បាត់ដំបង៖ សិស្សប្រឡងបាក់ឌុបនាំគ្នាយ៉ាងពពាក់ពពូន ចូលបួងសួងលាបំណន់ និងអរគុណចំពោះបុណ្យបារមី រូបសំណាកលោកតាដំបងក្រញូង ដែលជួយឲ្យប្រឡងជាប់ក្រោយថ្ងៃប្រកាសលទ្ធផល។
ក្នុងឱកាសនាំយកតង្វាយចេកមកសែនថ្វាយ យុវសិស្សឈ្មោះ សំណាង ផានិត រៀននៅវិទ្យាល័យសម្តេចឳ ខេត្តបាត់ដំបងបានប្រាប់ឲ្យដឹងថា ខ្លួនជាមួយនិងមិត្តភក្តិនៅល្ងាចថ្ងៃទី១០ ខែកញ្ញានេះ បានទិញផ្លែចេក១ស្និតម្នាក់ ដើម្បីឧទ្ទិសថ្វាយលាបំណន់ និងសងគុណដ៏ធំធេងជូនចំពោះបារមី លោកតាដំបងក្រញូង ព្រោះកាលពីមុនប្រឡងពួកខ្លួន បានមកបួងសួងសុំឲ្យលោកតាជួយផ្តល់នូវជំនឿទុកចិត្ត និងវិញ្ញាសាប្រឡងចេញប៉ះនូវវិញ្ញាសាដែលខ្លួនចេះចាំ។
ចំណែកយុវជនឈ្មោះ ហ៊ា សុខលីវ៉ាន់ រស់នៅក្នុងសង្កាត់ស្វាយប៉ោ ក្រុងបាត់ដំបង និងរៀននៅវិទ្យាល័យសម្តេចឳ បានបង្ហាញអារម្មណ៍របស់ខ្លួនដែរថា ក្រុមគ្រួសាររបស់គេជានិច្ចកាលតែងតែមកបន់ស្រន់ បួងសួងសុំសេចក្តីសុខ រកទទួលទានឲ្យមាន ឲ្យបាន ពិសេសនៅពេលមានទុក្ខលំបាក ស្មុគស្មាញក្នុងគ្រួសារ ម្តាយរបស់ខ្លួនបានមកបួងសួង ឲ្យលោកតាដំបងក្រញូងជួយរំដោះគ្រោះចង្រៃផ្សេងៗ ឲ្យចាកផុតនូវឧបសគ្គទាំងឡាយទាំងពួង ឬឲ្យជាសះស្បើយពីជំងឺនានា។
ចំណែកឯស្ត្រីអ្នកលក់ផ្កា ធូប ទានបានឲ្យដឹងដែរថា នៅចំពោះមុខរូបសំណាកលោកតាដំបងក្រញូង ដ៏ពូកែស័ក្តិសិទ្ធិនេះ ជារៀងរាល់ថ្ងៃមានអ្នកធ្វើដំណើរជាច្រើន រួមទាំងប្រជាពលរដ្ឋដែលរស់នៅក្នុងខេត្តបាត់ដំបងផងដែរ បានចូលបួងសួង បន់ស្រន់បន្តគ្នាឥតដាច់ចាប់តាំងពីព្រលឹមទល់ព្រលប់ ពិសេសតាំងថ្ងៃដែលប្រកាសលទ្ធផលប្រឡងបាក់ឌុប មកសិស្សានុសិស្សទាំងប្រុស ទាំងស្រីបានចូលមកបន់ស្រន់ជាច្រើន ៕ ដោយ៖កូឡាប
