ខេត្តព្រះសីហនុ៖ នៅព្រឹកថ្ងៃទី១០ ខែកញ្ញា ឆ្នាំ២០១៩នេះ នាសាលប្រជុំសាលាខេត្តព្រះសីហនុ បានរៀបចំកិច្ចប្រជុំ ស្តីពីសន្តិសុខសណ្ដាប់ ធ្នាប់របៀបរៀបរយ និងសុវត្ថិភាពសង្គម។
កិច្ចប្រជុំនេះចូលរួមជាអធិបតីដោយដោត លោក សាយ សំអាល់ រដ្ឋមន្ត្រីក្រសួងបរិស្ថាន ជាប្រធានក្រុមការងារថ្នាក់ជាតិ ចុះមូលដ្ឋានខេត្តព្រះសីហនុ និង នាយឧត្ដមសេនីយ៍ សន្តិបណ្ឌិត នេត សាវឿន ស្នងការនគរបាលជាតិ បានអញ្ជើញបានបើកកិច្ចប្រជុំស្តីពីសន្តិសុខ សណ្តាប់ធ្នាប់របៀបរៀបរយ និងសុវត្ថិភាពនៅខេត្តព្រះសីហនុ។
ក្នុងឱកាសនោះលោក គួច ចំរើន អភិបាល នៃគណៈអភិបាលខេត្តព្រះសីហនុ មានប្រសាសន៍ថា ខេត្តព្រះសីហនុ មានវិនិយោគិន ពាណិជ្ជករ អាជីវករប្រកបរបររកស៊ីកាន់តែច្រើន បង្កើននូវទំនុកចិត្តពីភ្ញៀវទេសចរ ដែលមកសម្រាកកម្សាន្តនៅខេត្តកាន់ តែសប្បាយរីករាយ និងមានសុវត្ថិភាពនៅលើទឹកដីខេត្តព្រះសីហនុ។
លោកបន្តថា ប៉ុន្មានឆ្នាំចុងក្រោយនេះ ខេត្តព្រះសីហនុ បានការបណ្ដាក់ទុនយ៉ាងច្រើនសន្ធឹកសន្ធាប់ ពីសំណាក់វិនិយោគិន ពិសេសវិនិយោគចិន ជាហេតុធ្វើឲ្យខេត្តព្រះសីហនុមាន ការរីកចម្រើនយ៉ាងឆាប់រហ័សលើគ្រប់វិស័យ។ លោកបន្តថា ដោយផ្អែកលើភាពរីកចម្រើនរបស់ខេត្តព្រះសីហនុ បានជំរុញឲ្យមានកំណើនប្រជាពលរដ្ឋនៅតាមបណ្ដាខេត្តផ្សេងមកធ្វើការងារ និងប្រកបរបរនៅទៅតាមជំនាញ និងសមត្ថភាពរៀងៗខ្លួន។
បច្ចុប្បន្នអ្នកវិនិយោគចិនស្ថិតលំដាប់លេខ១ ដែលមកបណ្ដាក់ទុន និងវិនិយោគភាគច្រើនក្នុងវិស័យឧស្សាហកម្ម ពាណិជ្ជកម្ម ដឹកជញ្ជូនសំណង់ ទេសចរណ៍ និងកាស៊ីណូ។
ផ្តើមពីបញ្ហានេះ លោក គួច ចំរើន បញ្ជាក់ថា គណៈបញ្ជាការឯកភាពខេត្ត ក៏បានដាក់ចេញ នូវវិធានការមួយចំនួនដល់កងកម្លាំងឯកភាពដោយធ្វើរដ្ឋបាលចំហ តាមផ្ទះសំណាក់ សណ្ឋាគារ កាស៊ីណូ កន្លែងស្នាក់នៅអចិន្ត្រៃយ៍ របស់ជនបរទេស។ ក្នុងនោះ ក៏បានពង្រឹងសកម្មភាពត្រួតពិនិត្យអាវុធជាតិផ្ទុះ, ជនអន្តោប្រវេសន៍, គ្រឿងញៀន និង ពង្រឹងការអនុវត្តច្បាប់ចរាចរណ៍ផ្លូវគោកក្នុងមួយសប្តាហ៍ ២ដងថែមទៀតផង។
ចំពោះការងាររក្សាសន្តិសុខសុវត្ថិភាពនេះ លោក គួច ចំរើន បញ្ជាក់ថា កម្លាំងសមត្ថកិច្ចជំនាញ បានសហការល្បាតជាប្រចាំរៀងរាល់រាត្រី ក្នុងក្រុងព្រះសីហនុពិសេសគោលដៅស្មុគស្មាញទាំង២០ទីតាំង។
