ភ្នំពេញ ៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានចេញសេចក្តីថ្លែងការណ៍មួយនៅយប់ថ្ងៃទី១០ ខែកញ្ញា ឆ្នាំ២០១៩ ដោយឆ្លើយតបចំពោះសេចក្តីថ្លែងការណ៍របស់ លោក ស្រី Morgan Ortagus អ្នកនាំពាក្យក្រសួងការបរទេសសហរដ្ឋអាមេរិក ដែលបានទាមទារឱ្យរាជរដ្ឋាភិបាលកម្ពុជា ទម្លាក់ចោលការចោទប្រកាន់ប្រឆាំងលោក កឹម សុខា អតីតប្រធាន នៃអតីតគណបក្សសង្គ្រោះជាតិ។
តាមរយៈសេចក្តីថ្លែងការណ៍ យប់ថ្ងៃទី១០ ខែកញ្ញា ឆ្នាំ២០១៩នេះ អ្នកនាំពាក្យក្រសួងការបរទេសថ្លែងថា អ្នកនាំពាក្យក្រសួងការបរទេសកម្ពុជា បង្ខំចិត្តត្រូវតែឆ្លើយតបទៅនឹងសេចក្តីថ្លែងការណ៍របស់អ្នកនាំពាក្យក្រសួងការបរទេសអាមេរិក នៅថ្ងៃទី១០ខែកញ្ញា ឆ្នាំ២០១៩ ដែលនៅក្នុងចំណោម បញ្ហាដទៃផ្សេងទៀត បានទាមទារឲ្យរាជរាដ្ឋាភិបាលកម្ពុជា ទម្លាក់ចោទការចោទប្រកាន់ទាំងអស់ប្រឆាំងលោកកឹម សុខា។
ចាប់តាំថ្ងៃទី៩ ខែកញ្ញា ឆ្នាំ២០១៨ ដោយផ្អែកលើហេតុផលមនុស្សធម៌ លោក កឹម សុខា ត្រូវបានដោះលែងឲ្យមករស់នៅក្នុងផ្ទះរបស់គាត់ ជាមួយគ្រួសារយ៉ាងសុខស្រួល ក្រោមការត្រួតពិនិត្យរបស់តុលាការ។ ដូចបណ្តាប្រទេសដទៃទៀតដែលអនុវត្តន៍ប្រព័ន្ធច្បាប់ស៊ីវិល (civil law) នីតិវិធីតុលាការកម្ពុជា មិនមានចែងអំពីថិរវេលាអតិបរិមា សម្រាប់រឿងក្តីដែលស្ថិតក្រោមការឃ្លាំមើលតាមផ្លូវតុលាការនោះទេ។
អ្នកនាំពាក្យក្រសួងការបរទេសកម្ពុជា សូមរំលឹកថា ការបរាជ័យក្នុងការប៉ុនប៉ងជំរុញឱ្យមានការផ្លាស់ប្តូររបប តាមរយៈមធ្យោបាយមិនមែនប្រជាធិបតេយ្យ មិនមែនជាការអនុវត្តសិទ្ធិមនុស្សជាមូលដ្ឋាន និងលទ្ធិប្រជាធិបតេយ្យនោះទេ។ រាជរដ្ឋាភិបាលកម្ពុជា មានសិទ្ធិអធិបតេយ្យពេញលេញ ក្នុងការចាត់វិធានការតាមផ្លូវច្បាប់ចាំបាច់ ចំពោះបុគ្គល និងអង្គភាពទាំងឡាយណា ដែលរំលោភរដ្ឋធម្មនុញ្ញកម្ពុជា និងច្បាប់ជាធរមានផ្សេងទៀត សំដៅការពារសន្តិសុខជាតិ និងនីតិរដ្ឋរបស់ខ្លួន។
កម្ពុជា បានទាមទារឱ្យអ្នកនយោបាយ និងរដ្ឋការបរទេសទាំងអស់ ប្រកាន់ឲ្យបានខ្ជាប់ខ្ជួន នូវគោលការណ៍ប្រព័ន្ធពហុភាគីនិយម និងបទដ្ឋានមូលដ្ឋាន នៃទំនាក់ទំនងអន្តរជាតិ ដូចដែលមានចែង នៅក្នុងធម្មនុញ្ញអង្គការសហប្រជាជាតិ គោរពអធិបតេយ្យភាពកម្ពុជា និងចៀសវាងពីការជ្រៀតជ្រែក ចូលកិច្ចការផ្ទៃក្នុងកម្ពុជា ដោយយកលេសបញ្ហាសិទ្ធិមនុស្ស និងលទ្ធិប្រជាធិបតេយ្យ៕ ដោយ៖កូឡាប
ខាងក្រោមនេះជាសេចក្តីថ្លែងការណ៍របស់អ្នកនាំពាក្យក្រសួងការបរទេសកម្ពុជា ៖