ភ្នំពេញ ៖ អាជ្ញាធរជាតិប្រយុទ្ធប្រឆាំងគ្រឿងញៀន បានប្រកាសថា រសៀលថ្ងៃទី១០ ខែកញ្ញា ឆ្នាំ២០១៩ លោកនាយឧត្តមសេនីយ៍ ជួន សុវណ្ណ អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន អមដំណើរដោយ លោក នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន បានដឹកនាំប្រតិភូកម្ពុជាទៅចូលរួមក្នុងកិច្ចប្រជុំថ្នាក់រដ្ឋមន្ត្រីស្តីពីការលើកកម្ពស់ប្រសិទ្ធភាពកិច្ចសហប្រតិបត្តិការក្នុងការប្រយុទ្ធប្រឆាំងនឹងឧក្រឹដ្ឋកម្មគ្រឿងញៀនឆ្លងដែន ដែលត្រូវបានរៀបចំឡើងនៅទីក្រុងហាណូយ ប្រទេសវៀតណាម ។
លោក ឧត្តមសេនីយ៍ឯក នាក់ យុទ្ធា អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន បានប្រាប់ឲ្យដឹងពីខ្លឹមសារកិច្ចប្រជុំថា ៖ កិច្ចប្រជុំដែលមានការចូលរួមពីប្រតិភូថ្នាក់រដ្ឋមន្ត្រីពីប្រទេសកម្ពុជា ចិន មីយ៉ាន់ ថៃ ឡាវ ហ្វីលីពីន, រដ្ឋបាលអនុវត្តច្បាប់គ្រឿងញៀនសហរដ្ឋអាមេរិក, នគរបាល សហព័ន្ធ អូស្ត្រីលី និងអង្គការ UNODCបានពិភាក្សាទៅលើ ៖ ស្ថានភាពបទល្មើសគ្រឿងញៀនតាមតំបន់ព្រំដែនការពិនិត្យ និងចែករំលែកពីបញ្ជីឈ្មោះ ប្រវត្តិក្រុមឧក្រិដ្ឋជន ផ្ទៀងផ្ទាត់,ពិនិត្យព័ត៌មាន, ការស៊ើបអង្កេតរួមគ្នាព្រមទាំងបញ្ជូនមន្ត្រីមន្ត្រីទៅសម្របសម្រួលសាកសួរប្រមូលព័ត៌មានលេីករណីគ្រឿងញៀនដោយផ្អែកលើបញ្ជីឯកសារ, កត់ត្រាមុខសញ្ញាសង្ស័យដែលបានផ្តល់ដោយប្រទេសសមាជិក និងផ្តល់អនុសាសន៍លើកកម្ពស់កិច្ចសហប្រតិបត្តិការក្នុងពេលអនាគត ។
លោក ឧត្តមសេនីយ៍ឯក នាក់ យុទ្ធា អគ្គលេខាធិការរង បានប្រាប់ឲ្យដឹងបន្ថែមថា ដើម្បីធ្វើឱ្យប្រសើរនូវប្រសិទ្ធភាព នៃកិច្ចសហប្រតិបត្តិការក្នុងការប្រយុទ្ធនឹងឧក្រិដ្ឋកម្មគ្រឿងញៀនឆ្លងដែន កិច្ចប្រជុំបាន
ដាក់ចេញនូវសេចក្តីថ្លែងការណ៍រួមដែលមានខ្លឹមសារ ចំនួន៨ចំណុច មានជាអាទិ៍ ៖
១.ជំរុញកិច្ចសហប្រតិបត្តិការទ្វេភាគី តំបន់ អន្តរជាតិ ។
២.ជំរុញការផ្លាស់ប្តូរព័ត៌មានស៊េីបអង្កេត/ព័ត៌មានក្នុងចំណោមប្រទេសនិងអង្គការនានាក្នុងលក្ខណៈជាក់លាក់ត្រឹមត្រូវទាន់ពេល ។
៣.ពិចារណាពីលទ្ធភាពក្នុងការធ្វេីយុទ្ធនាការថ្នាក់ជាតិស្តីពីបង្ការ បង្ក្រាបឧក្រឹដ្ឋកម្មគ្រឿងញៀន។
៤.បង្កេីតការស៊េីបអង្កេតរួមគ្នាទាក់ទងនឹងឧក្រឹដ្ឋកម្មឆ្លងដែន ។
៥.អនុវត្តន៍យុទ្ធសាស្ត្រត្រួតពិនិត្យសារធាតុគីមីផ្សំឲ្យបានហ្មត់ចត់ ទប់ស្កាត់ការបង្វែរសារធាតុគីមីផ្សំទៅផលិតគ្រឿងញៀនខុសច្បាប់។
៦.ពិនិត្យពីលទ្ធភាពបង្កេីតផ្តល់ជំនួយបច្ចេកទេស ចែករំលែកនូវបទពិសោធន៍ស្តីពីប្រតិបត្តិការប៉ុស្តិ៍ត្រូតពិនិត្យគ្រឿងញៀននៅតំបន់ជាប់ត្រីកោណមាស។
៧.បង្កេីនប្រសិទ្ធភាពប្រតិបត្តិការ យន្តការសហប្រតិបត្តិការអន្តរជាតិដែលមានស្រាប់គ្រប់គ្រងគ្រឿងញៀន។
៨.ស្វាគមន៍ចំពោះភាពឈ្លាសវៃរបស់អាស៊ានក្នុងការត្រួតពិនិត្យគ្រឿងញៀនដែលចែករំលែកជាមួយប្រទេសផ្សេៗលេីលោក៕ ដោយ ៖ កូឡាប
