេសC១៨១នាក់ D៥៦០នាក់ E២១១៧នាក់ សរុបជាប់២៩១៧នាក់។
សូមបញ្ជាក់ថា ជារៀងរាល់ឆ្នាំ រដ្ឋបាលសាលាខេត្តស្វាយរៀង តែងតែមានរង្វាន់លើកទឹកចិត្ត ដល់សិស្សដែលប្រឡងជាប់និទ្ទេសA ដើម្បីផ្តល់កម្លាំងចិត្ត សិស្សានុសិស្សទាំងអស់ នៅទូទាំងខេត្តស្វាយរៀង ឲ្យខិតខំរៀនសូត្រ ក្រេបយកចំណេះវិជ្ជា ក្លាយខ្លួនជាទំពាំងស្នងឫស្សី នៃប្រទេសជាតិ ប្រកបដោយចំណេះជំនាញពិតប្រាកដ មានអនាគតភ្លឺស្វាង និងចូលរួមអភិវឌ្ឍប្រទេស ជាមួយរាជរដ្ឋាភិបាល ដែលមានសម្តេចតេជោហ៊ុន សែន ជានាយករដ្ឋមន្ត្រី ឲ្យរីកចម្រើន ជាបន្តបន្ទាប់ផងដែរ ។ គួរបញ្ញាក់ថា សិស្សប្រឡងជាប់និទ្ទេសA នៅក្នុងខេត្តស្វាយរៀង កាលពីឆ្នាំ២០១៨ មានចំនួន៣នាក់ប៉ុណ្ណោះ ដោយឡែកឆ្នាំ២០១៩នេះ វិញ សិស្សប្រឡងជាប់និទ្ទេសA មានចំនួន៨នាក់ កើនឡើង៥នាក់ ៕ដោយ៖ វ៉ៃកូ