ភ្នំពេញ៖ក្រុមបាល់ទាត់ជម្រើសជាតិកម្ពុជាប្រកួតចាញ់ក្រុមជម្រើសជាតិបារ៉ែន ០ទល់១ នាយប់ថ្ងៃទៅ១០កញ្ញា នៅលើទឹកដីរបស់ខ្លួន ។
នេះជាការប្រកួតវគ្គជម្រុះជុំទី២ ពានរង្វាន់បាល់ទាត់ពិភពលោក ឆ្នាំ២០២២ នៅប្រទេសកាតា ( 2022 FIFA World Cup qualification-AFC ) ។ សូមបញ្ជាក់ថា កាលពីថ្ងៃទី៥កញ្ញា កម្ពុជាលេងស្មើជាមួយហុងកុង១ទល់១ ក្នុងព្រឹត្តិការណ៍នេះដែរ ។
ក្រោយពីមានឱកាសដ៏ច្រើនក្នុងវគ្គទី១ មុនពេលបញ្ចប់លទ្ធផល ០-០ បណ្តោះអាសន្នផងនោះ ក្រុមគោព្រៃកម្ពុជា បានរបូត ១គ្រាប់នៅនាទីទី៧៨ ពីការធ្វើសម្រេចដោយកីឡាករពាក់លេខ១៩ Kamil Al-Aswad នៅពហុកីឡដ្ឋានជាតិនារាត្រីថ្ងៃអង្គារ ទី១០ ខែកញ្ញា ឆ្នាំ២០១៩ នៅពីមុខអ្នកទស្សនាផ្ទាល់ ប្រមាណ ៥៥០០០នាក់ពេញស្តាតតែម្តង។ ជាជ័យជម្នះ ០ទល់១ លើកម្ពុជា គឺធ្វើបានសម្រេចដោយកីឡាករ Kamil Al Aswad នៅនាទី៧៨ នៃវគ្គទី២។
នេះជាការបរាជ័យលើកទី១ ក្រោយឆ្លងកាត់ ២ប្រកួតក្នុងពូល C ក្រៅរកងបាន ១ពិន្ទុក្រោយប្រកួតបានស្មើ ១-១ ទល់នឹងហុងកុងនាថ្ងៃទី៥ ខែកញ្ញា គ្រាដែលគូប្រជែងបារ៉ែន រកបាន ៤ពិន្ទុឆ្លងកាត់ ២ប្រកួតដូចគ្នា និងឡើងទៅឈរនៅកំពូលជាបណ្តោះអាសន្នផងដែរ។
ថ្លែងក្នុងសន្និសីទសារព័ត៌មានក្រោយចប់ការប្រកួត លោក Filex G.Dalmas ជាគ្រូបង្វឹករបស់កម្ពុជាបានលើកឡើងថា ចំណុចល្អមានច្រើនដូចជាកីឡាករព្យាយាមជួយគ្នាទៅវិញទៅមក ព្យាយាមលេងដោយទំនុកចិត្ត តាមអ្វីដែលខ្លួនចង់លេង ។ ជាការពិតយើងបានលេងជាមួយក្រុមមួយខ្លាំងមែនទែន តែយើងនៅតែព្យាយាមរក្សាជំហរលេង ។ កម្ពុជា ត្រូវការពេលវេលាច្រើនទៀត ដើម្បីអភិវឌ្ឍន៍ និងពង្រឹងទម្រង់លេងរបស់ខ្លួន។ គ្រូបង្វឹកសញ្ជាតិអាហ្សង់ទីនដដែលរូបនេះបានបន្តទៀតថា ចំណុចដែលបង្ហាញឲ្យ ឃើញពីការរីកចម្រើននោះ គឺការយល់ពីទម្រង់លេង និងការរក្សាជំហរក្នុងតួនាទីរៀងៗខ្លួន និយាយទៅយើងមានចំណុចរីកចម្រើន ហើយក៏មានចំណុចខ្វះខាតដែរ ដែលយើងត្រូវការពេលវេលា ដើម្បីអភិវឌ្ឍន៍បន្ថែម ។ ប៉ុន្ដែយ៉ាងណាលោកមិនពេញចិត្ត ចំពោះលទ្ធផល ២ប្រកួតចុងក្រោយនេះទេ តែយើងនឹងព្យាយាម ដើម្បីប្រជាជនកម្ពុជាទាំងអស់គ្នា។
សូមបញ្ជាក់ថា កម្ពុជា នឹងមានការប្រកួតបន្តទៀតនៅក្នុងពូល C នៅថ្ងៃទី១០ ខែតុលា ឆ្នាំ២០១៩ ជាមួយជម្រើសជាតិអ៊ីរ៉ាក់ ដែលជាការប្រកួតទី៣ ប្រចាំពូលនេះ ខណៈប្រកួតទី៤ ជួបអ៊ីរ៉ង់ នៅថ្ងៃទី១៥ ខែតុលា ឆ្នាំ២០១៩។
ចំពោះលោកHélio Sousaគ្រូបង្វឹកក្រុមជម្រើសជាតិបារ៉ែនបានថ្លែងថា ក្រោយពីបាននាំក្រុមប្រកួតឈ្នះ ក្រុម បានបញ្ជាក់ថា ការប្រកួតនេះពិតជាអស្ចារ្យ យើងលេងជាមួយក្រុមដែលល្អមែនទែន ពួកគេព្យាយាមលេងជាមួយបាល់ ព្យាយាមរក្សាបាល់ ប៉ុន្តែទោះបីជាយ៉ាងណាក៏ដោយ ក៏យើងព្យាយាមកែប្រែស្ថានភាព បានយើងបង្កើតឱកាសបានច្រើន យើងមានឱកាសបញ្ចប់ទីបានច្រើន ប៉ុន្តែយើងរកបានតែមួយគ្រាប់។
លោកបន្ដថា៖ជាការពិតកីឡាកររបស់យើងសហការគ្នា បានយ៉ាងល្អ ហើយថ្ងៃនេះ ជាការប្រកួតដែលយើងរកបាន ៣ពិន្ទុដ៏មានសារសំខាន់សម្រាប់ក្រុម៕ ដោយ៖បញ្ញាស័ក្តិ