បន្ថែមលើនេះ ក៏បានចាត់វិធានការដល់ជន បរទេសដែលចងការប្រាក់ខុសច្បាប់ បង្កឲ្យមានបទល្មើសករណីឃាត់ខ្លួនស្នើសុំទៅអគ្គនាយកដ្ឋានអន្តោប្រវេសន៍ ដើម្បីសុំបណ្ដេញចេញពីប្រទេស។ ឃាត់ទុករថយន្ត ដែលគ្មានផ្លាកលេខឆែករកបទ ល្មើសក្នុងករណីគ្មានបទល្មើស ត្រូវឃាត់រថយន្តទុកនៅមន្ទីរសាធារណការ ធ្វើការផាកពិន័យតម្រូវឲ្យធ្វើផ្លាកលេខ ទើបអនុញ្ញាតត្រឡប់ទៅវិញ។
ដោះ ស្រាយ តម្រូវការចាំបាច់នៅតាមមូលដ្ឋានពិសេសឆ្លើយតបទៅនឹងក្រុមហ៊ុន drive ឲ្យបានទាន់សភាពការណ៍ដូចជា ករណីអន្តរាគមន៍ជួយប្រជាពលរដ្ឋរងគ្រោះដោយជំនន់ទឹកភ្លៀងជាដើម។
នាឱកាសនោះដែរ លោក នេត សាវឿន អគ្គស្នងការនគរបាលជាតិ មានប្រសាសន៍ថា ខេត្តព្រះសីហនុមានអំណោយផលល្អ ដែលសម្ដេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា បានកំណត់គោលដៅទេសចរណ៍ អភិវឌ្ឍន៍ នឹងអាចជាខេត្តទំនើបជាងគេ ក្នុងការស្ថាបនាផ្លូវបេតុងទំនើបនៅពេលខាងមុខ ។ ក្នុងនោះទី១- មានការយកចិត្តទុកដាក់ពីរាជរដ្ឋាភិបាល ទី២- មានឧបនាយករដ្ឋមន្ត្រីចំនួន ៣រូប ផ្តោតលើខេត្តព្រះសីហនុមានដូចជា៖ ឧបនាយករដ្ឋមន្ត្រីក្រសួងមហាផ្ទៃ, ក្រសួងដែនដី និងក្រសួងហិរញ្ញវត្ថុ ទី៣- ក្រុមការងារថ្នាក់ជាតិ ទី៤- ក្រសួងមហាផ្ទៃ ទី៥- គណៈបញ្ជាការឯកភាពខេត្ត ទី៦- មហាសាមគ្គី ធ្វើឱ្យខេត្តមានការរីកចម្រើន មានកំណើនសេដ្ឋកិច្ចខ្ពស់។
លោក នេត្រ សាវឿន បន្តថា ពេលនេះ ក្រសួងមហាផ្ទៃបានបន្ថែមក្របខ័ណ្ឌមន្ត្រីនគរបាលចំនួន ២០០នាក់បន្ថែមទៀត តាមតម្រូវការជាក់ស្តែង និងបណ្តុះបណ្តាលមន្ត្រីនគរបាលចំនួន ៤០០នាក់ ឲ្យមានជំនាញ ដើម្បីជួយពង្រឹងសន្តិសុខ សណ្តាប់ធ្នាប់សាធារណៈ ត្រូវបន្តផ្សព្វផ្សាយ បើកវេទិកាសាធារណៈដល់គោលដៅ និងធ្វើការវិភាគ វាយតម្លៃសភាពការណ៍ និងធ្វើផែនការ ផែនទីទីតាំងភូមិសាស្ត្រ ប្រើប្រាស់កម្លាំងរដ្ឋបាល កម្លាំងជំនាញល្បាតឈរជើង ពួនស្ទាក់បង្ការ ទប់ស្កាត់បទល្មើសបានទាន់ពេលវេលា។
នាឱកាសនោះដែរ លោក សាយ សំអាល់់ រដ្ឋមន្ត្រីក្រសួងបរិស្ថាន និងជាប្រធានក្រុមការងារថ្នាក់ជាតិចុះមូលដ្ឋានខេត្តព្រះសីហនុ ក៏បានកោតសរសើរមន្ត្រី ដែលបានខិតខំប្រឹងប្រែងអនុវត្តន៍ការងារ មិនខ្លាចនឿយហត់ ក្នុងការចូលរួមអភិវឌ្ឍន៍ខេត្តនេះ ឲ្យមានការរីកចម្រើន ជាពិសេសលើវិស័យសំណង់ មានសន្ទុះកើនឡើង។ ទន្ទឹមនេះ ខេត្តព្រះសីហនុ ក៏ត្រូវមានផែទេសចរណ៍ ក្នុងការតាមដានត្រួតពិនិត្យជនបរទេស ដែលធ្វើដំណើរតាមទូកទេសចរណ៍ ឬទូកនេសាទ ក្នុងការធានាសន្តិសុខ សុវត្ថិភាពសាធារណៈ និងរបៀបរៀបរយ បម្រើឲ្យភ្ញៀវទេសចរជាតិ-អន្តរជាតិ និងអ្នកវិនិយោគ ឲ្យចូលមកកាន់ខេត្តព្រះសីហនុ ឲ្យបានច្រើនឡើងថែមទៀតនាថ្ងៃខាងមុខ៕ ដោយ៖ ដែន សីមា