បាត់ដំបង៖ បុរសម្នាក់ បានរត់ភៀសខ្លួនចេញពីស្រុកកំណើត បាន១ឆ្នាំ ក្នុងករណីរំលោភសេពសន្ថវៈ ពេលត្រឡប់មកចូលស្រុកវិញ សមត្ថកិច្ចរង់ចាំស្វាគមន៍ ឃាត់ខ្លួនបញ្ជូនទៅកាន់តុលាការ។
កម្លាំងរបស់អធិការដ្ឋាននគរបាលស្រុករតនមណ្ឌល បានប្រាប់ឲ្យដឹងថា នៅថ្ងៃទី៩ ខែកញ្ញា ឆ្នាំ២០១៩ កន្លងមកនេះ សមត្ថកិច្ចជំនាញបានចុះអនុវត្តន៍ដីការឃាត់ខ្លួនជនសង្ស័យម្នាក់ នៅត្រង់ចំណុចភូមិដូនមាយ ឃុំស្តៅ ស្រុករតនមណ្ឌល ខេត្តបាត់ដំបង ដោយបានចោទប្រកាន់ពីបទរំលោភសេពសន្ថវៈ ប្រព្រឹត្តនៅចំណុចភូមិ ឃុំ កន្លែងឃាត់ខ្លួនជនសង្ស័យខាងលើ កាលពីថ្ងៃទី២៣ ខែកុម្ភៈ ឆ្នាំ២០១៨ រួចគេចខ្លួនបាត់មួយរយៈ ។
ការចុះអនុវត្តន៍សាលដីកាបង្គាប់ឲ្យចាប់ និងឃុំខ្លួនពិរុទ្ធជននេះ សម្របសម្រួលនិងចេញដីកាដោយលោក រ៉ែម សុភក្តិ ប្រធានក្រុមប្រឹក្សាជំនុំជម្រះសាលាដំបូងខេត្តបាត់ដំបង ឆ្លើយតបតាមពាក្យបណ្តឹងរបស់ជនរងគ្រោះ មិនស្គាល់ឈ្មោះក្នុងសំណុំរឿង រំលោភសេពសន្ថវៈ កាលពីដើមឆ្នាំ២០១៨ ។
ពិរុទ្ធជនខាងលើក្រោយការឃាត់ខ្លួន ត្រូវបានកម្លាំងការិយាល័យព្រហ្មទណ្ឌកម្រិតធ្ងន់ រៀបចំសំណុំរឿងបញ្ជូន ទៅកាន់សាលាដំបូងខេត្តបាត់ដំបង ដើម្បីអនុវត្តន៍ទោសតាមនីតិវិធី ៕ដោយ៖កូឡាប